پشتى زانكۆیا زاخۆ ل ڕۆژا ئێكشه‌مبێ ڕێكه‌ڤتى (27/10/2019) مێهڤانداریا جڤینا (65) یا گرۆپێ كۆمخه‌باتا كورمانجییێ كرى و ب ڕه‌نگه‌كێ زانستى و ئه‌كادیمییانه‌ ته‌ڤایا كار و ئه‌ركێن خۆ جێبجێكرین، چه‌ندین مالپه‌ر و تیڤیێن ناڤخۆیى و ده‌رڤه‌یى هه‌رێما كوردستانێ ب شێوه‌ییه‌كێ ڕاسته‌وخۆ باس ل سپۆنسه‌رییا زانكۆیا زاخۆ بۆ جارا سێیه‌مین و بخودان ده‌ركه‌ڤتن ل گرۆپێ كۆمخه‌باتێ كرن.
د دووماهییك دیدار دا مالپه‌رێ (ڕییا تازه‌) ئه‌وێ ل وه‌لاتێ ڕۆسییا ده‌ردچیت، چه‌ندین نووچه‌ و ئاگه‌هدارى لدور ئه‌ڤێ مێهڤانداریا زانكۆیا زاخۆ بۆ گرۆپێ كۆمخه‌باتێ به‌لاڤه‌كرینه‌، هه‌روه‌سا دیداره‌ك تایبه‌ت دگه‌ل به‌رێز پرۆفیسۆر دكتۆر (عه‌بدولوه‌هاب خالد موسا) ماموستا ل پشكا زمانێ كوردى و ئه‌ندامێ سه‌ره‌كى و كارا یێ گرۆپێ كۆمخه‌باتێ سازكرینه‌. د دیدارێدا ماموستا ب ئاوایه‌كێ ئه‌كادیمییانه‌ و ب تێر و ته‌سه‌لى باسێ ڕۆلێ زانكۆیێ د بخودان ده‌ركه‌ڤتن ل گرۆپێ كۆمخه‌باتا كورمانجیێدا دكه‌ت، هه‌روه‌ها د ئالییه‌كێ دیتر یێ دیدارێدا دبێژیت: پێدڤییه‌ سازیێن دیتر ژى یێن ڕه‌وشه‌نبیرى و هۆنه‌رى خۆ ل ئه‌ڤى گرۆپى بكه‌ن خودان، ژبه‌ركو ئه‌ڤ گرۆپه‌ ب ئاوایه‌كێ تایبه‌ت لدور زمان و چاندا كوردى و ب ڕه‌نگه‌كێ تایبه‌ت ده‌رباره‌یى تێرمینۆلۆژییا زمانێ كوردى خه‌باتێ دكه‌ت.
پرۆفیسۆرى گۆت: مه‌ وه‌ك زانكۆیا زاخۆ ب دله‌كێ مه‌زن هه‌مبێز و ڤیانا خۆ بۆ خه‌باتكارێن گرۆپى ڤه‌كرییه‌، هه‌روه‌سا مه‌ سوزدایه‌ كو سالێ جاره‌كێ ب هه‌ڤكارى و هه‌ماهه‌نگى مێهڤانداریا جیڤینێن گرۆپى بكه‌ن و ئه‌ڤ چه‌نده‌ بۆ مه‌ سه‌رفه‌رازییه‌ك مه‌زن ل هه‌مبه‌ر زمان و ناسنامه‌یا مه‌ یا كوردستانى.
د ته‌وه‌ره‌كێ دیتر دا ڕێزدار دكتۆر (عه‌بدولوه‌هاب خالد موسا) ئاماژه‌ ب ئه‌ڤێ چه‌ندێدا: مه‌ ل زانكۆیا زاخۆ ب سه‌رپه‌رشتییا به‌رێز (دلێر كه‌مال ئه‌حمه‌د) هاریكارێ ڤه‌كۆله‌رى ل پشكا زمان و ئه‌ده‌بێ كوردى و ڕێڤه‌به‌رێ پشكا زمانێ كوردى ل مالپه‌رێ فه‌رمییێ زانكۆیا زاخۆ لیژنه‌یه‌ك تایبه‌ت دروستكرییه‌، ئه‌ڤ لیژنه‌ ب سه‌رپه‌رشتییا ڕێزدارى سالانه‌ بۆ ماوه‌یێ حه‌فت ڕۆژ و شه‌ڤان ب ئه‌ركێ خۆ یێ پیرۆز ل به‌رامبه‌ر زمانێ مه‌ یێ شرین ب خۆبه‌خشى ڕادبن. له‌ورا ده‌ستخۆشیێن تایبه‌ت ل جه‌نابێ وان دكه‌ن، ژبه‌ركو هه‌ڤالێن مه‌ یێن كارى فاكته‌رێن سه‌ره‌كى یێن سه‌ركه‌ڤتنا جڤینێن گرۆپێ كۆمخه‌باتا كورماجیێنه‌.
جهێ ئاماژه‌پێدانێیه‌، كو جڤینا (65) بۆ ماوه‌یێ حه‌فت ڕۆژان ل فه‌كۆلتیا زانستێن مرۆڤایه‌تى و لژێر سه‌رپه‌رشتیا ڕێزدار پرۆفیسۆر دكتۆر (هۆگر تاهر ته‌وفیق) ڕاگرێ فه‌كۆلتیێ ب ئاوایه‌كێ هه‌ره‌باش هاته‌ ئه‌نجامدان.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *