سپیناغ ئێکە ژ زەرزەواتێن زەنگین ب ماددێ ئاسنی و هەروەسا کالسیومێ و ب تایبەتی ل وەڵاتێن رۆژئاڤا، هندەک جاران زارۆک دهێنە نەچارکرن کۆ دڤێت سپیناغێ بخۆتن و ئەو هاندان زێدەتر دبیت. ڕاستە سپیناخ ئێکە ژ ژێدەرێن باش یێن ئاسنی؛ لێ نە ئەو خوارنا سحری یە ئەوا گەلەک کەس هزردکەن ژبەر چەند هوکارەکا: • ئەو ئاسنێ دناڤ سپیناخێ دا هەی ئەوە ئەوێ دبێژنێ (Non-Haem Iron) ئانکو ب ساناهی دگەل هیموگلوبینا خوینێ خۆلێکنادەتن. • ڕێژا ئاسنی د زەرزەواتی دا گەلەک کێمترە ژوێ ڕێژەیا دناڤ پێکهاتێن ئاژەڵی دا هەین (هەرچەندە پێکهاتا ئاسنی د سپیناخێ دا پترە ژ زەرزەواتێن دی). • ئەو ئاسن و کالسیومێن دناڤ زەرزەواتی دا و ب تایبەتی سپیناخێ ب زەحمەت دهێنە مێژتن دناڤ ڕویڤیکاندا، هەرچەندە ڤیتامین (C) دشێت ڤێ مێژتنێ زێدەتربکەت، لێ هندەک پێکهاتێن دی کۆ دناڤ هەمان زەرزەواتدا هەنە بۆ نموونە (ئوکزالێت) مێژتنا ئاسنی و کالسیومێ گەلەک کێمتر دکەت. ئەڤ ڕەواجا بۆ سپیناخێ هاتیەکرن کۆ خوارنەکا سوپەڕە بۆ ساڵا (١٨٧٠) یێ د زڤڕیتەڤە دەمێ زانایەکێ بناڤێ (ڤون وولف) ڤەکۆلینەک ئەنجامدای و تێدا دیارکر کۆ سپیناغ زێدە یا زەنگینە ب ئاسنی و نڤیسەرێن دی بابەتێن وی پتر زێدەڕوویی کر و ژمارێن وی (١٠) جاران زێدەتر کربوون د نڤیسینێن خۆدا، لێ ئەو ئاخفتن ژلایێ زانایێن بوارێ خوارنێ ل چەرخێ بووری هاتە ڕەتکرنەڤە. لێ سپیناغ هەر د مینتەڤە خوارنەکا ساخلەم ویا پێدڤییە دناڤ ژەمێن خوارنا مەدا هەبیت.

د.عدنان صالح ئاکرەیی.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *