دەمێ ڤایروسەک توشى خانەیەکا لەشێ مە دبیت و خۆ دناڤ دا دڤەشێریت، ئەگەر خانەیێن بەرەڤانیا لەشى نەشێن وى ڤایروسى ئاشکەرا بکەن، هندەک خانەیێن (لیمفوسایتی) ب ناڤێ (CD8 cells) و خانەیێن (Cytotoxic T cells) هەر زوو پێدحەسن کۆ ڤایروسەک یێ چوویە دناڤ وێ خانەیا توشبوویدا، ژبەرکو ل سەر دیوارێ خانەیا تووشبووی وەرگرەک (وەرگر وەکو دەرگەهەکێ تایبەتە ڤایروس تێرا دچیتە د ژوورڤە هەیە ب ناڤێ (MHC-I) و پەیامان ددەتە خانەیێن لیمفوسایتی کو ڤایروسەک یێ چوویە د ژوورڤە.

لێ پا ڤایروس ب زیرەکیا خۆ هەر زوی کونترۆلێ ل سەر خانەیا توشبووی دکەت و دەرگەهێ (MHC-I) ل دویڤ خۆ ڕادگریت، لەورا خانەیێن لیمفوسایتی ژى نزانن ڤایروس یێ چوویە د ژوور ڤە.

باشە پا چارەسەرى چیە؟
خانەیەکا دى هەیە دبێژنێ خانەیا کوژەک یا سروشتى (Natural Killer cell) کۆ یا تایبەتە بۆ ژناڤبرنا ڤایروس و خانەیێن پەنجەشێرێ.

سیستەمێ بەرگریا لەشى فەرمانێ ددەتە خانەیێن کوژەک یێن سروشتى کو بچن ل وان خانەیان بگەرن یێن دەرگەهێ وان یێ (MHC-I) هاتیە گرتن، ژبەرکو گرتنا ڤى دەرگەهى رامانا وێ ئەوە کو ڤایروسەک یێ چوویە دناڤ وێ خانێدا.
لەورا هەر ئێکسەر خانەیێن کوژەک دێ پرۆتینەکێ حەلکرنێ ب ناڤێ پێرفۆرین (Perforin) بەرهەم ئینیت کو دێ دیوارێ خانەیا توشبووی کون کون کەت و ژناڤ بەت.

نڤیسین: ماموستا (دیان جەمیل).

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *