کورتەچیروکا: (گوندی)

نڤێسین: یوسڤ عەجیب

ئەو زەڵامەکێ پیر نەبوو بەلێ لڤین و ڕەفتارێن وی یێن پیرا بوون، دەمەک درێژ بوو ل سەر جهەکی ڕوینشتی بوو ئەوی ژی نە دزانی چوو تشتە بەلێ پاش هەست ب ڕەقاتییێ کر و زانی شووستەیە، ڕابوو سەر خوە ل بەرانبەر خوە دکانەکا سپیاتییا دیت وەها دیاربوو پێش وەخت ستێرکا خوە ل وێ دکانێ گرتبوو پاش بەرەڤ دکانێ چوو، کوڕەکێ نێزیک (٢٢) ساڵییێ ل وێدرێ بوو خودانێ دکانێ بوو، زەڵامی ب دەنگەکێ لاواز و شکەستی گۆت (خودێ خێرا تە مەزن بکت با..) کوڕکی بڕیی و نەهێلا گۆتنا خوە تەمام بکت، ئەڤە ڕەوشتێ خازوکایە پێش پارە وەرگرتنێ لاڤەیان ژ بۆ مرۆڤی دکن پاش پارەیان وەکو بهایێ لاڤەیان وەردگرن، کوڕکی ژی نەزانی چەوا سەرەدەر بکت هندەکێ شەرمکر نە ژبەر خازوکییێ چونکی ڕۆژانە خازوکان ئەو بازاڕ تژی دکر بەلێ ژبەر تەمەنێ زەڵامی یێ پێگەهشتی و سەروبەرێ وی یێ نیمچە جوان، ڕەنگێ وی بەر ب سورمانێ چوو کەڤتە داڤێن گۆمانێ؛ داکو خوە ژ ڤێ ڕەوشێ دەربێخت هەر زوی دەستێ خوە کرە دبەریکا خوەدە چوار دانەیێن (٢٥٠) دیناران ئینانە دەر ( ها برا ) برایی ژی بێی کۆ مویەکێ ل خوە شاش بکت کرنە دبەریکا خوەدە و چوو، دەما ژ دکانێ دەرکەڤتی ڕێڤەچوون و لڤینێن وی غەیریین، وەسا بەزیی دێ بێژی هەسپێ چوار گاڤییە، کوڕکی ژی ب مەندەهۆشی تەماشەدکر؛ کوڕ گەلەک توڕەبوو هەست ب خاپاندنێ کر، هزر د سکاڵایێ دە کر بەلێ پاش هەستپێکر تاوانێن ب ڤی ڕەنگی ل ڤان وەڵاتان ئاسایینە وەکو دیار خەمێ ژ ڤان تشتا ناخۆن، ئێکجار دناڤ خوەدە کەلیی، سۆز دا خوە ئیدی پارەیان ب خازوکان نە بەخشت ژبۆ کۆ وی دەنگێ د ناڤخوەدە بێدەنگ بکت ئەو دەنگێ دگۆت (تۆ چەند یێ کەر و گەمژەیی؟) پشتی بۆرینا چەند ڕۆژان هەمان زەڵام لێ ب کەسایەتییەک دی بژۆر کەڤت ڤێجارێ کوڕی وەکو جارا دی پێشوازییا وی نەکر ب توڕەیی لبەرانبەر ڕاوەستییا یێ دیتبا دا بێژت هەبت نەبت ئەڤە دێ کولمەکێ ل دەڤ و لێڤێت زەلامی دت (تەشقەلچی تۆ ڤێجارێ هاتییە چ؟) کوڕکی ب دەنگەک لەرزی ڤە وەگۆت، زەڵامی ژی چو پیتە ب توڕەبوونا وی نەکر (ئەز یێ هاتیم هزار دینارا تە بدم تە خەم نەکە ئەز دێ زێدەتر ژی دم تە) کوڕک د جهێ خوەدە هشک بوو ئەڤە چییە؟ زەڵامی لسەر گۆتنا خوە تەمام کر (قوربان ئەز نە خازوک بووم بەلێ تە ئەز کرمە خازوک نها ژی تە لبەرە من بکی تەشقەلچی؟ ئەز وێ ڕۆژێ هاتم دا هندەک سپیاتییان بکڕم ئەڤە هەیامەکە هاتیمە باژێڕی ژبەرکو ئەز دبازاڕیدە نەیێ شارەزامە، ئەو ڕۆژا تە خێر دگەل من کری نێزیکی دوو دەمژمێران من ل دکانەکا سپیاتییان دگەڕییا ژبەر بیانیبوونێ من نەدڤییا پرسا خوە ژ چو کەسان ژی بکم، ل دوماهییێ من دیت لێ گەلەک وەستیام تا وی ڕاددەیی من شیان نەمان بڕێڤەبچم، دەما من دکانا تە دیتی هند مابوو ژکەیفا ب فڕم من هندەکێ بێهنا خوە ڤەدا و لسەر شووستەیی ڕوینشتم پاشی هاتمە ژۆر و دا بێژم (خودێ خێرا تە مەزن بکت باشبووی تە دکانا خوە لڤێرێ ڤەکری و ڕێکا من درێژتر نەبوویی) بەلێ تە چوار (٢٥٠) دینار دانە من، ئاخڤتنا من ژبیرا من چوو، دا هەستا تەیا دلۆڤان نەشکێنم من وەرگرتن بێی کو خوە پێبینمە دەر و بێی کو سپیاتییان ژی بکڕم، دەما دەرکەڤتیم من کرە غار داکو تۆ ڕۆندکێن من نە بینی ئەز چووم؛ بێی ڕاوەستان هەتا من خوە ل پرا دەلالێ دیتی، ل هنداڤی وێ ڕاوەستییام من چوار (٢٥٠) دینارێن تە هاڤێتنە د خابیری دە و ب دلەکێ هەڕفتی من دگەل خوە گۆت ڕاستە کۆ (چو جاران گۆندی نابنە جندی) ڕۆندک ب دێمێ کوڕکی دە هاتن و گۆت ( جندییێن مە ژی بێ چەک و ڕێبەرن )

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *