دیدار: دلۆڤان هالۆ
نڤیسەرێ مێژوویا باژێڕێ زاخۆ (سەعید ڕەزڤان زاخۆیی)، ژ بنەماڵەكا كەڤن و بناڤ و دەنگە ل باژێڕێ زاخۆ، دەرچوویێ خۆلا پەروەردا (موصل)ە، پشتى (۲٨) ساڵان ژ خزمەتا ماموستايەتیێ هاتيە خانەنشين كرن، گەلەك گۆتار ل ڕۆژنامە و گۆڤاران بەڵاڤ کرینە، بەردەوام بەڕنامەيێن ڕاديۆیێ ل دوور مێژوو و کەلەپوورێ زاخۆ پێشکێش کرینە، ئەندامێ ئێكەتيا نڤيسەرێن كورد – تايێ دهۆکێ یە، ل ساڵا (۲۰۰٥)ێ ب هاريكاريا چەندین هەڤالان ڕێكخراوەكا جڤاکێ سڤیل بناڤێ (ڕێكخراوا فەرەشين) يا پاراستنا ژینگەهێ ل زاخۆ دامەزراندی یە. (سەعید ڕەزڤان زاخۆیى) نڤیسەرێ مێژوویا (باژێڕێ زاخۆ) بۆ مالپەرێ (خەدەنگ) گوت: ” من بەهرا پتریا دەمێ خۆ ژ بۆ دویڤچوون و نيشاندان و ڤەكۆلينان ل دوور مێژوویا (باژێڕێ زاخۆ) تەرخان کریە، هەتا نوکە من (۳)ێ پەرتوك ل دوور مێژوویا باژێڕێ زاخۆ چاپ کرینە کو هەر دوو پەرتوکێن {زاخۆ وێنە و مێژوو، زاخۆ کەلەپوور و ئەڤسانە و پێزانین (۱۹۰۰-۱۹٦۱)ێ} ب زمانێ کوردى و عەرەبى هاتینە چاپ کرن، و پەرتوکا سيێ ب زمانێ عەرەبی (زاخو الماضي والحاضر) هاتیە چاپ کرن”.
نڤیسەرێ ناڤهاتی، زێدەتر ژی گوت: ” ژ بلی چاپ کرنا پەرتوکێن مێژوویا باژێڕێ زاخۆ، من چەندین پەرتوکێن دی یێن ئەدەبی ژی ب زمانێ کوردی و عەرەبی چاپ کرینە، وەکو پەرتوکێن (ڕۆمانا خێڤزانك، ڕۆمانا پەری خان، چیرۆکا ئاخینك، چیرۆکا خەون، چیرۆکا میرێ میران) کو ب زمانێ کوردی هاتینە چاپ کرن، پەرتوکێن ئەدەبی یێن کو ب زمانێ عەرەبی هاتینە چاپ کرن (رواية الحلم، قصة الآهات، قصة الغجرية العاشقة، قصة المحاكمة العادلة)”.
ل دوماهیێ ژی گوت: ” پەرتوكەكا من یا نوی ل ژێر چاپێ یە ب ناڤێ (خابیر ژین و ژیان)، و ئەڤە بۆ ماوێ (۲) ساڵانە ئەز مژویلى نڤیسینا پەرتوکەکێ مە ل دوور (مێژوویا جوهى یێن زاخۆ) ئەڤ پەرتوکە ژ قوناغا وەرگرتنا ژێدەران ب دوماهیك هاتیە و نوکە د قۆناغا چاڤپێکەڤتنان دایە دگەل دانعەمران، ل دەمەکێ نێزیك دێ هێتە چاپ کرن و کەڤیتە بەر دەستێ خواندەڤانان”.
