پیربال ژ میزتنا ب دادگەهێ ڤە بەر ب سۆتنا پەرتووکخانەیێ

سۆتنا (ماڵی وەفایی) ژ ئالییێ نڤیسکارێ ھێژا (د. فەرھاد پیربال) ڤە، بوویەرەک بوو بەری ببپەقیت گەلەک فاکتەر و سەدەمێن خوە ھەبوون، لێ ئەڤا مە دیتی ب تەنێ ئاشکەرابوونا روویێ وێ کێشەیێ بوو، وەکی یا ئاشکەرا راستی یا رێژەیی یە و ئەم نەشێین ب دیتنا ڤیدیۆ و لێدوانێن ھەردو ئالییان ب راستییا بابەتی بگەھین، لێ تشتێ وەکی چاڤێ رۆژێ رۆھن و دیار، فەرھادێ نڤیسکار نھا د رەوشەکا نالەبار دا دەرباز دبیت، بارێ وی یێ دەروونی و خێزانی و جڤاکی نەئارامە، لێ یا برینا وی کوورتر لێ دکەت ئیستیغلالکرنا ناڤێ مەزنێ پیربالییە ژ ئالیێ راگەھاندن و چاپەمەنییا جەماوەرخواز ڤە، فەرھاد یێ دھێتە بکارئینان بۆ ڤیۆ و لایک و کۆمێنتان، فرچەیێ کەڤالێن فەرھادی ژ دەستان ئینا دەر و بزۆتەکێ ئاگری د دەستان دا کر، شعر و گۆتارێن وی بوونە بەر و ب پەرتووکخانەیێن پایتەختی کەفتن، رۆمان و ڤەکۆلینێن وی یێن پر مەعرەیفە و جوانی و زانست و فانتازیا بوونە ژان و بێھیڤیبوون، ئەو بەر ب مەلا و دەزگاھـان بر و نقۆمی بەڕەلایی و وەھم و خورافاتان کر، نەدبوو فەرھاد ب سۆتنا پەرتووکان بەرگرییێ ژ ماف و پەرتووکێن خوە بکەت، لێ ب گۆتنا وی «بەرھەم و کتێبێن وی بێی وی ھاتینە چاپکرن و مافێن وی ھاتییە خوارن»، ئەرێ (کۆپی رایت) ل ھەمی جیھانێ ھێلا سۆرە، سەندیکا و ئێکەتیێن نڤیسەران ل ھەر جھەکی شەری بۆ داھێنەران دکەن، ب تنێ یێن مە ب رێیا سۆشیال میدیایێ ڤیدیۆیێن کارەساتان دبینن و ب د بەر را دکەنن، یا پێدڤی ئەو بوو پیربالی ب رێییەکا شارستانیتر کێشەیا خوە چارە کربا، فەرھاد جار ب دادگەھان ڤە دمیزیت، جار پەرتووکخانەیان دسۆژیت، جار راگەھاندنێ دھەژینیت، جار ب رەخ مەلایەکی ڤە د سوجدێ دا دمینیت، کۆ رەوشا فەرھادی ئەڤ بیت، چما خوەدیێ مالا وەفایی وەسا بێ منەت دبێژیت ھەرە سکالایێ تۆمار بکە؟! مانە فەرھاد ژی دشێت بێژیتێ ھەرە وێ میزا من ب دادگەھێ دا کری بینە و ئاگرێ خوە پێ بڤەمرینە! ئەز نە د گەل سۆتنا چ پەرتووکخانە و دەزگەھێن رەوشەنبیری مە، لێ بەری وێ یەکێ ب توندی خوارنا مافێن داھێنەران، بەرھەمێن نڤیسکار و ھونەرمەندان پرۆتەستۆ دکەم، تەکەز دکەم گەرەکە حکومەت و دەستھەلات سنۆرەکی بۆ ڤان جۆرە کێشەیان ببینیت، گەر وەسا نەکەت، کۆپی رایت دێ ھەر ھێنە خوارن و ھندی وێڤەترە فەرھاد پتر و ئاگرێ ل بن کتێبان خوەشترە.