خەلەکا دوویێ
رادیۆیەکا رەوشەنبیری گشتی بوو، سەر ب لقێ ١٨ێیێ پارتی دیموکراتی کوردستان ڤە.
ل رێکەفتی ٢٦/٥/٢٠٠٦ێ ئەڤ رادیۆیە پەخشێ خویێ ئاسایی دەست پێدکەت، پشتی کو ل رۆژا نەوروزا ھەمان سال دەستدایە پەخشێ خو وەک تێست.
زمانێ سەرەکی ل رادیۆیێ زمانێ کوردی بوو و دگەل زمانێ کوردی ھندەک پروگرام ب زمانێ سریانی ژی دھاتن پێشکێش کرن.
رادیۆیا دەنگێ کوردستان –ئامێدیێ ل سەر پێلا FM ب فریکانسێت (٨٩.٧ و ٩٦.٩) ل سەرانسەری قەزا ئامێدیێ و پشکەکا ژ دەڤەرا زاخۆ و شنگال و سێمێلێ و دھۆک و مویسل و شێخان و ئاکرێ و ھەولێر و ھەریر و مێرگەسوورێ، ل دەمژمێر ٨ێ سپێدێ تاکو دەمژمێر ٨ێ ئێڤاری دھاتە گوھداریکرن، پاشان ل مەھا ئیلونا ٢٠٠٧ێ دەمێ پەخشێ رادیویێ دھێتە درێژکرن تا کو دەمژمێر ٩ێ شەڤێ، لێ ل دەستپێکێ و دگەل دانانا رادیۆیێ، ئەڤ رادیۆیە ل سەر فریکانسا ٨٨ میگاھێرتز بوو ل سەر پێلا (ئێف ئێم)ێ، و پتریا بابەتێت وان ستران و ئاواز و بۆیەر و نوچە بوون. دگەل پێشکێشکرنا چەند بەرنامێت رەنگا و رەنگ، کو د گرێدایی بوون ب ژیانا خەلکی ڤە.
دلشاد بەرچی رێڤەبەرێ وێ بوو و ژ لایێ نڤیسینگەھا راگەھاندن و رەوشەنبیریا لقێ ١٨ ڤە دھاتە سەرپەرەشتی کرن و ناڤەندا رادیۆیێ ل تاخێ مەیدانێ بوو ل سەنتەرێ قەزا ئامێدیێ.
ئەڤ رادیۆیە ژ پشکێت رەوشەنبیری و تەکنیکی پێک دھات و پشکێت وەک دارایی و رکلام و کارگێری ژی سەر ب ڤان ھەر دوو پشکێت سەرەکی ڤە بوون و د ھەمان دەم دا دوو ستۆدیو ھەبوون، کو ئێک بو بەرنامەیێت ئێکسەر و زندی بوو ویا دیتر ژی کارێت تومارکرنێ د ناڤ دا دھاتنە کرن.
رادیۆیا دەنگێ کوردستان ١٠ بەلاڤوکێت دەنگوباسان رۆژانە ھەبوون، دگەل دوو بەلاڤوکێن وەرزشی و دوو یێت ھونەری و ئابووری، و زێدەباری کو دەمەکێ تایبەت ھەبوو بو زمانێ سریانی، لێ ل دەستپێکا دانانا رادیۆیێ ب تنێ زمانێ سریانی وەک ستران د ناڤا ڤێ رادیۆیێ دا جھ دگرت و پاشان بوونە بەرنامێت تایبەت.
ژ پروگرامێت ڤێ رادیۆیێ یێت رۆژانە و ھەفتیانە کو ژ ٢٠ پروگرامان دەرباس دبن ئەڤەنە: (سترانێت داخازکری، کەلەپورێ کوردی، کاروانێ شەھیدان، ھەلبەستڤانێت کلاسیک، چاندن، سۆر و سۆر، ساخلەمی و جڤاک، چرا، خامەو …).
ژ پێشکێشکارێت بەرنامان ژی ڤان ھەڤالان ئەڤ کارە کریە:. (ئەڤین نەجمەدین، گوھدار زەید، ھێرش تاھر نوری، د.ئاشتی عەبدولھەکیم، د.کامل چەلکی، نیشتمان، ھشیار رێکانی، سەردار ھێتوتی، ئێھسان مەھمود، پیرس ئامێدی و …).
ژ تەکنیکارێت ڤێ رادیۆیێ ژی (ئازاد سامی، سەفەر عەبدولستار، بەسام، ژینێ عەبدولا، لقمان مستەفا) بوون. و کارێ نۆچەسازیێ ژی ژ لایێ (بەرەڤان گوھەرزی) ڤە دھاتنە بەرھەڤکرن.
ئازاد سامی ئێک ژ کەڤنترین تەکنیکارێت ڤێ رادیۆیێیە، کو ل رێکەفتی ١٠/١٠/١٩٩٥ دەستدایە کاری و د ھەمان دەمدا لقمان مستەفا ژی کەڤنترین کارمەندێ ڤێ رادیۆیێیە، کو ل رێکەفتی ١٨/٢/١٩٩٤ ل سەرسنکێ وەک نوچەسازێ کوردی دەستدایە کاری و پاشان بۆیە تەکنیکار و رێڤەبەرێ کارگێری و دارایی د ناڤا رادیۆیێ دا.
ھەروەسا کارێ بێژەریا دەنگوباسان ژی ھەڤال و کارمەندێت فەرمی یێت رادیۆیێ ب ڤی کاری رادبوون، لێ تا کو ب ڤی ناڤی رادیۆیێ دوماھیک دایە کارێ خو نەیا رێپێدای بوو ژ لایێ وزارەتا رەوشەنبیری و لاوانیا ھکومەتا کوردستانێ ڤە.
ژ بلی ڤێ خزمەتا زێدەیا کو رادیۆیا دەنگێ کوردستان -ئامێدیێ پێشکێشی بزاڤا راگەھاندنێ کری، ئەڤ رادیۆیە شیایە پتری ٢٥٠ سترانێت فولکلوری یێت دەنگبێژێت دەڤەرا ئامێدیێ و بگرە کوردستانێ ھەمیێ تومار کرینە و د ناڤا ئەرشیفێ خودا ھەلگرتینە و د ھەمان دەمدا شیایە کو زنجیرەکا دراماییا پێکھاتی ژ ١٥ خەلەکان ل سەر رەوشا ژین و ژیانا کاویس ئاخا بەرھەڤ بکەت.
ھەر چەندە ئەڤ رادیۆیە خو ب درێژەدەرا رادیۆیا دەنگێ خویندکار و لاوان و رادیۆیا دەنگێ کوردستان ل ئامێدیێیا سالا ١٩٩٥ ددانیت، لێ ل رێکەفتی ٢٣/٦/٢٠١٠ێ ب ناڤەکێ دیتر و ل ئاڤاھیەکێ دیتر دەست ددەتە خەباتێ.