دکتۆر (بێوار حسن علی) تایبەتمەندێ نەخوەشیێن دفن و گوه و گەوریێ، د چەند خالەکاندا و ب کورتی باس ل نشتەرگەریا دفنێ کر و گۆت: جوانکاریا دفنێ ئەو نشتەرگەریيە کۆ دھێتە کرن بۆ ڕاستڤەکرنا شێوێ دفنێ ژ ئەگەرێ شکەستنێ یان گوھورینا شێوێ دفنێ یێ زکماکی و ئەڤ نشتەرگەرییە بەهراپتر ل بن پەنجا گشتی و ھندەک جارا ژی ل بن پەنجا مەوزوعی دھێتە کرن، و پشتی نشتەرگەرییێ نەخوش بۆ چەند دەمژمێران دمینت د نەخوشخانێڤە.
گۆت: جوانکاریا دفنێ ب دوو رێکا دھێتە کرن؛ رێکا ڤەکری کۆ برینەکا بچیک ل پێشیا دفنێ دیار دکەت؛ و رێکا گرتی کۆ چ برین ل دەرڤە دیار ناکەن و جوانکاری دبیت بتنێ بھێتەکرن یانژی دگەل ڕاستڤەکرنا دیوارێ دفنێ یێ ناڤدا (جیوب). گۆتژی: دڤێ نشتەرگەریێدا باراپتر ھەستی و کرکرکێ دفنێ دھێنە دەستکاری کرن، بەس ھندەک جارا پیچەک پیست ژی دھێتە برین و جارا کرکرکا ناڤ دفنێ دھێتە بکارئینان بۆ گوھورینا شێوێ دفنێ بەس ھندەک جارا یا گوھی یان پەراسی دھێتە بکار ئینان، ئەڤ نشتەرگەریە بۆ کەسێت (١٨) سال و پێھەل دبیت چونکی دڤێت ھەستیکێت دفن و سەروچاڤێت وان باش گەھشت بن و گەشەکربن.
هەروەسا گۆت: ئەنجامێ دوماھییێ یێ نشتەرگەرییێ پێتڤی (٦-١٢) ھەیڤا یە ھەتا کۆ ب تمامی دیار دبیت ژبەر ھندێ زور پێتڤی یە نەخوش خۆ بگریت بەری ھزرا خۆ دنشتەرگەریەکا دیدا بکەت و ئێشان ل دەف زوربەیا نەخوشا یا کێمە و وەرمینا سەروچاڤا ب (٣-٤) روژا دچیت و رەش و شین بوون ب (٢-٣) حەفتیا دچیت و سەبارەت قالبێن دفنێ (٧-١٠) روژا دمینن و پشتی ھنگی نەخوش دشێت بچیتە سەر کارێ خۆ.
ل دووماهیێ گۆت : جوانکاریا دفنێ دبیت ببیتە ئەگەرێ؛ خوین بەربوونێ، ھەوکرنێ، ھەستیاری یا پیستی، دلرابوون و گێژبون، گوھرین یان کێمبوونا ھەستێ پیستێ دفنێ، گوھرینا ھەستێ بھێنکرنێ، دفن گرتن و بھێنکورتبوونێ و چێدبیت ئەنجامێ نشتەرگەریێ ب دلێ نەخوشی نەبیت و نەخوش پێتڤی نشتەرگەریەکا دی بیت. پاشی وەکۆ ئامووژگاری نۆژداری گۆت: ئەگەر نەخوشی بڤێت دفنا وی سەدێ سەد بێ عەیب بیت، دڤێت ڤێ نشتەرگەریێ نەکەت چونکی چ جار دفن سەدێ سەد ب دلێ نەخوشی و خەلکی نابیت.
دگەل دکتۆر / بێوار حسن علی تایبەتمەندێ نەخوەشیێن دفن و گوه و گەوریێ.
دیدار / ادریس ئاسیهی