ڕێزدار دكتۆر (سه‌لاحه‌دین محه‌مه‌د) ماموستایێ زانكۆیا زاخۆ ئه‌ڤه بۆ ماوه‌یێ پتر ژ (12) سالانه ب به‌رده‌وامى قوتابییێن ئێكه‌مێن ده‌ڤه‌رێن (ئامێدى و شێلادزێ) لسه‌ر ئه‌رك و داهاتێ خۆ یێ تایبه‌ت ب كۆژمه‌كێ دیاركرییێ پاره‌یى خه‌لات دكه‌ت.
ئه‌ڤ كارێ زانستى و هاندانا قوتابییان ژبۆ بده‌ستڤه‌هینانا نمره و پله‌یێن هه‌ره‌باش د سوشیال مێدیایێدا ده‌نگڤه‌دایه، ماموستایێ زانكۆیا زاخۆ ئه‌ڤ چه‌نده ڕاگه‌هاندییه: ب مه‌ره‌ما پشته‌ڤانیكرنا قوتابیێن كێمده‌رامه‌ت و هه‌ژار ل سینۆرێ قه‌زایا ئامێدیێ هه‌ر ژ سال (2007) هه‌تا ئه‌ڤ ساله ب به‌رده‌وامى ئه‌ز قوتابییێن زیره‌ك و ئێكه‌م ب بڕه‌كێ پاره‌یى كو هه‌ر ئێكێ ب (200$) خه‌لات دكه‌م.
هه‌روه‌سا ماموستایى زێده‌تر گۆت: پێدڤییه هه‌ر كه‌س ب ئه‌رك و به‌رپرسیاریا خۆ ل هه‌مبه‌ر قوتابییێن زیره‌ك و ئه‌كتیڤێن وه‌لاتێ مه ڕاببن و ب هه‌ر ڕه‌نگه‌كێ هه‌بیت هاریكار و پشته‌ڤان بن، ژبه‌ركو ئه‌و هه‌لگرێن مشغه‌لێن ڕۆناهیێ و پاشه‌رۆژا وه‌لاتێ مه نه.
ماموستایى لدور خه‌لاتكرنا ئه‌ڤ ساله یا قوتابییان گۆتییه: هه‌لبه‌ت ئه‌ڤ ساله ژى من نێزیكى (10) قوتابییێن ئێكه‌مێن سینۆرێ په‌روه‌رده‌یا ئامێدیێ ب (2100) دولاران ژ داهاتێ خۆ یێ تایبه‌ت خه‌لاتكرینه و ئه‌ڤ یه‌كه بۆ من جهێ شانازى و سه‌ربلندیێیه و پێدڤییه كارێن وه‌ها ب به‌رده‌وامى بهێنه ئه‌نجامدان.
