ئەو شەپالا ئەز ژێ دیرم، ئەڤرۆ کوڤانە گەلو

روندکێن رێز رێز دبارن، ئەڤە چ فەرمانە گەلۆ

ئەز دزانم دلبەرا من، هەر یا پر ژانە گەلۆ

لێ چەوا ژ خەو نەرابی، مانە دیلانە گەلۆ..؟

مانە نەورۆزە… بوهارە> مانە سەیرانە گەلۆ..؟ 

ئەو چەوا بلبل نەخواندن، بۆچی ڤەمانە گەلۆ..؟

بلبلەک هات چەنگ شکەستی، گوتی: تالانە گەلۆ

شاعرو دلبەر نەساخە، یا بێ ئەزمانە گەلۆ

دەردەکێ گرتی گرانە، نە ژ نازانە گەلۆ

کانێ نۆژدار.. کانێ زانا، لەرزە و تانە

دل ژ دل ئەڤرۆ پر کولە، دل بێ سەمیانە گەلۆ

هین دزانن کو ئەڤیندار، تۆخمێ لالانە گەلۆ

ئەو بەژنێ را چ شوخە، بەژنا خانانە گەلۆ

یان ژ رویمەت قەت نەبێژن، ئەو پەری خانە گەلۆ

دلبەرا چاردە بوهاری* ئەڤ چ فیغانە گەلۆ

قەت دبت دلبەر نەساخ بت، ئەڤ چ لەیلانە گەلۆ

ئەژدەهاک ئەڤرۆ د زۆرن، زۆری خاقانە گەلۆ

هەر ژ هینگێ ملەتێ مە، دیل و قوربانە گەلۆ 

زاروێن کوردا دکوشتن، مەژی دەرمانە گەلۆ

دا پێ ساخ بت شاهێ فارس، دەردێ مارانە گەلۆ

لێ نهو مار چارسەرینە، لێ ئەرزانە گەلۆ

پێ و دەستێن مە دپیڤن، سەر بێ كێشانە گەلۆ

بەدرخان سندی

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *