دلۆڤان هالۆ: ڕاهێنەرێ گەشەپێدانا مرۆڤی

سنێلەیی هەستیار ترین قۆناغا ژیێ مرۆڤی یە، دڤێ قوناغێ دا سنێلە توشی گەلەك ئاریشە و گرفتان دبیت، هەروەسان توشی نەخۆشی یێن دەروونی ژی دبیت هەتا کو ب سڵامەتی ژ ڤێ قۆناغێ دەرباز دبیت، سنێلە گەلەك ڕەفتاران دکەت کو دبیتە جهێ دل ئێشانا دەوروبەران، ئەڤە ژی ژ ئەگەرێ وێ چەندێ یە کو بەردەوام گوهۆرینێن هزری و بایلۆژی ب سەردا دهێن و نەشێت خۆ دگەل ڤان گوهۆرینان بگونجینیت و کۆنتڕۆلێ ل سەر هەست و سۆزێن خۆ بکەت، بەلکو هەر تشتەکێ بڤێت دێ ئەنجام دەت بیێ کو بزانیت خەلەتیە یان نە، هەروەسان دێ تێکەلیا هندەك هەڤالێن خراب کەت و هەر کریارەکا باش یان خراب ل دەڤ وان ڤە ببینیت، ئەو ژی دێ ب شێوەیەکێ سرۆشتی ئەنجام دەت بێ هزر کرن و زانینا ئەنجامێن دوماهیێ. لەوما ل سەر دایك و بابان پێتڤی یە چاڤدێریەکا باش و بەردەوام ل سەر سنێلەیێن خۆ بکەن، ئاگەهداری هەمی کار و کریارێن وی بن بێی کو ئەو پێ بزانیت، چونکی ئەگەر ئەو پێ بزانیت دێ هزر کەت دایك و بابێن وی شەڤ و ڕۆژان وەکو زێرەڤانان یێ ب دویڤ وی ڤە، پێتڤی یە هوین نەهێلن تێکەلیا هەڤالێن خراب بکەت و هەتا درەنگی شەڤ ل دەرڤەی ماڵ بیت، پێکوڵان بکەن خۆ دگەل دا بکەنە هەڤال و هەر پسیارەکا ژ هەوە بکەت ب دورستی بەرسڤێ ل سەر بدەن. بلا چ جاران هەستێ وی نەهێتە بریندارکرن ب تایبەت ل دەڤ مێهڤانان و کەسێن بیانی، چونکی دێ هەست ب کێماسیێ کەت و نە دویرە ل دوماهیێ توشی نەخوشی یێن دەروونی ببیت ب تایبەت نەخۆشیا خەموکیێ، هەر داخوازیەکا ژ هەوە بکەت ل گۆڕ شیانێن خۆ بۆ دابین بکەن، ڕێکێ بدەنێ وی ژی بۆچوونا خۆ یا تایبەت هەبیت ب تایبەتی ل سەر کڕینا کەل و پەلێن ناڤ مالێ و هەلبژارتن و چوونا جهەکێ گەشت و گوزاری و…هتد. هندەك جاران سەرەدانا قوتابخانا وی بکەن، داکو هوین بزانن ئاستێ وی یێ زانستی چاوایە، فێری خواندنا دەرەکی بکەن وەکو خواندنا (ڕۆژنامە و گۆڤار و پەرتوكان) داکو ئاستێ وی یێ زانستی بەرزتر لێ بهێت و ببیتە کەسەکێ ڕەوشەنبیر و تێگەهشتی، ئەگەر ئەڤ چەندە هەمی دگەل سنێلەیی هاتە کرن، بێ گۆمان دێ ئەڤ سنێلە ب شێوەیەکێ ساخلەم ژ ڤێ قۆناغێ دەرباز بیت و ل پاشەڕۆژێ دێ بیتە خودان کەسایەتیەکا ب هێز و کاریگەر د ناڤ جڤاکی دا.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *