ڕه‌مه‌زان نه‌سره‌دین كێڤلى

ڕه‌مه‌زان نه‌سره‌دین كێڤلى

بەرى نوکە د چەندین هەلکەفتان دا ب گوتن یان نڤێسین من ئەڤ بابەتە باس کریە بەلێ دیارە دابەشبوونا کەسایەتیا رەوشەنبیرێ کورد ب تایبەت ل دەڤەرا مە بەردەوام یا توشى هندەک پرسگرێکان دبیت و ئەڤ پرسگرێگە کاریگەریەکا زور یا نەرێنى ل سەر پروژێ رەوشەنبیرى و هزرى دکەت، چونکە رەوشەنبیر دەمێ خودان پروژەک بیت و دهەمان دەم دا خودان هەلویست بیت و یێ ئامادە بیت قوربانیێ پێناڤ پروژێ خو بدەت وى دەمى کاریگەریا رەوشەنبیرى دێ ل ئاستەکێ گەلەک باش و ئەرێنى دا بیت، گەلەک ژمە ئەو پرسیارە هەیە (بوچى گوتارا رەوشەنبیرى کاریگەریا خو نینە؟)، دبیت بەشەک ژ بەرسڤا ئەڤێ پرسیارێ ئەوە چونکە رەوشەنبیرێ مە نەیێ سەر راستە ل سەر پروژە و هزر و میتودێن خو یێن ژیانێ بەلکو بەردەوام وەکو وەرزێن سالێ دهێتە گهورین و ئەڤ گهورینە ژى نەرێنى یە ئانکو ژ دەرڤەى وى هندەک هوکار یان پرس هەنە کەسایەتیا وى یا راستەقینە دیاردکەن و هەردەما رەوشەنبیر دبیت بەرژەوەندا وى ل کوژیەکى ژ کوژیێن ژیانێ تێک دچت و کەسایەتیا یا وى خوسەر دیار دبیت و ئەو ماسکێن ب ناڤێن جودا جودا ل بەر خو کرین دهاڤێژیت، ل دەمێ بورى دا ل سەر زور پرسان گوتارا رەوشەنبیرى د نزمترین ئاستێ خودا بویە و مە جوداهى دناڤبەرا گوتنێن کرێت و نەجوان دگەل رەخنێ و پرسیارکرنێ نە کرینە و مە نەشیایە بێژینە رەشى رەش و بێژینە سپى سپى بەلکو مە تێکەلى هەڤ کرینە و رەنگەک دایە ژیاننامە و مەناعا جڤاکى و لاواز کریە و هەر تشت و دیاردێن ژ خەلکێ دى بومە دهێت بێ شروڤەکرن و هەلسەنگاندن ئەم وەردگرن.
ل سەر (٣) ئاستان دێ ئاماژێ دەمە دوو کەسایەتیێن مروڤێ رەوشەنبیر نەخاسمە د دەمێ بویەران یان هەلکەفتان دا ژوانا:
رەوشەنبیرێ کورد ب تەواوى ژ بازنێ خو یێ رەوشەنبیرى دەردکەڤیت دەمێ پرسەکا گرێدایى عەشیرەتا وى بیت و هەمى ئەو پرەنسیپێن مەدەنى و دیموکراسى ئەوێن بەرى نوکە ادعا‌و پێ دکر پشت گوهـ دهاڤێژیت، ئەوژى دبیتە بەشەک ژ زەلامێن عەشیرەتێ هەتا یێ ئامادەیە چەکى ژى ل جهێ یاسایێ هەلبگریت و کەسایەتیا خو یا مقنع ژ دەست ددەت و ل روژێن بورى چەند بویەر بومە ئاشکەرا بوینە ئەگەر مە خاندنەک هویر بو هەبیت ئەم دێ گەهینە وێ باوەریێ کو ب راستى مە دوو کەسایەتیێن رەوشەنبیرى هەنە.
(پرسێن ئایینى) ل ڤێرە زور بابەت دهێنە تێکەل کرن هەردەما رکابەرى یا دینى دروست دبیت ئوتوماتیکى کاریگەر پەیاما دینى ل سەر مە دیار دبیت و ئەم ژى دگەل جڤاکى خو دگهورین بەلکو مە نەشیایە جڤاکى وەکو خو ل گور وان پرەسیپ و بیرورایێن ئازاد ب گهورین، زوربەى رەوشەنبیران دژى هندەک هزر و بوچونێن ئاینى نە بەلێ دەمێ ژ دەرڤەیى وان خەلکەکێ دى ئەڤان پرسان د ئازرینیت کەسایەتیا رەوشەنبیرى دهێتە ئاستەکێ نزم و دبیتە دیڤەلانکێ وێ پەیاما ئاینى ئەوا کو خەلکێ سادە پیڤە هاتیە گرێدان و هەمى پرسیارێن خو یێن بەرى نوکە دکەتە قوربانى رازى کرنا رایا گشتى.
(پرسێن سیاسى)، مەزنترین ئاریشە و دەردەسەریا مە ل ڤێرە دیار دبیت بیرورایێن حزبى یێن توند و ناکوکیێن سیاسى و جیاوازیا ئایدولوژى نەبویە خالا ل هەڤ کومکرنا رەوشەنبیران بەلکو ئەوژى وەکو حزبیێن سادە هزردکەن و رەفتارێ د هەلویستێن سیاسى دا دکەن و ژ بازنێ هزرى دەربازى بازنێ دوژمنکاریا سیاسى دبن و جیاوازیا (الحق و الباگل) ناکەن چ (حق) ل دەف حزبا وى بیت یان (باگل) د هەردوو حالەتان دا دڤێت کەسێ رەوشەنبیر یێ راستگو بیت و ئەو ب چاڤێ سەرێ خو بویەران شروڤە بکەت نەک ژلایێ کەسەکێ حزبى ڤە بهێتە ئاراستەکرن و رەوشەنبیر ب تەمام ببیتە کوێلێ حزبا سیاسى، وى دەمى نە وى پێگەهـ دناف خەلکى دا دمینیت و نە دناف حزبا خو دا چونکە بویە رویموت کونترول د دەستێ کەسانێن خوپەرست (انتهازى) دا.
لدوماهیکا ئەڤێ گوتارێ دبێژم ئەوا مە ئاماژە پێ کرى چەند سەرقەلەمەکن ل دور (دووریاتیا رەوشەنبیرى) و بابەتێ مەژى رێژەیە بەلکو دبیت مە هندەک کەس وەکو تاک هەبن شیابن کەسایەتیا خو یا رەوشەنبیرى دناف حزب و جڤاکى دا ب پارێزن بەلێ ب تبلێن دەستان ئەو کەس دهێنە هژمارتن و دووریاتیى بویە ئێشەکا ڤەگر و دەرمانێ وان بتنێ ئەوە خو ئازاد بکەن ژوان ماسکێن ل بەرخو کرین.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *