بەرسوژک یان هلدانا ترشاتیێ نیشانێن گهۆڕینەکا فیزیکینە د گەدەیدا؛ ب بۆرینا دەمى یان وەستاندنا وى، دەرگەهێ سەرى یێ گەدەى سستاهى دکەڤیتێ و ب ئەرکێ خوە وەکۆ پێتڤی رانابت و دگەل هێرانا خوارنێ، ترشاتیا دناڤا گەدەىدا، بەرەو بۆڕیا سەرى یا خوارنێ هلددت و وێ بەرسوژکێ پەیدا دکت؛ و بەرسوژک زێدەتر دبت هەگەر مرۆڤ خوە بچەمینت یان لسەر پشتێ خوە درێژکت.
دکتۆرى هۆسا دەست پێکر و گۆتژى: ل دەڤ مرۆڤێ ساخلەم، دەرگەهێ سەرى یێ گەدەى ب شێوەیەک دروست کار دکت و ل دەمێ گەدە خوارنێ دهێرت ئەو دەرگەهە دهێت گرتن وناهێلت ترشاتى بۆ سەرى هلددت و ئەو کەس ب ئارامى خوارنا خوە دخوت و ئارێشا ترشاتیێ ل دەف پەیدا نابت.
دکتۆرى باس ل هۆکارێن بەرسوژکێ کر و گۆت: چەندین جۆڕین خوارنێ هەنە دبن هۆکار بۆ ڤێ نەخوەشیێ وەکۆ:
– خوارنێن پڕى بهارات، و پیڤاز و ئەو مەعجوونێن ژ باجانان دهێن دروستکرن وەکۆ صاص و کەچەپێ.
– خوارنین قەلاندى.
– خوارنێن تێر روون، و شوکولاتا و نعناع.
– ڤەخوارنێن گازى وەکۆ بیبسى، و مەیێ و قەهوە و گەلەک ڤەخوارنا چایێ.
دگەل چەند هۆکارەکێن دى وەکۆ:
– جگارە کێشانێ .
– قەلەوى .
– دووگیانى.
سەبارەت ب کارتێکرنا بەرسوژکێ ل رۆتینا ژیانا رۆژانە، دکتۆرى گۆت: هەگەر بەرسوژک درێژبوو و ب شێوەیەک بەردەوام پەیدابوو، مرۆڤ دێ هەست ب نەئارامیێ کەت و دویرکەڤت ژ رۆتینێ خوە یێ رۆژانە و د بت پێتڤى ب چارەسەریێ هەبت و ب بەردەوامیا خوە، دبت کارتێکرنەکا نێگەتیف ل (مرئ)ى، بۆڕیا سەرى یا خوارنێ بکت و هێدی هێدى پویچ بکت و تووشى نەخوەشیێن گران ببت.
گۆتژى: سەبارەت ب دەستنیشانکرنا ڤێ نیشانێ و کویراتیا وێ پێدڤیە نۆژدار دیرۆکا وێ ل دەڤ نەخوەشى بزانت و دبت پێتڤى ب تیشکێ و نازۆرێژى ببت.
پاشى، باس ل رێکێن چارەسەریێ کرن و گۆت: گەلەک رێک هەنە کۆ مرۆڤ خوە دوورى نەخوەشیێن گەدەى بکت نەخاسمە بەرسوژکێ وەکۆ:
– گهۆڕینا شێوازێ ژیانێ و سیستەمێ خوارنێ.
– بەزاندنا کێشا لەشی ( دوورکەتن ژ قەلەویێ).
– خوە دوور خستن ژ خوارنێن دبن هۆکارێ بەرسوژکێ.
– نابت پشتى خوارنێ ئێک سەر خوەدرێژبکن یان ل سەر پشتێ بنڤن هەگەر ب کێماسى 3 دەمژمێڕ نەبۆریبن.
– دەست بەردان ژ جگارەکێشانێ و ڤەخوارنا مەیێ.
– باشترە ل دەمێ نڤستنێ بالگیه بلندبت.
– دبت نەخوەش پێدڤى ب دەرمانان هەبت و ل دویف نڤیسینا نۆژدارێ تایبەتمەند.
– ب رێژەیەک گەلەک کێم، دبت نەخوەش پێدڤى ب نشتەرگەریێ ببت.

دیدار: ادریس ئاسیهى

دگەل: دکتۆر (بدران احمد صالح) بۆرد ب نەخوەشیێن دل وهناڤا

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *