ڕۆژا سێشەمبی ڕێکەڤتی (۲۰۲۰/۲/٤) ب ئامادەبوونا سەرۆکێ زانکۆیا زاخۆ ڕێزدار پروفیسور دکتور (لەزگین عەبدی جەمیل) و بەرپرسێ لقا (۸) یا پارتی دیموکراتی کوردستان ڕێزدار پروفیسور دکتور (عەلی تەتەر) و ماموستا و قوتابیێن زانکۆیێ و دەزگایێن ڕاگەهاندنێ و کەسایەتێن باژێری، ب سەرپەرشتی و بەرهەڤکرنا (سەنتەرێ زاخۆ بۆ ڤەکولینێن کوردی) سەر ب زانکۆیا زاخۆڤە، ڕێورەسمێن بەڵاڤکرنا (۲۰) پەرتووکان بڕێڤەچوو.
د دەستپێکا ئەڤی ڕێورەسمیدا سمینارەک هاتە پێشکێشکرن و تێدا باس ل گرنگییا ڤان پەرتووکان هاتەکرن و پاشان پەرتووک هاتنە نیشاندان و بەڵاڤکرن. سەرۆکێ زانکۆیا زاخۆ د داخویانیەکێدا بۆ دەزگەهێن ڕاگەهاندنێ باس ل گرنگیا ئەڤی سەنتەری کر بۆ زانکۆیا زاخۆ و کوردستانێ هەمیێ، و ئاماژە ب بەرهەمێن وان یێن گرنگ دەربارەی کورد و کوردستانێ کر.
پروفیسور دکتور (هوگر طاهر توفيق) ڕاگرێ فاکولتیا زانستێن مروڤایەتی/زانکۆیا زاخۆ، بو مالپەرێ خەدەنگ گۆت: مە هەر ژ دەستپێکا ڤەکرنا ڤی سەنتەری ئارمانجێن مەزن هەبووینە بۆ خزمەتکرنا (زمان، وێژە، مێژوو، جوگرافیا…هتد) کورد و کوردستانێ، وەکو نوکە دیار ئەڤە دبیتە جارا دوویێ ئەم کومەکا پەرتووکان ژ بەرهەمێ سەنتەری چاپ و بەڵاڤدکەین، و گوت ژی ئەڤە بۆ ماوێ هەشت هەیڤانە ئەم وەکو ستافێ سەنتەری کار ل سەر ڤان پەرتووکان دکەین، داکو بشێین باشترین خزمەت پێشکێشی کورد و کوردستانیان بکەین، هەروەسا تەکەزی ل هندێ کر، کۆ ئەو پەرتووکێن وان چاپکرین د کۆالیتیەکا زۆرباش دانن ژلایێ چاپێڤە و هەتا نوکە چ دەزگەه پێشتر نەکارینە وەکی وان کارەکێ هوسا ب کۆالیتیەکا باش ئەنجام بدەن.
ڕێڤەبەرێ سەنتەرێ زاخۆ بۆ ڤەکۆلینێن کوردی پروفیسورێ هاریکار دکتور (عەبدولسەلام نەجمەدین عبدالله) بۆ مالپەرێ خەدەنگ گۆت: چاڵاکیێن سەنتەرێ زاخۆ بۆ ڤوکۆلینێن كوردى، پتر د چارچووڤێ ڤەکۆلینێن زانستى و ئەكاديمى و د بياڤێن مێژوو، ئەدەبيات، زمان و جڤاكناسييا كورديدانە. سەنتەرێ زاخۆ پێکولا ڤەژاندن، ساخكرن و تۆماركرنا ئەدەبێ سەرزارى، دەستنڤیس و ب دەستڤەهینانا بەڵگەنامەیێن پاراستى د ئەرشیفێ وەڵاتاندا ددەت. هەر د ئەڤی چارچووڤیدا کۆمەکا ڤەکۆلینێن زانستى گەهشتینە سەنتەری و پشتی هەلسەنگاندنا زانستى (20) پەرتووكان پەسەندا بەڵاڤکرنێ ژ لیژنا زانستى وەرگرت. پەرتووک د بیاڤێ (مێژوو، نەه پەرتووک؛ زمان، سێ پەرتووك؛ ئەدەبيات، شەش پەرتووك؛ جوگرافييا، ئێک پەرتووك؛ فێركرنا زمانى، ئێك پەرتووك) هاتینە هەلبژارتن. پەرتووك ب زمانێ كوردى، سێزدە پەرتووك و ب زمانێ عەرەبى، حەفت پەرتووك هاتینە وەشاندن. سەرجەمێ ڤەکۆلینا زانستى و بەلگەنامەیینە و دێ كارتێکرنا خوە هەبيت ل سةر مێژوو، زمان و ئەدەبياتا كوردى.
ئەم ب ناڤێ مالپەرێ خەدەنگ دەسخوشیێ ل (سەنتەرێ ڤەکولینێن کوردی/زانکۆیا زاخۆ) دکەین بۆ ڤی کارێ وان یێ پیرۆز، کۆ پێشکێشی خواندەڤانێن کوردستانێ وجیهانێ کرین.