ل ڕۆژا شه‌مبیێ ڕێكه‌ڤتى (2/11/2019) ب ئاماده‌بوونا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و ڕێزدار دكتۆر (كه‌ندال نه‌زان) سه‌رۆكێ ئه‌نستتیوتا كوردى ل پاریسێ و به‌رێز دكتۆر (داود ئه‌ترۆشى) نوینه‌رێ وه‌زیرێ خواندنا بلند و ڤه‌كۆلینێن زانستى و به‌رێزان هاریكارێن سه‌رۆكێ زانكۆیێ و ڕاگرێن كۆلیژ و فه‌كۆلتیان و ماموستا و قوتابیێن زانكۆیێ و ده‌زگه‌هێن ڕاگه‌هاندنێ، سێیه‌مین كونفرانسێ نێڤده‌وله‌تیێ ڤه‌كۆلینێن كوردى ئه‌وێ ب هه‌ڤكارى و هه‌ماهه‌نگى دناڤبه‌را (ئه‌نستتیوتا كوردى و زانكۆیا زاخۆ و زانكۆیا كویه‌) ل هولا (خه‌لیل خه‌یالى) ل فه‌كۆلتیا زانستێن مرۆڤایه‌تى هاته‌ گێران.
لده‌سپیكێ ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ په‌یڤا بخێرهاتنێ و گرنگییا به‌ستنا سێیه‌مین كونفرانسێ ڤه‌كۆلینێن كوردى پێشكێشكر، به‌رێزى د په‌یڤا خۆ دا بخێرهاتنا گشت مێهڤانێن هێژا ژ ناڤخۆ و ده‌رڤه‌یى هه‌رێما كوردستانێ كر، هه‌روه‌ها ب درێژى لدور زمان و كه‌لتورێ كوردى و ڕۆلێ زمانێ د ده‌ستنیشانكرنا جوگرافییا و ئاخا كوردستانێدا په‌یڤى، پاشان باس ل ڕۆلێ زانكۆیێ د وه‌رار و گه‌شه‌پێدانا زانستى و ب خودان ده‌ركه‌ڤت ل كه‌لتور و چاندا كوردیدا كر.
په‌یڤا ئه‌نستتیوتا كوردى ل پاریسێ ژ لایێ به‌رێز دكتۆر (كه‌ندال نه‌زان) هاته‌ خواندن، هه‌ر لده‌ستپێكا گۆتنا خۆ سوپاسیێن تایبه‌ت ئاراسته‌یى سه‌رۆكایه‌تییا زانكۆیا زاخۆ و ڕۆلێ وان د پێشڤه‌برنا ئاستێ زانین و مه‌عریفه‌یێ ب تایبه‌ت ب خودان ده‌ركه‌ڤتن ل زمان و كه‌لتورێ كوردیدا كر. د ئالییه‌كێ دیتر یێ گۆتنێن خۆ دا سه‌رۆكێ ئه‌نستتیوتێ گۆت: ئه‌م دێ ب خۆشحالیڤه‌ سێیه‌مین كونفرانسێ خۆ ل زانكۆیا زاخۆ ب چه‌ندین په‌نه‌ل و سمیناران لدور زمان و ئه‌ده‌بییاتا كوردى گێرن و لدووماهییا كونفرانسى ئه‌م دێ ڕاپۆرته‌ك تایبه‌ت لدور ئه‌نجامێن كونفرانسى دابرێژن و ب ئاوایه‌كێ ژ دلكارانه‌ كار لسه‌ر بكه‌ن.
پاشان ڕێزد دكتۆر (داود ئه‌ترۆشى) نوینه‌رێ وه‌زاره‌تا خواندنا بلند و ڤه‌كۆلینێن زانستى، په‌یڤا وه‌زاره‌تێ پێشكێشكر و بناڤێ وه‌زیرێ خواندنا بلند و ڤه‌كۆلینێن زانستى ده‌ستخۆشیێن بێ هه‌مپا ل ئه‌نستتیوتا كوردى و هه‌ر دوو زانكۆیێن هه‌ڤكار د گێران كونفرانسیدا كر. هه‌روه‌سا ب تێر و ته‌سه‌لى ده‌رباره‌ى پلانا كارى و پرۆگرامێ ژبۆ كونفرانسى هاتییه‌دانان ئاخڤت، نوینه‌رێ وه‌زیرى گۆت: كار و خزمه‌تا ژبۆ زمان و چاندا كوردى دهێته‌كرن، نه‌خشه‌ ڕێگایێ ناسنامه‌یا گه‌لێ مه‌ ده‌ستنیشان دكه‌ت و ب ئه‌ڤێ چه‌ندێ ئه‌م هه‌ڤكار و پشته‌ڤانن.
لدویڤدا په‌نالێن كونفرانسى هاتنه‌ لدارخستن و په‌نه‌لیستێن ئه‌كادیمى سمینارێن خۆ ب ڕه‌نگه‌كێ هه‌ره‌باش پێشكێشكرن، هه‌روه‌سا ده‌رگه‌هێ دانوستاندنێ هاته‌ ڤه‌كرن و ئاماده‌بوویان چه‌ندین پرسیار لدور بابه‌تێن هاتنینه‌ ئازراندن ژ ڤه‌كۆله‌ران كرن، ب ئه‌ڤێ چه‌ندێ هه‌تا ده‌مژمێر (6:00) ئێڤارى په‌نه‌ل و سمینار دگه‌ل دانوستاندنان به‌رده‌وام بوون.
لدوماهییێ، ڕاپۆرتێن كونفرانسى ژلایێ ڕێڤه‌به‌رێن په‌نه‌لان هاتنه‌ خواندن، پاشان باوه‌رنامه‌یێن تایبه‌ت ب پشكدارێن سێیه‌مین كونفرانسێ نێڤده‌وله‌تى و لیژنه‌یا ڕێكخه‌ر هاتنه‌دان.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *