دیدار : جەگەر کەمال رێکانی
وەکو یا خویا راگەهاندن ب دەستهەلاتا چوارێ دهێتە هەژمارتن و خۆدان رۆلەکێ خۆرت و بهێزە ، لەورا بۆ ڤێ جارێ مە ڤیا دیدارەکێ دگەل ئێک ژ رۆژنامەڤانێن گەنج و چالاک و ژێهاتی دا بکەین ئەو ژی رۆژنامەڤانێ گەنج ( رۆژهات لوقمان )ـە
رۆژنامەڤان رۆژهات لوقمان شكر به‌رنیاسە ب رۆژهات لوقمان، ژ دایكبوویێ سالا(1992)ێ یه ، ناڤهاتی ل كومه‌لگه‌ها سیریێ یا سه‌ر ب ناحیا شێلادزێ ل ده‌ڤه‌را نێرۆه رێكان ل سنوورێ قه‌زا ئامێدیێ سه‌ر ب پارێزگه‌ها دهۆكێ ڤه هاتیە سەر دونیایێ . رۆژهات لوقمان دبێژیت : راگه‌هاندن ئێك ژ ته‌وه‌رێن گرنگ بو د زارۆكینیا من دا و د ناخ و بیردانكا من دا خو د هه‌لاڤێت و وه‌كه حه‌زه‌ك بۆ نه‌شیام ل سه‌ر وێ حه‌زێ زال بم تا كو ب هه‌مى ده‌مارو له‌شێ خو ڤه راده‌ستى راگه‌هاندنێ بویم. ناڤهاتی د بەردەوامیا ئاخڤتنا خودا گۆت : راگه‌هاندن پرا سه‌ره‌كى یه دناڤبه‌را خه‌لك و ده‌ستهه‌لاتێ دا و هه‌ر راگه‌هاندنه نوكه دەستهەلاتێ ل جیهانێ دكه‌ت و گه‌هشتیه وى ئاستى نها شوینا چه‌كى ، هه‌ر وه‌لاته‌كێ زلهێز به‌رامبه‌ر وه‌لاتێ دیتر شه‌ر و هزرا راگه‌هاندنێ بكاردئینیت. رۆژهات لوقمانی ل دوور رۆژنامەڤانیا کوردی دا دیارکرن و گۆت : رۆژنامه‌ڤانیا كوردى ب گشتى نۆكه دا به‌ره‌ڤ ئاسته‌كێ بلندڤه چوویه و نۆكه دا راگه‌هاندنا مه ركابه‌ریا راگه‌هاندنا جیهانێ دكه‌ت و شه‌رێ چه‌كدارێن داعش دیده‌ڤانه كۆ ب ده‌هان راگه‌هاندێن جیهانێ چه‌ندین هه‌وال و وێنه و ڤیدیو ژ راگه‌هاندنا مه د ڤه‌گۆهاستن و ئه‌ڤه رامانه كو راگه‌هاندنا مه به‌ره‌ڤ پێشڤه‌چوونێ دچیت لێ نه‌گه‌هشتیه یا پێدڤى و هند راگه‌هاندن هه‌نه هنده‌ك رومالان ئه‌نجام دده‌ن دبینه ئه‌گه‌رێ تێكچوونا ره‌وشا نیشتیمانى و فه‌ره جهێن په‌یوه‌ندیدار پێرابونێن یاسایى ئه‌نجام بده‌ن. رۆژهاتی ل دوور پرسا کا ئایە رۆژنامەڤانێن مە شیاینە پەیاما خو ب درۆستی بگەهینن دبێژت : نه‌خێر، چونكه راگه‌هاندنا مه رێژه‌یه‌كا دیار لبن سیبه‌رێن لایه‌نێن حیزبى كاردكه‌ن و چو رۆژنامه‌ڤان نینن یا پێدڤى بگه‌هینن به‌لكو وێ دگه‌هینن یا كو ده‌زگه‌هى دڤێت. ناڤبری سەبارەت ب ئاستەنگێن دکەڤنە درێکا رۆژنامەڤانان دا خویاکر و گۆت :رۆژنامه‌ڤانێ سه‌ركه‌فتى دشێت ب هه‌ر رێكه‌كا هه‌ى ئاسته‌نگێن رێكا خۆدا ژ خو دویربكه‌ت لێ هند جار هه‌نه ئاسته‌نگ بو رۆژنامه‌ڤانى ب گشتى دروست دبن ده‌مێ هه‌ر كه‌سه‌ك یان لایه‌نه‌ك بێ رێزیه‌ك به‌رامبه‌ر رۆژنامه‌ڤانى ئه‌نجام دده‌ت و ئه‌ڤه ژى د زڤریت كو تا نۆكه وه‌ك پێدڤى یاسایێن كارێ رۆژنامه‌ڤانیێ ژلایێ په‌رله‌مانێ كوردستانێ ڤه نه‌هاتنه راستڤه‌كرن و وه‌ك پێدڤى كار پێ ناهێته‌كرن رۆژهات لوقمان وێ ژی ددەتە دیارکرن و دبێژت : گه‌له‌ك كاودان ب سه‌رمن را ده‌رباز بونه ده‌مێ من كاره‌كێ رۆژنامه‌ڤانى ئه‌نجام دابیت و پشتى راپۆرتا من ئه‌و ئاریشه هاتبیته چاره‌سه‌ركرن و ئه‌ڤ چه‌نده من مه‌زن و دلخۆش دكه‌ت. رۆژهاتی ل داویێ ژی گۆت : دۆماهى په‌یڤ دا دخوازم، هه‌ر كه‌سه‌ك بگه‌هیته وێ باوه‌ریێ كو نۆكه راگه‌هاندن یا دەستهەلاتێ ل هه‌مى جیهانێ دكه‌ت، خه‌لك بزانیت راگه‌هاندن چیه و رێز ل كه‌سێن میدیاكار بهێته گرتن چونكه ئه‌و په‌یاما رۆژنامه‌ڤان دگه‌هینیت 70% به‌رژه‌وه‌ندیا خه‌لكى و رایا گشتى دایه و 30% د به‌رژه‌وه‌ندیا رۆژنامه‌ڤانى دایه وه‌كه لایه‌نێ دارایى.