ئەگەر چەند سترانان ژبەرکەی و ب بـاشی بێژی و ب ژەنی، ل کەناڵەکێ تێلەفزیوونی یان ڕادیوویەکێ مێهڤان ب بی، یان هندەک کەس، ل ڕۆنشتنەکا تایبەت تە مێهڤان بکەن و سترانان بێژی و ئامیرێ خوە بژەنی یان ل کافتێریایەکێ، شەهیانەکێ یان د هندەک ڕێ و ڕەسمێن دیتردا…هتد.
یان ئەگەر تو چوویە چەند خولێن موزیکێ و تە ب باشی ب دۆماهیک ئینان، یان تو بوویە دەرچوویێ پەیمانگەهەک یان کولیژەکا موزیکێ یان گەر حەژێکەر و پشتەڤانێن تە تو پاڵدای و تە چەند بەرهەم و کلیپ بەرهەمئینان و ل کەناڵێن تێلەفزیوونی یان میدیایێ بگشتی پەخشبوون، یان ئەگەر ل سوشیال مەدیایێ و کەناڵێ تەیێ یوتیووبی گەلەک حەزکری هەبوون دناڤ جوگرافییا تەبخوە دا، یان ئەگەر جەماوەرێ تە وێنە دگەل تە گرتن و پارڤەکرن ئەرێ لڤێرە ڕامان ئەوە تو موزیکژەن و هونەرمەندی و کەسانەک سەرکەفتی یی؟
پرسیار جارێ کیژان جورێ سترانایە تو ژبەردکەی و دژەنی ئەرێ ئاستێ ئەکادیمی یێ ڤان سترانان چەندە؟
ئەرێ کیژان لیژنەیا هونەری یان ئەکادیمییە ل ڕاگەهاندنێ ل کەناڵەکێ تیڤی یان ڕادیوویێ هەتا تە ب هەڵسەنگینن وتە مێهڤان بکەن؟ ئەرێ ئاستێ وان کەسان یێ هونەری چەندە ئەڤێن ل ڕونشتنەکا شەڤێ تو مێهڤانکری؟ ئەرێ ئەو خەلکێ ل شەهیانەکێ بەرهەڤدبن ئاستێ وان یێ ڕوشەنبیرییا موزیکێ چەندە؟ ئەرێ ئەو پەیمانگەهـ و کولیژێن تو لێ دەرچووی ئەگەر لسەر هندەک خاڵێن گرنک بهێنە دەستنیشاکرن تـو بێژی ئەو پەیمانگەهـ و کولیژ د هەڵسەنگاندنا جیهانی دا یێن چەندێ بهێنە هەژمارتن؟ ئەرێ ئەو مامۆستایێن ل خولێن موزیکێ و پەیمانگەهـ و کولیژێ وانە داینەتە، ئاستێ وان یێ درۆستێ هونەری چەندە و چ دایەف تە؟ ئەرێ ئەو جەماوەر و کەسانێن ل سوشیال میدیایێ تە ب بلند دنڕخینن کینە و د چ ئاستدانە؟ چەوا موزیکێ دهەڵسەنگینن؟ئەڤە هەمی ئەو پرسیارانە کو تو بشێی خو ب هەڵسەنگینی؟
خاڵا ژ هەمییان گرنگتر پرسیارێ تو بخوە ل خوە بکە ئەرێ تو د چ ئاستدایی؟ تو چ دزانی تو چەوا دخوە دگەهی داکو خوە بهەڵسەنگینی. لڤێرە ئەگەر ئەم ڤان پرسیاران ئاراستەی خوە بکەین دێ زانین کو بڕاستی ئەم دپاشڤەماینە و ئەمێ ل دەستپێکا لێگەڕیانا خوەدا د بیاڤێ هونەرێ موزیکێ دا. موزیک گەلەک بیاڤان بخوڤە دگریت ئەڤا کو د جوگرافییا هەرێما مەیا کوردستانێ دا دهێتەکرن بڕاستی ۸۰٪ موزیک نینە بتنێ پیاسەیە! ئەگەر ئێک پرسیار ژمن بکەت تو چەوا دشێی ڤێ ڕێژێ لدەف خوە دیاربکەی و ب وێرەکی بێژی، ئەز دێ د چەند خاڵان دا ڤێ چەندێ ڕوهن و بەرجاڤکەم. مە چەند موزیکژەنێن ب ڕاستی لسەر بنیاتەکێ ئەکادیمی هەنە ل هەرێما کوردستانێ کو ب نووتە و سکۆڕ نڤیسین و پڕۆڤەکرن لسەر بنیاتێ هارموونی ئۆرکێستڕا یان ژەنینا بتنێ هەنە؟ دێ بینین کو دبیاڤێ ڕوژئاڤایی دا ژەنیارێن ب تەک هەنە لێ وەک ئورکێستڕا ب ڕەنگەکێ گەلەک کێم، دبیاڤێ ڕۆژهەلاتی دا تەختێ ڕۆژهەلاتی وەک ئۆرکێستڕا هەر نینە، وەک تەک ژی ب تبلێن دەستانن!ئەرێ کیژان گڕوپی یان ژەنیارەکی جارەکا بتنێ د هەرێما کوردستانێ دا خەلاتەک لسەر ئاستێ جیهانی وەرگرتییە؟ لڤێرەژی دێ بینین کو ب تبلێن دەستانن و قەد ناهێتە هزرا من خوە جارەکا بتنێ ژی. ئەرێ مە چەند پەڕتووک و ڤەکۆڵین لسەر بیاڤێ هونەرێ موزیکێ ب گشتی هەنە؟
ل باژاڕەک وەکی دهۆک هەر ب تبلێن دەستان و ل باژاڕێن دیتر پیچەک باشترە لێ نە دئاستێ پێدڤی دانە؟
ئەرێ مە چەند پارچە موزیکێن کوردی بتنێ هەنە ژبۆ هەر بارودوخەکی کو گوهداری بکەین، دیسـان بەرسڤا ڤێ پرسیارێ ژی ب ڕەنگەکێ گەلەک گەلەک کێم. ئەرێ چەند موزیکژەن هەنە ئەم وەک کورد شانازیێ پێ بکەین؟
دێ بینین ئێک دو کەسەکن و زێدەتر ئەڤێن دبیاڤێ موزیکێ دا کاردکەن ب موزیکژەنێن بییانی د داغبارن. ئەرێ مە چەند کەناڵێن تیڤی یان ڕادیوو گرێدای هونەرێ موزیکێ بتنێ هەنە؟ ئەرێ مە چەند گۆڤار گیرێدای هونەرێ موزیکێ هەنە؟
لڤێرە ژی دێ بێژم ب مخابنی ڤه مە تشتەک ژوان نینە! ئەرێ خەلکێ مە بگشتی د چ ئاستدانە د تێگەهێ ڕوشەنبیرییا موزیکێ دا؟ ب مخابنی ڤە دشێم بێژم هەر نینە؟ دیسان گەر کەسەک بهێت بێژیت تو چەوا دشێی بێژی نینە، دیسان دێ دچەند خاڵان دادەمە دیارکرن گەر ئەڤ هەمی تشتێن لسەر من ئاماژە پێداین نەبن.
گەر پێنج ساڵان جارەکێ کونسێڕتەکا موزیکێ چێبیت و خەلک نەچیت، گوهێ وان گرێدای سترانێن بیانی و دەهواتان بیت، گەر هەتا نوکە ناڤێن ئامیرێن موزیکێ نەزانن، گەر چ تشتەکی گرێدای دیرۆکا هونەرێ موزیکێ نەزانن، گەر چار کەساتیێن بناڤ و دەنگێن موزیکێ ناسنەکەن، گەر هەتا نوکە ناڤێ چار پارچێن موزیکێ یێن جیهانی نەزانن، گەر هەتا نوکە خەلک هزربکەت ستران موزیکە و ژ گوهدانا موزیکێ بتنێ حەزنەکەن، گەر دناڤ گەلەکان دا موزیک حەڕام بیت، گەر پەروەردە گرنگیێ ب وانێن موزیکێ نەدەت ل قوتابخانان… لڤێرە بەرسڤا پرسیارا منژی دێ بێژم هەر ب چ ڕەنگان ڕوشەنبیرییا هونەرێ موزیکێ نینە! ئەم مللەتەکین ئەم درەنگ هاتینە دناڤ مەیدانا ڤی هونەریدا و ژ ئەگەرێ نەبوونا گرنگی پێدانێ بڤی هونەری ئەم خەلەت یێ دموزیکێ گەهشتین، لەوران پێدڤییە سەر ژنووی پێنگاڤێن خوە پاڤێژین و خەلەتیێن خوە دروست کەین، تاکە بیاڤێ کو مللەتەک ب خوشی و سەرفەرازی و کەیفخۆش بژیت ب تنێ موزیکە.
ب هیڤیمە ل هەر خارنگەهەک و کافتێریایەکێ… موزیکێن دروست بهێنە هەلبژارتن
ب هیڤیمە هەر کەناڵەک پڕۆگڕامەک بەڕنامەکێ ئێک دەمژمێری حەفتیێ جارەکێ جارەکێ لدوور ڤێ مژارێ نمایش بکەت
بهیڤیمە هەر ڕادیوویەک کەناڵەک گرنگیێ ب موزیکژەن و بەڵاڤکرنا ڕوشەنبیرییا موزیکێ و نمایشکرنا پارچە موزیکان بدەن.
ب هیڤیمە ل قوتابخانان وانا موزیکێ دروست بهێتە خواندن لسەر بنیاتەکێ درۆست
ب هیڤیمە هەر ڕۆژ کونسێڕتەکا موزیکێ ل هەر هوڵەکا باژێڕەکێن کوردستانێ هەبیت
ب هیڤیمە ئێتود و میتودێن دروست ژبۆ کولیژ و پەیمانگەهان بهێنە دانان کو دەرچوویێن باش بدرەکەڤن
بهیڤیمە هەر ڕۆژ بابەتەک ل ڕۆژنامە و گۆڤارێن کوردستانێ بەڵاڤ ببن.
ئەگەر نە…. ئەم چ جار دڤی بیاڤی دا پێشناکەڤین و بتنێ دێ بەرێ مە ل وەڵاتێن بییانی بیت و تشتەک مە نامینیت ب ناڤێ موزیکا کوردی!
