ب داخ و نه‌خۆشییه‌كا مه‌زن وه‌زاره‌تا خواندنا بلند و ڤه‌كۆلینێن زانستى نووچه‌یێ وه‌غه‌ركرنا داویێ یێ ماموستا و زانایێ مه‌زن یێ گه‌لێ مه پرۆفیسۆر دكتۆر (عیزه‌دین مسته‌فا ڕه‌سۆل) ڕادگه‌هینت.
پرۆفیسۆر دكتۆر (عیزه‌دین مسته‌فا ڕه‌سۆل) ئێك بوو ژ ئه‌وان زانستخواز و ماندیبوویان كو خه‌بات و تێكوشینه‌ك مه‌زن و پڕ ب نرخ د بوارێ ڤه‌كۆلین و داهێناناندا كرییه، به‌رهه‌م و ڤه‌كۆلینێن پرۆفیسۆرى دیده‌ڤانیێ لسه‌ر ئه‌ڤێ خه‌باتێ دكه‌ن، ژبه‌ر ئه‌ڤێ چه‌ندێ ژ ده‌ستدانا ماموستایى دێ بوشاییه‌كا مه‌زن د بوارێ ڤه‌كۆلین و نڤێسینێدا ب تایبه‌ت دناڤ زمان و ئه‌ده‌بییاتا كوردیدا په‌یداكه‌ت.
پرۆفیسۆر دكتۆر (عیزه‌دین مسته‌فا ڕه‌سۆل) كه‌سایه‌تییه‌كێ مه‌زن و خه‌زینه‌یه‌كا پڕ ب بوها یا وه‌لاتێ مه بوو، ژبه‌ر ئه‌ڤێ چه‌ندێ ئه‌م ب نرخ و بوهایه‌كێ مه‌زن ل خه‌بات و ماندیبوون و ته‌مه‌نێ پڕ ژ هه‌ول و بزاڤێن زانستى و ئه‌كادیمیێ ماموستایى دنێرین. پرۆفیسۆر ل سالا 1934 ل تاخێ (ده‌رگه‌زێنى) ل باژێرێ سلێمانیێ ژ دایكبوویه، ل سالا 1939 لده‌ڤ بابێ خۆ ل مزگه‌فتا (حاجى مه‌لا ڕه‌سۆلى دێلێژه) وه‌كو گوهدار و پاشان وه‌ك قوتابى ده‌ست ب خواندنێ كرییه.
ل سالا 1951 ل خانه‌یا ماموستایان هاتییه وه‌رگرتن و پشتى بدووماهیك هینانا پشكا زمانى، ل (باكۆ) ل ڕێكه‌ڤتى (24/6/1963) پله‌یا دكتۆرایێ وه‌ردگریت و ل سالا 1979 چوویه باژێرێ (موسكو) ل وه‌لاتێ ڕۆسیا و ل وێرێ درێژیێ ب خواندنا خۆ دده‌ت و پله‌یا پرۆفیسۆریێ وه‌ردگریت، هه‌روه‌سا ل سالا (1992) بوویه ئه‌ندامێ ئێكه‌مین خۆلا په‌رله‌مانێ كوردستانێ. پرۆفیسۆر ئێك بوو ژ دامه‌زرێنه‌رێن ئێكه‌تییا نڤێسه‌رێن كورد كو ژماره‌یا وان (11) كه‌س بوون و ئێكه‌م به‌یاننامه‌یا دامه‌زراندنا ئێكه‌تییا نڤێسه‌ران ب پێنوسێ ماموستایى هاتییه نڤێسین و پاشان بوویه سه‌رۆكێ ئێكه‌تییا نڤێسه‌رێن كورد.
د مێژوویا پڕ ژ نڤێسین و داهێنان و خزمه‌تكرنا ڤه‌كۆلینێن زانستیدا خودانێ (86) به‌رهه‌مێن ب نرخه، ده‌ستپێكا نڤێسینێ ژى ژ ڕۆژنامه‌یا (دیوار) ده‌ستپێكرییه.
ب ئه‌ڤێ بۆیه‌را نه‌خۆش وه‌زاره‌تا خواندنا بلند و ڤه‌كۆلینێن زانستى پرس و ماته‌مینیێ ل سه‌رجه‌م سازییێن وه‌زاره‌تا خواندنا بلند و ڤه‌كۆلینێن زانستى ڕادگه‌هینت و داخوازێ ژ خودایێ مه‌زن دكه‌ین كو سه‌بر و هه‌دارێ ب هه‌مى لایان بده‌ن و ڕۆحا ماموستا و زانایێ گه‌لێ مه ب به‌هه‌شتا به‌رین شاد بكه‌ت.
