دیدار: دلۆڤان هالۆ

(خەیری یوسڤ) برایێ مەزن یێ هونه‌رمه‌ند (ئه‌یاز یوسڤ)ی بۆ مالپەڕێ (خەدەنگ) گوت: ” هونه‌رمه‌ند (ئه‌یاز یوسڤ ئه‌حمه‌د) ژ بنه‌ماڵا ڕه‌زڤانانه‌، ل ڕێكه‌ڤتى (1960/2/20)ێ ل كولانا جۆهییان ل باژێڕێ (زاخۆ) ژ دایك بوویه‌، قوناغا سه‌ره‌تایى ل قوتابخانا (ئه‌حمه‌دێ خانى) خواندى یه‌ و قوناغا ناڤنجى ل قوتابخانا (به‌درخان) خواندییه‌، قوناغا ئاماده‌یى یا (كشتوكاڵ)ێ ب دوماهى دئینیت و ب زۆری ل په‌یمانگه‌ها (ده‌باباتان) ل (تكریت) دهێته‌ وه‌رگرتن، ژ به‌ر زیره‌كى یا وى دبیته‌ سه‌ركه‌ڤتیێ ئێکێ ل سه‌ر په‌یمانگه‌هێ و پلا (میلازمێ ئێكێ) ب ده‌ستخۆڤه‌ دئینیت”.

زێدەتر گوت: ” هه‌ر ل قوناغا سه‌ره‌تایى حه‌زا ستران گوتنێ ل ده‌ڤ ئه‌یازى په‌یدابوو، ل قوتابخانه‌ و جڤات و شه‌هیانان ستران دگوتن، ل ساڵا (1981)ێ ئێكه‌م به‌رهه‌مێ خۆ ل ستودیوا (بابێ مێهڤانى) تۆمار كر، پتری (150) سترانان هەنە، گه‌له‌ك حه‌ز ژ سترانێن فلكلورى دكر و نێزیكى (500) سترانێن فلكلورى ژ به‌ر بوون، كۆ جاره‌كێ ل شه‌هیانه‌كێ ژ سپێدێ تا كۆ درەنگی شه‌ڤ بێ دووباره‌ سترانێن فلكلورى دگوتن”.

ناڤهاتی، ئاماژه‌ ب وێ چه‌ندێ ژى كر: ” ئه‌یاز گه‌نجه‌كێ زیره‌ك و تێگه‌هشتى بوو، بیردانكه‌كا بهێز هه‌بوو، ژبلی ستران گوتنێ شیانێن زارڤەکرنێ ژی هەبوون، هه‌ر كه‌سه‌كێ (5) خۆله‌كان ل ده‌ڤ ڕۆینشتبا د شیا ب دورستاهى زارڤه‌كرنا ده‌نگ و لڤینێن وى بكه‌ت، هه‌روه‌سا كه‌سه‌كێ بێ زیانبوو، چ جاران دلێ كه‌سێ نه‌ د هێلا، ب ئانەهیا خودێ دێ ژیانناما وى كه‌مه‌ په‌رتوك”.

ل دوماهیێ ژی گوت: ” ل ڕێكه‌ڤتى (1986/1/20)ێ ژ ئەگەرێ گوتنا سترانێن نه‌ته‌وه‌یى ب تایبه‌ت سروودا (نه‌ورۆز)ێ و سترانا (چ بكم ئه‌ز ؟) ل نه‌خۆشخانا (مۆصل) ڕژێما به‌عس خوینا هونەرمەند (ئەیاز یوسڤ)ی ژه‌هركر، چونكى ئه‌گه‌ر وى بتله‌كێ خوینێ به‌خشى با دا (15) ڕۆژان ده‌ستویریا فه‌رمى وه‌رگریت، ژ به‌ر هندێ گه‌له‌ك جاران ژ به‌ر شه‌هیانا هه‌ڤالێن خۆ بتله‌كێ خوینێ د به‌خشى، داكو ده‌ستویریێ وه‌رگریت و بچیته‌ شه‌هیانا وان، له‌وما ڕژێمێ ئه‌ڤ ڕێكه‌ ب ده‌لیڤه‌ دیت كو خوینا ئه‌یازى پێ ژه‌هر بكه‌ن”.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *