ل ڕۆژا ئه‌ینیێ ڕێكه‌ڤتى (8/11/2019) لده‌مژمێر (2:30) پشتى نیڤرۆ، ب ئاماده‌بوونا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و ڕێزدار دكتۆر (ئارام محه‌مه‌د قادر) وه‌زیرێ خواندنا بلند و ڤه‌كۆلینێن زانستى، به‌رێزان (فه‌رهاد ئه‌مین ئه‌ترۆشى) پارێزگارێ دهۆكێ، سه‌رۆكێن زانكۆیێن حكومى و تایبه‌ت، هه‌رێمدارێ زاخۆ، ڕێڤه‌به‌رێن داموده‌زگه‌هێن حكومى، لایه‌نێن سیاسى و سازیێن ڕاگه‌هاندنێ، زانكۆیا زاخۆ لژێر دوریشمێ (هێزا مرۆڤى زانسته‌، ڤیانه‌ و ئازادییه‌) ئاهه‌نگا گه‌ڕا نه‌هێ یا ده‌رچوونا قوتابییان ل یاریگه‌ها (ده‌لال) یا وه‌رزشى گێرا.

لده‌ستپێكێ ئاماده‌بوویان وه‌ك ڕێزگرتن ل گیانێ ته‌ڤایا جانگۆریێن كوردستانێ دگه‌ل سرودا نیشتیمانى یا (ئه‌یى ڕه‌قیب) خوله‌كه‌كێ ب بێده‌نگى ڕاوه‌ستیان، پاشان ڕێوره‌سمێن ئاهه‌نگێ ب خواندنا چه‌ند ده‌قه‌كان ژ قورئانا پیرۆز ده‌ستپێكرن.

ڕێزدار دكتۆر (له‌زگین عه‌بدى جه‌میل) سه‌رۆكێ زانكۆیێ په‌یڤا گه‌ڕا نه‌هێ یا ده‌رچوونا قوتابییان خواند و د په‌یڤا خۆ دا بخێرهاتنا گشت مێهڤانێن هێژا و قه‌درگران كر، هه‌روه‌سا پیرۆزباهییێن تایبه‌ت ل قوتابییان ب هه‌لكه‌ڤتا ده‌رچوونا وان كر و ئاماژه‌ ب ژیانا وان یا داهاتى دناڤ كه‌رتێن حكومى يان تایبه‌ت دا و داخوازا سه‌ركه‌ڤت و به‌خته‌وه‌ریێ بۆ وان خوازت. سه‌رۆكێ زانكۆیێ گۆت: د گه‌ڕا نه‌هێدا مه‌ شیایه‌ (1012) قوتابییان ب باوه‌رنامه‌یێن زانستى یێن جوداجودا پێشكێشى جڤاكێ كوردستانێ بكه‌ین و ب هێڤینه‌ ئه‌ڤ قوتابییه‌ بكارن خزمه‌تا گه‌ل و وه‌لاتێ خۆ ب ئاوایه‌كێ هه‌ره‌باش بكه‌ن.

به‌رێز دكتۆر (ئارام محه‌مه‌د قادر) وه‌زیرێ خواندنا بلند و ڤه‌كۆلینێن زانستى په‌یڤا وه‌زاره‌تێ ب گه‌رمى خواند و پیرۆزباهییێن تایبه‌ت ئاراسته‌یى قوتابییێن گه‌ڕا نه‌هێ و مالباتێن وا كرن، هه‌روه‌سا پیرۆزباهییێن سه‌رۆكێ حكومه‌تا هه‌رێما كوردستانێ گه‌هاندن قوتابییان. د لایه‌كێ دیتر یێ گۆتنا خۆ دا وه‌زیرى گۆت: ئه‌ڤرۆ ئه‌ز گه‌له‌ك خۆشحال و به‌خته‌وه‌رم كو د ئاهه‌نگا گه‌ڕا نه‌هێ یا زانكۆیا زاخۆ دا پشكدارم، ژبه‌ركو زانكۆیا زاخۆ بۆ من تایبه‌ته‌ و گرنگییا خۆ د ئاستێ زانستى و پێشكه‌ڤتنێدا هه‌یه‌. جه‌نابێ وه‌زيرى ئه‌ڤ چه‌نده‌ دوپاتكر: زانكۆیا زاخۆ كارییه‌ د ده‌مه‌كێ كێمدا داهێنانێن بێ هه‌مپا د بوارێ زانستى و ئه‌كادیمیدا بكه‌ت و ئه‌ڤ یه‌كه‌ ژى ده‌ستكه‌ڤته‌ك نایابه‌ بۆ گه‌لێ مه‌ یێ كوردستانێ و پێدڤییه‌ حكومه‌تا هه‌رێما كوردستانێ پشته‌ڤانییا زانكۆیێن وه‌ها كارا و خودان پلان بكه‌ت.

لدویڤدا په‌یڤا قوتابییان ژ ئالیێ به‌رێز (به‌یار شعبان) هاته‌ خواندن، د په‌یڤا خۆ دا به‌رێزى پیرۆزباهییا قوتابییێن ده‌رچوویى كر، هه‌روه‌سا ژ حكومه‌تا هه‌رێما كوردستانێ خوازت كو پلانه‌ك گونجایى بۆ گشت قوتابییێن ژ زانكۆ و په‌یمانگه‌هان ده‌ردچن دابرێژت، داكو ئه‌ڤ قوتابییه‌ ب ڕۆحه‌ك كوردایه‌تى خه‌بات و خزمه‌تێ پێشكێشى وه‌لاتێ خۆ بكه‌ن.

هه‌روه‌سا ڕێزدار دكتۆر (كاروان فه‌همى سامى) هاریكارێ سه‌رۆكێ زانكۆیێ بۆ كاروبارێن قوتابییان، په‌یڤه‌ك پێشكێشكر و ئاماژه‌ ب شیانێن قوتابیێن زانكۆیا زاخۆ و لێهاتنا وان د بیاڤێن زانستى و ب تایبه‌ت د پسپۆریێن واندا دا، هه‌روه‌ها باس ل ڕۆلێ ماموستایێن زانكۆیێ و خه‌مخۆریا وان د ئه‌رك و كارێن وان دا كر و سوپاسیێن تایبه‌ت ئاراسته‌یى جه‌نابێ وان یێن به‌رێز كرن. لدووماهییا په‌یڤا خۆ هاریكارێ سه‌رۆكێ زانكۆیێ سویندا یاسایى یا قوتابییان خواند و قوتابییان ژى ب ده‌نگه‌ك بلند سویندا یاسایى دگه‌ل جه‌نابێ دكتۆرى خواندن و كه‌یفخۆشییا خۆ ب ئه‌ڤێ ڕۆژێ ده‌ربرین.

د ته‌وه‌ره‌كێ دیتر ژ ڕێوره‌سمێن ئاهه‌نگێ، ڕێزدار وه‌زیرێ خواندنا بلند و ڤه‌كۆلینێن زانستى خه‌لاتێن تایبه‌ت ب چه‌ندین ماموستایێن زانكۆیا زاخۆ ب هه‌لكه‌ڤتا به‌رزبوونا پله‌یا وان یا زانستى و بده‌ستڤه‌هینانا باشترین ڤه‌كۆله‌ر و ڤه‌كۆله‌رێ خودان پترین ڤه‌كۆلین د سالا خواندنێ (2018/2019) دان.

برگه‌یا دووماهییێ ژ ئاهه‌نگا ده‌رچوونا گه‌ڕا نه‌هێ ژ بۆ ڕاگرێن كۆلیژ و فه‌كۆلتیێن زانكۆیا زاخۆ ب مه‌به‌ستا داخوازكرنا به‌خشینا باوه‌رنامه‌یا به‌كالۆریۆسێ ب هه‌مى ده‌ستكه‌ڤتییێن دگه‌لدا ژ سه‌رۆكێ زانكۆیێ هاتبوو ته‌رخانكرن، سه‌رۆكێ زانكۆیێ ژى ب خۆشحالى و ب به‌خته‌وه‌رییه‌ك مه‌زن داخوازا ڕاگران په‌سه‌ندكر و باوه‌رنامه‌ دگه‌ل هه‌مى ده‌ستكه‌ڤتییێن دگه‌لدا ب قوتابییێن ده‌رچووییدا و داخوازا شادیێ بۆ وان د ژیانا واندا كر.

 

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *