Skip to content
ل ڕۆژا سێشه‌مبێ ڕێكه‌ڤتى (2/7/2019) شانده‌كێ بلند ژ زانكۆیا زاخۆ ب سه‌رۆكایه‌تییا ڕێزدار پرۆفیسۆرێ هاریكاریكار دكتۆر (دیار عه‌بدولكه‌ریم سعید) هاریكارێ سه‌رۆكێ زانكۆیا زاخۆ بۆ كاروبارێن كارگێرى و دارایى و ب نوینه‌رایه‌تییا سه‌رۆكێ زانكۆیا زاخۆ پشكدارى د كۆنفرانسێ (ناڤدارێن كورد) ل زانكۆیا كوردستان ل باژێرێ (سنه) ل ڕۆژهه‌لاتێ كوردستانێدا كرن. د كۆنفرانسێ ناڤهاتیدا هژماره‌یه‌كا به‌رچاڤ ژ ڤه‌كۆله‌ر و ئه‌كادیمییێن كورد و بیانى ژ زانكۆیێن جوداجودا به‌شداربوون، هه‌روه‌سا زانكۆیا زاخۆ تاكه زانكۆ بۆ ژ هه‌رێما كوردستانێ كو ڤه‌خواندیا فه‌رمى یا لیژنه‌یا كۆنفرانسى بوو.
هه‌ژییه بێژین، كو چه‌ندین په‌نه‌ل و دیدارێن ئه‌كادیمى د ماوه‌یێ دوو ڕۆژێن كۆنفرانسیدا ده‌رباره‌ى زمان و ئه‌ده‌بییاتا كوردى و مێژوویا كوردان ژلایێ پسپۆر و ڤه‌كۆله‌ران هاتنه پێشكێشكرن و ڕێز ل چه‌ندین كه‌سایه‌تیێن كورد هاته‌گرتن. هه‌ر د سه‌ره‌دانا خۆ دا شاندێ زانكۆیا زاخۆ گه‌شته‌ك بۆ باژێرێ مهابادێ و مه‌زارگه‌هێ (پێشه‌وا قازى محه‌مه‌د) و نڤێسه‌ر و هه‌لبه‌ستڤانێن كورد (هه‌ژار موكریانى و هێمن)ى ئه‌نجامدان.
گرنگه بێژین، كو شاندێ زانكۆیا زاخۆ ژ به‌رێزان پرۆفیسۆرێ هاریكار دكتۆر (دیار عه‌بدولكه‌ریم سه‌عید) هاریكارێ سه‌رۆكێ زانكۆیێ بۆ كاروبارێن كارگێرى و دارایى و دكتۆر (ئۆسمان عه‌بدولكه‌ریم سه‌عید) ڕاگرێ كۆلیژا په‌روه‌رده و بنیاد و پرۆفیسۆر دكتۆر (هۆگر تاهر ته‌وفیق) ڕاگرێ فه‌كۆلتیا زانستێن مرۆڤایه‌تى و به‌رێز دكتۆر (نزار ئه‌یوب) سه‌رۆكێ پشكا مێژوویێ پێكدهاتن.
Post Views:
0