Skip to content
ل ڕۆژا پێنجشهمبێ ڕێكهڤتى (26/9/2019) لدهمژمێر (10:00) سپێدێ، ڕێزدار پرۆفیسۆرێ هاریكار دكتۆر (لهزگین عهبدى جهمیل) سهرۆكێ زانكۆیا زاخۆ و ئهندامێن بهرێز یێن جڤاتا زانكۆیێ پێشهوازییهك گهرم ل لیژنهیهكا تایبهت یا وهزارهتا خواندنا بلند و ڤهكۆلینێن زانستى یا حكومهتا ئیراقا فیدرال كرن.
لدهستپێكى سهرۆكێ زانكۆیا زاخۆ بناڤێ جڤاتا زانكۆیێ پهیڤهك پێشكێشكر، د پهیڤا خۆ دا بهرێزى خۆشحالیا خۆ ب سهرهدانا لیژنهیێ ژ بۆ زانكۆیێ دهربرى، پاشان ب ئاوایهكێ تایبهت دهربارهیى زانكۆیا زاخۆ ههر ژ دهستپێكا دامهزراندنێ ههتا ڕۆژا ئهڤرۆ كورتییهك پێشكێشكر. ب ئهڤێ چهندێ ئهندامێن لیژنهیێ خۆشحالیا خۆ ب گهشه و وهرارا بهردهوام و كارێن ئهكادیمى و زانستى یێن زانكۆیا زاخۆ دهربرین.
پاشان ل هۆلا (فیدیۆ كونفرانسان) كۆمبوونهك تایبهت هاته ڕێكخستن، د كۆمبوونێدا پرێزێنتهیشنهك ئهكادیمى ژلایێ ڕێزدار پرۆفیسۆر دكتۆر (یاسین تاها مستهفا) هاریكارێ سهرۆكێ زانكۆیێ بۆ كاروبارێن زانستى و خواندنا بلند دهربارهیى (كار و چالاكى، سیستهمێن زانكۆیێ، ستاف، قوتابى، پرۆتوكولێن فهرمى، دهستكهڤت و سهركهڤتن، كۆڤارێن زانكۆیێ، ڤهكۆلینێن ماموستایان، پشكداریا ستافێ زانكۆیێ د كۆنفرانس و چالاكیێن نێڤدهولهتى و ناڤخۆییدا …هتد) هاتهكرن.
لدویڤدا ئهندامێن لیژنهیێ سهرهدانهك بۆ گشت ئاڤاهیێن زانكۆیێ كرن و ژ نێزیك هایدارى ههر تشتێ پێدڤى بوون، ئهندامێن لیژنهیێ ئهڤ یهكه ڕاگههاندن: زانكۆیا زاخۆ گهشه و وهرارارهكا ههرهباش د گشت بیاڤ و سێكتهراندا بخۆ ڤه دیتییه، براستى ئهڤ پێشكهڤتن و دهستكهڤته جهێ ڕێز و دهستخۆشیێنه، ژبهركو زانكۆیا زاخۆ د ماوهیهكێ كێمدا شیایه قوناغێن مهزن دهرباز بكهت و جهێ خۆ دناڤ ڕێزێن زانكۆیێن وهلاتێ ئیراقێ و دهرڤهیى ئیراقێدا بكهت.
لدووماهیێ گرنگه بێژین، كو لیژنهیا تایبهت یا وهزارهتا خواندنا بلند و ڤهكۆلینێن زانستى یا حكومهتا ئیراقێ ب مهرهما دانپێدان و ژ نێزیك ئاگههداربوون ژ ڕهوشا خواندن و پرۆسێسا برێڤهچوونا دهواما فهرمى ل زانكۆیێن (زاخۆ، زانكۆیا كوردستان، ڕاپهرین) سهرهدانا ههرێما كوردستانێ كرینه.
Post Views:
0