نڤیسەر: جبڕان خەلیل جبڕان.

کوردیکرن: ژیوارێ گولفرۆش

ئەم زارۆکێن دلتەنگییێ نە، هوین زارۆکێن کەیف و شادییێ. دلتەنگی ژی سیتاڤا خوداوەندەکییەکێ کو ناچیتە د ناڤ دلێن دڕندەیان دا. ئەم خودانێن دەروونێن تژی خەمین، خەمێن مەزن ژی جهێ وان د دەروونێن بچویک دا ناکەت. ئەم دگرین و زێمارێ دکەین، ئەی ئەوێن دەڤ ب کەنی. ئەوێ ب ڕوندکێن خوە ژی دهێتە شویشتن، هەتا هەتایێ پاقژ و بژوین دمینیت. هوین مە ناس ناکەن، لێ ئەم وە ناس دکەین. هوین ب لەز دمەشن دگەل هەرکینا ژیانێ لەوڕا ژی هوین ل مە نازڤڕن، لێ ئەم ل سەر کناری د ڕاوەستیاینە؛ وە دبینین و ئاگەھ ژ هەوە هەیە. وە ئاگەھ ژ قیڕی و هەوارێن مە نینە، ژ بەر کو قەڕەبالغا ڕۆژان گوهێن وە یێن تژی کرین. لێ مە ئاگەھ ژ سترانێن وە هەیە، ژ بەر کو پێژنا ئێڤارییان گوهێن مە یێن ڤەکرین. ئەم وە دبینین، ژ بەر کو هوین ل بەر ڕوناهییا تاڕی د ڕاوەستیاینە. لێ ئەم وە باش دبینین، ژ بەر کو ئەم ل بەر تاڕیاتییا گەش د ڕوینشتینە. ئەم زارۆکێن دلتەنگییێ نە، ئەم پەیامبەر و هەلبەستڤان و مۆزیکژەنین. و هوین.. هوین زارۆکێن خاڤلەتا کەیف و شاهییێ و هشیارییا مژویلاهییێ نە. هوین دلێن خوە ڕادەستی ڤاڵاهییێ دکەن، ژ بەر کو تبلێن دەستێن ڤاڵاهییێ و دەستکرنا وێ یا نەرم و نازکە. هوین ئارام دبن ل نێزیکی نەزانان، ژ بەر کو خانییێ نەزانان یێ ڤاڵەیە ژ وێ خوەدیکا دێمێ وە یێن ڕاستین نیشان ددەت. ئەم ئاخینکا ڕادهێلین و دگەل ڤان ئاخینکێن مە، پێژنا گولا و مشێنا چەقا و شڕشڕا ئاڤێ بلند دبیت. لێ هوین دگڕنژن و کخکخا کەنییێ وە دگەل دەنگێ هویربوونا کلۆخێ وە و ڕهێن زنجیرا و دەنگێ سۆتنا ئاگری تێکهەل دبیت. ئەم دگرین و ڕوندکێن مە دکەڤن د ناڤ دلێ ژیانێ دا هەر وەکی کا چەوا خوناڤ ژ پشتچاڤێن شەڤێ دکەڤیتە د ناڤ مێلاکا سپێدێ دا. لێ هوین دگڕنژن و ژ ئالییێ ڕویین وە یێن ب گڕنژین یاریپێکرن دڕشیت، هەر وەکی کا چەوا ژەهرا ماری ب برینا کەسێ پێڤەدایی ڤە دڕشیت. ئەم دگرین ژ بەر کو ئەم خەمگینییا بیژنێ و ئازارێن ئێتیمی دبینین. هوین دکەنن ژ بەر کو ژ بلی تەیسینا زێڕی هوین چ تشتێن دیتر نابینن. ئەم دگرین ژ بەر کو مە گوھ ل ئاهێن هەژاری و هەوارێن ستەملێکری هەیە. هوین ژی دکەنن ژ بەر کو ژ دەنگێ لێدانا پێکان زێدەتر وە گوھ ل چ تشتان نینە. ئەم دگرین ژ بەر کو لەش ڕوحا مە ژ خودێ جودا دکەت. هوین ژی دگڕنژن ژ بەر کو لەشێن وە ب ئارامی ب ئاخێ ڤە نسیاینە. ئەم زارۆکێن دلتەنگییێ نە، هوین زارۆکێن کەیف و شادییێ. لێ کا وەرن دا بەرهەمێ دلتەنگییا خوە و کریارێن کەیف و شادییا وە بدانین ل هەمبەری دێمێ تاڤێ. وە هەرەم ئاڤاکرن ژ کلۆخ و هەستییێن بەندەیان، هەرەم ژی نوکە ل سەر خیزی د ڕوینشتی نە و ئەو یێ باسێ نەمرییا مە و ژناڤچوونا وە بۆ نڤشێن نوکە و داهاتی دکەن. و مە زیندانا باستیل هەڕفاند ب زەند و باسکێن مرۆڤێن ئازاد. باستیل پەیڤەکە ل سەر زارێ نەتەوەیان؛ ئەو مە پیرۆز دکەن و نەفرەتا ل هەوە دکەن. هوین یێ ب دویڤ قەحبەخانا کەڤتین.. هندیکە نینۆکێن قەحبەخانانن؛ ب هزاران مرۆڤ یێن دڕاندین. بهزاران جانگۆری یێن ل گۆڕەپانێن ڕۆمی و ئەنتاکیان. ئەم ژی یێن کەڤتیتە دویڤ ئارامییێ. تبلێن ئارامییێ ژی تەڤنێ ئیلیازێ و گەشتا ئەیوبی و تائيا مەزن یێ ڕێسای. هوين یێن ب دویڤ شەهوەتا ڤە دکەنە غار. باهۆزێن شهوەتێ ژی بەرێ هزاران کاروانییان ژ ڕوحێن ژنان یێ دایە دوزەخا شەرمزارییێ و هەتکبەرییێ. لێ مە تنێیاتی یا همبێز کری. و ل بن سیبەرا تنێیاتییێ؛ هەلبەستێن هلاویستی و هاملێت و هەلبەستا دانتی یێن بەرجستە بووین. هوین یێن بووینە پاڵێن تەماهییێ. شیرێن تەماهییێ ژی؛ ب هزاران ڕویبارێن خوینێ یێن تێپەڕاندین. ئەم یێن بووینە هەڤڕییێن خەیالێ. دەستێن خەیالێ ژی زانین یا ژ بازنەیا ڕوناهییا بلند بۆ مە ئینایە خوار. ئەم زارۆکێن دلتەنگییێ نە هوین ژی زارۆکێن کەیف و شادییێ. د ناڤبەرا دلتەنگییا مە و کەیف و شادییا وە دا هندەک ڕێکێن سەخت و دەرازینکێن تەنگ یێن هەین؛ كو هەسپێن وە یێن لەغەرکری نەشێن تێڕا دەرباز ببن. نە ژی دەوارێن وە یێن خەملاندی. دلێ مە بۆ بچویکییا وە دسۆشیت، لێ وە کەرب ژ مەزناهییا مە ڤەدبن. د ناڤبەرا دلپێڤەهییا مە و کەربا هەوە دا، زەمان یێ مایە حەیری کا دێ چ ل مە و هەوە کەت. ئەم ب چاڤێ هەڤالینییێ ل وە دنێرین، لێ هوین وەکی دۆژمنان هێرشێ دکەنە سەر مە. د ناڤبەرا هەڤالینی و دۆژمناتییێ ژی دا؛ مستەکا کویرا تژی ژ ڕوندک و خوینێ یا هەی. ئەم بۆ هەوە کۆچکا ئاڤا دکەین، لێ هوین یێ گۆڕا بۆ مە دکۆلن. د ناڤبەرا جوانییا کەلهێ و تاڕیاتییا گۆڕی ژی دا، مرۆڤایەتی یا ب هندەک پییێن ژ ئاسنی دمەشیت. ئەم یێ ڕێکا وە ب گولا دخەملینین، لێ هوین یێ ڕازانگەها مە تژی ستری دکەن. د ناڤبەرا بەلگێن گولێ و ستریێن وێ دا، ڕاستی یا کەڤتی د خەوەکا کویرا ئەزەلی دا. ئەڤە هەر ژ دەستپێکێ وەرە هوین یێ شەڕێ هێزا مە یا نازک دکەن ب لاوازییا خوە یا ڕەق. هوین دەمژمێرەکێ ب سەر مە دکەڤن، یا دبیتە حیل حیلا وە وەکی بەقا. ئەم ب چەرخان یێن ب سەر هەوە دکەڤین، لێ ئەم دمینینە بێدەنگ وەکی پادیشاهان. ئەم زارۆکێن دلتەنگییێ نە. دلتەنگی ژی ئەو ئەوڕن؛ یێن کۆ خێر و زانینێ ب سەر جیهانێ دا دبارینن. و هوین زارۆکێن کەیف و شادییێ نە. چەند کەیف و شادییا وە بلند ببیت ژی، ئەو وەکی ستوینێن دویکێلی یە؛ کو با وێران دکەت و توخم پرت و بەڵاڤە دکەن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *