ڕاپۆرت: دلوڤان هالۆ

 

ل پارێزگەها دهۆکێ د ماوێ (6) هەیڤان دا، (14) کەسان د ڕۆیدانێن سۆتن و خەندقینێ دا گیانێ خۆ ژ دەست داینە.

بەرپڕسێ ڕاگەهاندنا ڕێڤەبەریا بەڕەڤانیا باژێڕی ل دهۆکێ، دیار کر کو د ماوێ (6) هەیڤێن بووری یێن ئەڤ ساڵە دا ل سەرانسەری پارێزگەها دهۆکێ (1600) ڕۆیدانێن سۆتنێ پەیدابووینە و (7) ڕۆیدانێن خەندقینێ، کو د ڤان ڕۆیدانان دا (14) کەسان گیانێ خۆ ژ دەست داینە و (12) کەس بریندار بووینە و (7) کەس ژ خەندقینێ هاتینە قورتال کرن.

(بێوار عەبدولعەزیز) بەرپڕسێ ڕاگەهاندنا ڕێڤەبەریا بەڕەڤانیا باژێڕی ل دهۆکێ، بۆ مالپەڕێ (خەدەنگ) ڕاگەهاند: ” د ماوێ (6) هەیڤێن بووری یێن ئەڤ ساڵە دا ل سەرانسەری پارێزگەها دهۆکێ (1600) ڕۆیدانێن سۆتنێ پەیدابووینە و (7) ڕۆیدانێن خەندقینێ، بەهرا پتر یا ڕۆیدانێن سۆتنێ یێن پیش و پەلەخی بوون کو (140) دونەمێن گەنمی و (140) دونەمێن جەهی هاتینە سۆتن، ڤان ڕۆیدانێن سۆتنێ زیانێن گیانی و ماددی یێن مەزن ب دویڤ خۆ ڕا هێلاینە، کو زیانێن گیانی (7) کەسان گیانێ خۆ ژ دەست داینە و (12) کەس بریندار بووینە، زیانێن ماددی ژی کۆژمێ (3)ێ ملیار و (66665) ملیۆن دینار بوون”. زێدەتر ژی گوت: ” د ڕۆیدانێن خەندقینێ دا ل سەرانسەری پارێزگەها دهۆکێ (7) کەسان گیانێ خۆ ژ دەست داینە، کو تەرمێ (4) کەسان هاتیە دیتن و تەرمێ (3)ێ کەسان ژی هێشتا نە هاتیە دیتن، هەروەسان (7) کەس ژ ڕۆیدانێن خەندقینێ هاتینە قورتال کرن کو (5) کەس ژ لایێ تیمێن مە یێن نقومڤانان ڤە هاتینە قورتال کرن، (2) کەس ژی ژ لایێ هاوڵاتیان ڤە هاتینە قورتال کرن”.

دیار ژی کر: ” د ئێك ژ وان ڕۆیدانێن خەندقینێ دا ل قەزا زاخۆ (4) کەس ژ خێزانەکێ بوون کو گیانێ خۆ ژ دەست داین، ئەو هەر (3)ێ کەسێن گیانێ خۆ ژ دەست داین و تەرمێ وان نە هاتیە دیتن، ئێك ژ وان گەنجەکێ خەلکێ زاخۆ یە کو ئەڤە (20) ڕۆژە تەرمێ وی نە هاتیە دیتن، ئێكە دی ژ وان کچەکا خەلکێ زاخۆ یە کو وێ خۆ هاڤێتیە د خابیرێ زاخۆ دا کو ئەڤە (2) هەیڤە تەرمێ وێ نە هاتیە دیتن، یا دی ژی کچەکا خەلکێ دێرەلوکێ یە کو ئەڤە هەیڤەك و (10) ڕۆژە تەرمێ وێ نە هاتیە دیتن”. گوت ژی: ” ڕۆیدانێن سۆتنێ ژ ڤان ئەگەران بوون وەکو (شۆرتێن کارەبێ ب دەستی، یاریێن ئاگری یێن زاڕۆکان، هاڤێتنا گولەیێن تڤەنگان دناڤ پیش و پەلەخی دا)، ڕۆیدانێن خەندقینێ ژی ژ ڤان ئەگەران بوون (نەزانینا مەلەڤانیان، نە شارەزاییا هاوڵاتیان ل سەر وێ ئاڤا ئەو قەست دکەنێ، نزم نەبوونا ئاستێ ئاڤێ، هەبوونا زڤڕۆكان د ئاڤێ دا، کەسانێن مەزن و مەلەڤان ل پێش چاڤێن زاڕۆکێن خۆ مەلەڤانیان دکەن، کو دبیتە ئەگەرێ وێ چەندێ کو زاڕۆکێن وان ژی چاڤ لێ بکەن و خۆ ب هاڤێژنە د ئاڤێ دا و ببیتە ئەگەرێ خەندقینێ)”.

    

ل دوماهیێ ژی گوت: ” وەکو يا ديار ئەڤ ساڵە بەفر و بارانەکا زۆر هاتیە و ئاستێ ڕۆيبارى نە هاتيە خار و گەلەك يا تەزيە، ل دەمێ هاوڵاتی قەستا جهێن گەشتيارى یێن نێزيكی ڕۆیباری دکەن، دڤێت چاڤدێريا زاڕۆكێن خۆ بكەن و بلا ئێلەكێ خۆ هاڤێتنا ئاڤێ ل بەر خۆ بكەن و نە چنە جهێن نە بەرنياس و مەترسى، ئاڤ يا تەزیە و ماسولكێن مرۆڤی د تەزينیت و دەستان دڕاوەستینیت ژ بەر ڤێ چەندێ نا چێبیت پيڤانا درێژ د ڕۆیباری دا بکەن، خۆ و زاڕۆك و هەڤالێن خۆ ژ پێلێن ئاڤێ و جهێن مەترسی دوير بێخن، ڕۆيبار کەسێن مەلەڤان و نە مەلەڤان نا نیاسیت چونکی مرۆڤى هێزەك یا هەی زێدەتر بكار بينیت ئەگەر چەند یێ مەلەڤان ژی بیت دێ خەندقینیت، هيڤيدارين ژ گەشتيارێن ناڤخۆیی و بيانى ل جهێن ڤەدەر و مەترسى مەلەڤانیان نە کەن داکو گەشتا وان نە بیتە نەخۆشی”.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *