Skip to content
پشتى هه‌ول و بزاڤێن به‌رده‌وام یێن كومخه‌باتا وه‌قفا میزوپۆتامییان ب هه‌ڤكارى دگه‌ل بارۆیا ئامه‌دێ یا پارێزه‌ران، د ماوه‌یێ ساله‌كێدا شیان فه‌رهه‌نگه‌كا تایبه‌ت ب زمانێ كوردى ده‌رباره‌یى تێرمینولۆژیا حقوقێ به‌رهه‌م بهینن.
هه‌ژییه بێژین، كو به‌رێز پرۆفیسۆر دكتۆر (عه‌بدولوه‌هاب خالد موسا) ماموستا ل پشكا زمانێ كوردیێ ل زانكۆیا زاخۆ ڕێڤه‌به‌رییا ته‌ڤایا جڤینێن كومخه‌باتێ د ماوه‌یێ ساله‌كێدا دكر، پرۆفیسۆرى ب تایبه‌تى ژ بۆ مالپه‌رێ زانكۆیێ گۆت: ب خۆشحالى پشتى خه‌بات و ماندیبوونه‌ك بێ هه‌مپا و سازكرنا جڤینانا ل چه‌ندین باژێرێن جوداجودا یێن باكورێ كوردستانێ و وه‌لاتێ توركیا، مه شیا فه‌رهه‌نگه‌كا تایبه‌ت لدور تێرمینولۆژیا حقوقێ ب زمانێ كوردى به‌رهه‌م بهینن.
هه‌روه‌سا ماموستایێ زانكۆیێ گۆت: هه‌لبه‌ت ئه‌ڤ فه‌رهه‌نگه دێ د وارێ زانستى و ئه‌كادیمیدا خزمه‌ته‌ك باش پێشكێشى جڤاكێ كوردستانێ و فه‌رهه‌نگسازیا زمانێ كوردى كه‌ت.
د ئالییه‌كێ دیتر دا به‌رێز دكتۆر (میكائیل بۆلبۆل) ئه‌ندامێ وه‌قفا میزۆپۆتامییان د داخویانییه‌كێدا ڕاگه‌هاند: فه‌رهه‌نگا حقوقناسیێ ل ته‌ڤایا خوینه‌ران پیرۆزبیت، ئه‌ز باوه‌رم ئه‌ڤ فه‌رهه‌نگه دێ جهه‌كێ گرنگ د بزاڤا ڕه‌وشه‌نبیرى و زمانى د مه‌یدانا ئه‌كادیمى و كارێن لدور زمانى دهێنه ئه‌نجامداندا ب باشى گریت.
دكتۆرى گۆت: ئه‌م گه‌له‌ك سوپاسییا ڕێزدار پرۆفیسۆر دكتۆر (عه‌بدولوه‌هاب خالد موسا) ماموستایێ زانكۆیا زاخۆ دكه‌ن، ژبه‌ركو هه‌گه‌ر جه‌نابێ وى و هه‌ولێن وى یێن به‌رده‌وام نه‌بان، كارێ مه ب ئه‌ڤى ئاوایى سه‌ركه‌ڤتییانه ده‌رنه‌دچوو.
لدووماهییێ فه‌ره بێژین، كو ل 25 ئه‌ڤێ مه‌هێ د ڕێوره‌سمه‌كێ تایبه‌تدا فه‌رهه‌نگا تێرمینولۆژیا حقوقێ ل باژێرێ ئامه‌دێ هاته به‌لاڤه‌كرن.
Post Views:
0