جنوب ئیسماعیل

 ستران دبنەرەتا خوەدا ژھندەک پەیڤان پێکدھێت، وئەو پەیڤە دەربرینێ ژھەست وسوزێن ناڤا جڤاکی دکەت وپێڤە دگرێداینە، وئەڤ پەیڤە تێکەل دبیت دگەل موزیکەکێ وپێکڤە پەیڤ وموزیک،دەنگویەکێ سەرەنج راکێش وحەزکەر بو گوھداران پەیدادکەت وکارتێکرنەکی ل دەروون وناڤخویا مروڤان دکەت وگەلەک گوھورینان ل پشت گوھدانێ دھێلیت. سترانا کوردی ھەر ژچەرخێن بوری وتا نوکە چ گوھورینێن وەسا مەزن ب خوڤە نەدیتنە وسترانبێژێ کورد بەردەوام ستران ب بەژن وبال ودێم وبسک وسینگێ ئافرەتێ ڤە گوتینە،وھەروەسا دەربرین ژڤینداری وخیانەت وسەردابرنێ ودەرەوێ وژێکڤەبوونێ ولێک گەھشتنێ کرییە،تا وی رادەی گوھدارێ سترانا کوردی ب شێوەیەکی بێ زار ومەلیل بییە ژڤێ دووبارەبوونێ وبوویە گوھدارەک بیانی وگوھدارییا سترانێ ب زمانێن جیاواز دکەت،ئەڤەژی ژئەگەرێ نە ھەڤرکییا سترانا کوردییە دگەل سترانا بیانی،کو دەمەکە سترانا بیانی بەرەف گەشەپێدانا مروڤیڤە دچیت وپەیڤێن گەشبین وجیاواز وسترانەک جیاواز بو گوھدارێن خوە بەردەست کرینە . ژبلی سترانا نەتەوەی کو رولەکی مەزن دھەبوون وسەرکەفتنێ دا ھەبوویە ژبەرێ وتا نوکە. ل وی دەمێ کو ئەم مژیلی ڤان کێشەییێن کو ژبەری سەدان سالە گرنگی پێ ھاتیە دان و بھزاران ستران لسەر ھاتینە گوتن وبەلاڤکرن!وب دەھان جارە ئەو پەیڤە ھاتینە گوتن،فەرە سترانبێژێ کورد گوھورینێ ب سەردا بینێت وسترانا کوردی بەرەف ئاستەکی دی ببیت وقالبێ سترانێ بگوھوریت ،وەکو کا چاوا جیھان ئەڤرو ب تەمامەتی گرنگی داییە ھزروبیرێن گەنجان وپشتەڤانێ وان بوویە،سترانا کوردی ژی پێدڤییە بەرەف ھزرەکا جیاواز بچیت وخوە ژڤێ دووبارەبوونێ بدەتە پاش وھەروەسا ھەول بدەت ب رێکا سترانێ گرنگیێ ب گەنجان بدەت وھزروبیرێن وان گەشە بکەت. سترانا کوردی پێدڤییە گوھورینێ بسەرخوەدا بینیت وئێدی گرنگیێ بگەشەپێدانا مروڤی وکێشەیێن جڤاکی بدەت وھەولێ بو ھندێ بدەت کو ئاریشەیین ناڤا جڤاکیدا حەل کەت وببیتە سەدەما خەندە وگوھورینا جڤاکی ،چونکی گەنجێ کورد گەلەک گرنگی ب سترانێ داییە وبەردەوام گوھدارەکی ژیر بوویە، ئەڤجا ل شینا ئەم گوھدارێ موزیکەک بیانی وزمانەک وخەلکەک بیانی بن،بلا مە بخوە بەرھەمەک ھەبیت گوھداریێ بکن وھەروەسا تێدا پشتەڤانیێ ل ئەنجامێن باش بکەن وھەول بدەن ئەڤی جڤاکی ژرەخێ ھزریڤە ب گوھورن ب رێکا سترانێ.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *