دلۆڤان هالۆ – (ڕاهێنەرێ گەشەپێدانا مرۆڤی)
د سەردەمێن کەڤن دا و د ناڤ چینا هەژاران دا گەلەك کویلەیێن ژن و زەڵام هەبوون، وەکو ئامیرەیان ب بهایێن گەلەك کێم د هاتنە کڕین و فرۆتن ژ بۆ مەرەما خزمەتکرنا کەسانێن زەنگین و خودان دەستهەڵات، بێ گۆمان ئەڤ چەندە ژی نە ب حەز و ڕەزامەندیا وان بوو، بەلکو ژ نەچاری و ژ ئەگەرێ هەژاریا خێزانا وان بوو کو ببنە کویلە و کویلایەتیێ بکەن. بێ گۆمان چ تشتان ژ کویلایەتیێ مەزن تر نەشیا تۆخمێ مرۆڤان بگەهینیتە بێ ڕێز ترین ئاست، د دەمەکێ دایە کو مرۆڤ باش ترین و جوان ترین بوونەوەرێ خودایی یە، لەوما کویلایەتی ئەو پەڕێ بێ ڕێزیا مرۆڤان بوو بەرامبەر مڕۆڤ و مرۆڤایەتیێ. لێ ب بوورینا دەمی کویلە و کویلایەتی نەما و ب ئێکجاری بەرەڤ نەمانێ ڤە چوو، ب ڤێ چەندێ ژی مرۆڤی بها و ڕێزگرتنا خۆ یا ڕاستەقینە و مەزن وەرگرت، ژ بەرکو بەرە بەرە مرۆڤ تێگەهشت و زانی کو ژ هەمی بوونەوەرێن خودایی مرۆڤ ب بهاترین بوونەوەرە ل سەر ڕۆیێ عەردی، نابیت وەکو هەر تشتەکێ دی بهێتە کڕین و فرۆتن. لێ یا سەیر ئەوە کو دگەل ڤێ پێشکەڤتن و زانینا ل جیهانێ هەی کو ئەم یێ د چەرخێ (21)ێ دا، جارەکا دی و ب شێوازەکێ جوودا ژ سەردەمێن کەڤن، کویلە و کویلایەتیا مودرێن یا سەر هەلددەت و هندەك کەس ب دەستێ خۆ و ب ڕەزامەندیا خۆ یێ خۆ دکەنە کویلەیێن گەلەك کەسان، بتنێ ژبەرکو پارەیەکێ کێم دکەنە د بەریکێن وان دا، یان ژی چاڤەڕێی هاریکاریەکێ و ب دەستڤەئینانا پۆستەکێ نە ژ وان. ئەڤ جۆرێ کویلایەتیێ بەهرا پتر د تۆڕێن جڤاکی دا دهێتە دیتن، کو دێ بینی هندەك کەسان ب زۆری و ژ بۆ ب دەستڤەئینا تشتەکێ کێم یێ خۆ کریە کویلە، ب شەڤ و ڕۆژان وێنێن بەرپڕسان بەڵاڤ دکەن و خۆ بۆ وان دکەنە هۆزانڤان و ب بەژن و باڵا وان دبێژن و دکەنە فریشتەیێن بێ گوننەهـ. لەوما پێتڤیە ئەڤ کەسە ل خۆ بزڤڕن و پێداچوونەکێ د کەسایەتیا خۆ دا بکەن و بهایێ خۆ وەك مرۆڤ بزانن، ژ لایێ کەسانێن بسپۆر ڤە بهێنە شیرەت کرن کو ئەڤا ئەو دکەن کویلایەتیە نەکو حەز ژێکرن، چونکی ئەگەر حەزژێکرن بیت بۆچی بتنێ وێنێن وان کەسان بەڵاڤ دکەن یێن کو بەرپڕس بن و پلە و پۆست هەبن، ما یا بەرئاقلە حەز ژێکرنا وان بتنێ ژ بۆ بەرپڕسان بیت ؟!