ل ڕۆژا ئێكشه‌مبێ ڕێكه‌ڤتى (27/10/2019) لده‌مژمێر (10:00) سپێدێ، ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و ڕێزدار پرۆفیسۆرێ هاریكار دكتۆر (دیار عه‌بدولكه‌ریم سه‌عید) هاریكارێ سه‌رۆكێ زانكۆیێ بۆ كاروبارێن كارگێرى و دارایى پێشه‌وازییه‌ك گه‌رم ل شاندێ گرۆپێ كۆمخه‌باتا كورمانجییێ یا سه‌ر ب ئه‌نستتیوتا كوردى ل وه‌لاتێ فه‌ره‌نسا ل سه‌رۆكایه‌تییا زانكۆیێ كرن.

لده‌ستپێكێ سه‌رۆكێ زانكۆیێ په‌یڤا بخێرهاتنێ پێشكێشكر و خۆشحالیا خۆ ب سه‌ره‌دانا هه‌ڤالێن گرۆپێ كۆمخه‌باتا كورمانجیێ بۆ زانكۆیا زاخۆ ده‌ربرى، پاشان ب ئاوایه‌كێ تایبه‌ت لدور ڕۆژه‌ڤا ڕۆژهه‌لاتا ناڤه‌راست و پرسگرێكێن زمانێ كوردى و چاوانییا ب خودان ده‌ركه‌ڤتن ل زمان و چاندا كوردى ئاخڤت. د لایه‌كێ دیتر یێ گۆتنێن خۆ دا سه‌رۆكێ زانكۆیێ باس ل قوناغێن گه‌شه‌ و وه‌رارا زمانێ كوردى و خواندنا ب زمانێ دایك كر، هه‌روه‌سا ده‌ستخۆشێن تایبه‌ت ل ئه‌ندامێن گرۆپێ ناڤهاتى ژبه‌ر خه‌بات و ماندیبوونا وان یا به‌رده‌وام كو دبیت نێزیكى (سیهـ و دووسال و نیڤان) كر و كارێ وان ب گرنگ و ب بوها نرخاند.

ژلایێ خۆ ڤه‌ به‌رێز (ڕه‌شو زیلان) ڕێڤه‌به‌رێ گرۆپى گۆت: ئه‌م بناڤێ گرۆپێ كۆمخه‌باتێ و ئه‌نستتیۆتا كوردى ل پاریسێ ڕێز و سوپاسیێن تایبه‌ت ئاراسته‌یى سه‌رۆكایه‌تییا زانكۆیا زاخۆ ژبه‌ر ڕۆل و ماندیبوونا وان یا به‌رده‌وام دگه‌ل مه‌ دا دكه‌ن، ژبه‌ركو هه‌تا ده‌مێ نوكه‌ زانكۆیا زاخۆ سێ جاران مێهڤانداریا گرۆپێ مه‌ كرییه‌ و هه‌ر تشتێ مه‌ ڤییایى ب باشترین شێوه‌ و كوالێتى بۆ مه‌ دابین كرینه‌، له‌وران ئه‌م ئه‌ڤى هه‌لویستێ زانستى و نه‌ته‌وه‌په‌روه‌رى چو جاران ژبیر ناكه‌ن.
لده‌مژمێر (11:00) سپێدێ ل هۆلا (خه‌لیل خه‌یالى) ل فه‌كۆلتییا زانستێن مرۆڤایه‌تى ڕێوره‌سمێن ڤه‌كرنا ڕوینشتێن گرۆپێ كۆمخه‌بابه‌تێ ب په‌یڤێن به‌رێزان پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیێ و به‌رێز پرۆفیسۆر دكتۆر (عه‌بدولوه‌هاب خالد موسا) ماموستایێ پشكا زمانێ كوردى و ئه‌ندامێ گرۆپى، هه‌روه‌ها په‌یڤا به‌رێز (ڕه‌شو زیلا) ڕێڤه‌به‌رێ گرۆپى هاتنه‌ لدارخستن، پاشان سه‌ره‌دانا سه‌نته‌رێ زاخۆ بۆ ڤه‌كۆلینێن كوردى و په‌رتووكخانه‌یا فه‌كۆلتیێ هاته‌كرن.

لدووماهییێ گرنگه‌ بێژین، كو گرۆپێ كۆمخه‌باتا كورمانجیێ دێ جڤینا خۆ یا ژماره‌ (65) ب به‌شدارى و سه‌رپه‌رشتییا زانكۆیا زاخۆ بۆ ماوه‌یێ حه‌فت ڕۆژان و هه‌ر ڕۆژ نێزیكى (7) ده‌مژمێران ل سه‌رۆكایه‌تییا زانكۆیێ گێریت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *