ڕاپۆرت: دلۆڤان هالۆ

بۆ ئێکەم جار ل سەر ئاستێ (باژێڕێ زاخۆ) پەیمانگەها (وار) یا نە حکومی هاتە ڤەکرن، ل ڕێکەڤتی (2018/11/4)ێ ل دویڤ نڤیسارا وەزارەتا پەروەردێ یا بناڤێ (پشتگیری و ڕێپێدان) یا ژمارە (16615) دەست ب ڕێڤەبرنا کار و بارێن یاسایی یێن پەیمانگەهێ هاتیە کرن، ل ڕێکەڤتی (2019/6/10)ێ دەست ب تۆمار کرنا ناڤێن قوتابیان هاتیە کرن، ل دەستپێکا ساڵا خواندنێ (2020 – 2019)ێ دێ ب شێوەیەکێ فەرمی د ڕێوڕەسمەکێ تایبەت دا هێتە ڤەکرن.

سەروەر مستەفا، ڕێڤەبەرێ پەیمانگەها (وار) یا نە حکومی بۆ مالپەڕێ (خەدەنگ) گوت: ” هزرا دامەزراندنا پەیمانگەها (وار) ژ وێ چەندێ هات، پشتی کو مە زانی ب سەدان قوتابی یێن باژێڕێ زاخۆ قەستا باژێڕێ دهۆکێ دکەن دا کو بەردەوامیێ بدەنە خواندنا خۆ، بێ گۆمان ئەڤ چەندە بۆ قوتابی یێن زاخۆ دبیتە بارگرانیەکا مەزن ژ لایێ دارایی و هاتن و چوونێ ڤە، لەوما مە ب فەر دیت کو ئێکەم پەیمانگەها ب ڤی جۆری ل باژێڕێ زاخۆ بهێتە دامەزراندن، ئارمانج ژ هەلبژارتنا ناڤێ (وار) ژی ئەوە کو ئەڤ پەیمانگەهه ببیتە وارێ هەمی قوتابی یێن باژێڕێ زاخۆ”. زێدەتر ژی گوت: ” ئارمانج ژ ڤەکرنا ڤێ پەیمانگەهێ ئەوە کو ئەم ئاستێ زانستی و هەستێ نەتەوایەتی ل دەڤ قوتابی یێن باژێڕێ زاخۆ زێدەتر لێ بکەین، مە دڤیا پتر خزمەتا وان کەسان بکەین یێن کو ل ساڵێن بووری ژبەر هەر ئەگەرەکێ نە شیاین بەردەوامیێ ب خواندنا خۆ بدەن وەکو (ماموستا، فەرمانبەر، کاسب کار)، کوڕ و کچێن باژێڕێ زاخۆ یێن حەزا بلند کرنا باوەرنامەیێن خۆ هەین، مە دڤێت کادرێن گەنج و خودان شیان و پێگەهشتی د هەمی بواران دا ئامادە بکەین و پێشکێشی حکومەتا هەرێما کوردستانێ بکەین، دا کو پتر بشێن خزمەتا گەل و وەڵاتێ خۆ بکەن، ئەم قوتابی یێن خودان کەسایەتیەکا بهێز و خودان باوەریەکا موکوم ئاڤا بکەین”. گوت ژی: ” مەرجێ سەرەکی یێ وەرگرتنا قوتابیان ژی دڤێت قوتابی دەرچوویێ پۆلا (9)ێ بنەڕەتی بیت، ل دویڤ ڕێنمایێن وەزارەتا پەروەردێ ژیێ مەزن یێن قوتابیان نا بیتە ڕێگر بۆ وەرگرتنێ، هەڤڕکی بۆ وەرگرتنا کورسی یێن خواندنێ بۆ بەشێن (ژمێریاری، زانستێن کۆمپیوتەری) دێ ل سەر نمرێن بابەتێن (ئینگلیزی، زانست، بیرکاری) بن و بەشێ (کارگێری) دێ ل سەر نمرێن بابەتێن (ئینگلیزی، کۆمەڵایەتی، بیرکاری) بن، پتر ژ سەدان قوتابیان ناڤێ خۆ تۆمار کرینە، ڕێژا (60%)ێ ژ ڕەگەزێ نێرن و (40)ێ ژ ڕەگەزێ مێ نە، مەزنترین قوتابی ژی هەتا نوکە ناڤێ وی هاتیە تۆمارکرن ژ دایك بوویێ ساڵا (1980)ێ یە، بچویك ترین قوتابی ژی ژ دایك بوویێ (2004)ێ یە، ژ بۆ هەر ساڵەکا خواندنێ بهایێ وێ (1) ملیۆن و (800) هزار دینارن ل سەر (3)ێ قستان، خواندن ب زمانێ (کوردی، ئینگلیزی) یە، دەواما پەیمانگەهێ ژی سپێدێ یە و دێ هەمی پێکۆڵان کەین کو دەواما ئێڤاریان ژی هەبیت و بۆ هەر دەوامەکێ (6) دەمژمێر بن”. دیار ژی کر: ” ژمارا کورسی یێن خواندنێ بۆ ئەڤ ساڵە ب تەمامی بۆ مە دیار نە بوویە، چونکی دێ لیژنەکا تایبەت ژ وەزارەتا پەروەردێ سەرەدانا پەیمانگەها مە کەت، پاشان دێ ژمارا کورسی یێن خواندنێ دەستنیشان کەن، لێ ل گوڕەیی پێزانینێن مە ژ بۆ هەر پەیمانگەهەکا ژ نوی بهێتە دامەزراندن بۆ هەر بەشەکێ (60) تا (80)ی کورسی یێن خواندنێ تەرخان دکەن، بۆ ساڵێن بهێت ژی هەر دێ ل دویڤ بڕیارا لیژنا تایبەت یا وەزارەتێ ڤە بیت، ل دویڤ ڕێنمایێن وەزارەتا پەروەردێ هەر پەیمانگەهەکا ژ نوی بهێتە دامەزراندن بۆ ساڵا (1)ێ بتنێ (3)ێ بەش بۆ دهێنە تەرخانکرن، بۆ ئەڤ ساڵە مە (3)ێ بەش یێن هەین (زانستێن کۆمپیوتەری، کارگێری، ژمێریاری) ب ئانەهیا خودێ بۆ ساڵێن بهێت دێ پێکۆڵان کەین هندەك بەشێن دی ژی ل پەیمانگەها خۆ زێدە بکەین، وەکو بەشێ (ئینگلیزی) و بەشەك ب (کەرتێ تەندرۆستی)ڤە گرێدایی بیت”.‌ ل دوماهیێ ژی گوت: ” هەر ژ ڕۆژا دەستویردانێ ژ لایێ وەزارەتا پەروەردێ ڤە ستافێ پەیمانگەهێ ب تەمامی یێ بەرهەڤە، ل دویڤ ڕێنمایێن وەزارەتا پەروەردێ دڤێت ستافێ پەیمانگەهێ (80%)ێ ژ وان ماموستا و فەرمانبەران بیت کو یێن نە هاتینە دامەزراندن ل دام و دەزگەهێن حکومی و (20%)ێ ژی دێ ژ یێن دامەزراندی بن، دڤێت ماموستایێن پەیمانگەهێ هەلگرێن باوەرنامەیێن (بەکالۆریوس، ماستەر)ێ بن و وەرگرتنا وان ب شێوێ گرێبەستە، کافیتریا و پەرتوکخانە و نڤیسینگەها کۆپی کرنێ ژی ژ بۆ خزمەتا قوتابیان بەرهەڤن، دێ مە مالپەڕەکێ تایبەت ژی بۆ بزاڤ و چاڵاکی یێن پەیمانگەهێ هەبیت”.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *