نڤێسین: سه‌ركه‌وت سه‌وادى ـ جوان عزه‌ت

پرسیار: ئه‌و پێناسا من دكه‌ته‌ (من بخۆ) چیه‌؟
ئه‌گه‌ر تو شیایى لسه‌ر پێت خۆ راوه‌ستى و مژیلى هزر و فه‌لسه‌فكاریێ ببى، هینگێ دناڤ هه‌ر ئایدۆلوژیایه‌كێ دێ بیه‌ چه‌قه‌كێ چاندى و دێ شێ بانگه‌شا (خۆبوونێ) كه‌یى. ئانكو هه‌ر ده‌مه‌كێ ئه‌م بووینه‌ خودان ل (خۆ) و ب ئه‌زه‌كێ هزركه‌ر، وى ده‌مى هیچ جاره‌كێ د كه‌فتنا ئایدۆلۆژى یان مرنا كه‌سێن كاریزمایى دا دوودل نابین، بۆ نموونه‌، وه‌كى مرنا ( سوكرات، هایدگه‌ر، كانت، كامو و…هتد یان ئه‌و كه‌سێن د ژیانا مه‌ دا گرنگ)چونكو وى ده‌مى مرۆڤ ب پله‌یه‌كێ گه‌هشتیه‌ كو دشێت ب ده‌نگه‌كێ زه‌لال هاوار بكه‌ت.

(ئه‌ز) واته‌ ئه‌زا/ئه‌زێ ره‌سه‌ن و ل خۆ ئاگه‌هدار و ل سه‌ر خۆ هه‌مى ده‌ما من فكر و هزر كرییه‌ و ئاماده‌مه‌ بۆ وێنێ هه‌بوونێ ب فه‌لسه‌فه‌ و مه‌عریفه‌یه‌كا نوى بگه‌هم. (خۆبوون) ب واتایا ئیراده‌یه‌كا بهێز ل سه‌ر پێن خۆ رادوه‌ستیت، ئانكو شێوه‌كێ ئاسایى بێ توره‌بوون ب میتوده‌كا ئه‌قلانى رێكێ ڤه‌دكه‌ت، نه‌كو ل سه‌ر ده‌ستێ كه‌سانێن دى تر راده‌وه‌ستیت.
هه‌روه‌ها پرسا وێ هه‌مى ده‌ما ل سه‌ر وان هه‌مى گورانكاریان ئه‌وێن دناڤ ناخ و ئه‌قلیه‌تا مرۆڤى و ئه‌وێن دى تر رویدده‌ت و یا ئاگه‌هداره‌، یان ب چه‌كێ ئه‌قل و لوژیكێ د حالێ به‌رهنگاریێ دایه‌، نه‌كو ب هێز و نه‌ ئه‌قلانیێ و دره‌و و هزرا ره‌وانبێژیێ.
ب شێوه‌كێ دى خۆبوون چ ده‌ما هه‌ولناده‌ت ده‌نگێ خۆ ل سه‌ر كه‌سێن به‌رامبه‌رى من ب ده‌نگه‌كێ ره‌ق و زمانه‌كێ زفر به‌رزبكه‌ت كو مرۆڤ نه‌چارى په‌یڤا به‌لێ ببیت، به‌لكو دبیته‌ به‌رهه‌مه‌ك بۆ مرۆڤه‌كێ ئاگه‌هدار خودان به‌هره‌، كو هه‌مى ده‌ما بیرو باوه‌رێن خۆ و ئه‌وێن دى تر ب مێتوده‌كا نوى هزركرنه‌كا ره‌حنه‌یى بێ توره‌یى بینیته‌ و جوودێ. تایبه‌تمه‌ندیه‌كا دى یا خۆبوونێ ئه‌وه‌، كو ره‌فتار و كێشه‌یێن وێ هاو ته‌ریبن ل گه‌ل پره‌نسیپێن ئه‌خلاقى، واته‌ مه‌به‌ست ژیانه‌كا ئه‌خلاقى دژى ئه‌و هه‌مى پابه‌ندیێن ب ئه‌خلاقى ڤه‌گرێدایى دێ ل ژێر بنیاتێ ئه‌خلاقى بیته‌ ژیانه‌كا فه‌زله‌تمه‌ندانه‌.
ژلایه‌كێ دى پرسیاركرن ل سه‌ر چاوانیا وێ ئالاڤه‌كێ دى دده‌ت، ئه‌و ژى ده‌مێ مرۆڤ پرسیارێ ل خۆ بكه‌ت دێ چاوان بمه‌ خۆ؟ یان بوچى كه‌سێ به‌رامبه‌رى من و نه‌ ژ جیهانا من كه‌سه‌كێ خوبوونى یه‌ و ئه‌ز نه‌؟ وى ده‌مى هزركرن دنافخۆ دا دێ وێ به‌رسڤێ ده‌ته‌ من ئه‌وا من دكه‌ته‌ (خۆ). واته‌ ئه‌و تشتێ هه‌ولدده‌ت من نه‌كه‌ته‌ (خۆ) دروستبوونا وى دوخى یه‌ ئه‌وێ (من) ب شێوه‌یه‌كێ نه‌ئه‌خلاقى لقه‌له‌مدده‌ت.بۆنموونه‌ مافێ منه‌ ئازادبم و ب ئازادیا خۆ بریارێ ل سه‌ر هه‌لبژارتنا پێنگاڤێن خۆ یان حه‌زێن خۆ ژیانێ بده‌م ، بێ كو هیچ جوره‌ كاریگه‌ریه‌كا ده‌رونى ل سه‌ر خوبوونیا من و جڤاكێ من و كه‌سێ به‌رامبه‌رى من هه‌بیت و دروست ببیت. به‌لێ ئه‌گه‌ر من ڤیا ببم خۆ، هینگێ دڤێت ئه‌ز كه‌سه‌ك مه‌بده‌ئى بم و بزانم، ئه‌ڤه‌ تشته‌كێ سروشتى یه‌، نه‌كو هوسا خۆ رازى بكه‌م كو ئه‌ز تاوانبارم و هزرا من پێچه‌وانه‌ى وان داب و نه‌ریتنانه‌ ئه‌وێن جڤاكێ من ل سه‌ر نه‌ ئه‌قلانیبوونا من فه‌رزكرین و چه‌سپاندین. زه‌مینێ كو رێكێ ل خۆبوونا مرۆڤى دگریت دناڤبه‌را دوو هه‌لبژارتنان دایه‌، ئه‌و ژى لڤێرێ پرسیاره‌ك دهێته‌ پێش، ئه‌رێ ئه‌و چ تیشكه‌ بنه‌مایێن خۆبوونێ و نه‌خۆبوونێ ل سه‌ر مرۆڤى دیاردكه‌ن؟
ئێك: مرۆڤى نه‌ ره‌سه‌ن، كو كه‌سه‌كێ ئاژه‌لى یه‌ و یێ بێ ئیراده‌ و بێ ئاگه‌هى یه‌، هه‌مى ده‌ما ل پشت كومه‌لگه‌هێ خۆ ئه‌شكه‌نجه‌دده‌ت و چجاران دناخێ خۆ دا هه‌ست ب ئارامى و سه‌قامگیریێ ناكه‌ت، به‌لكو روویێ خۆ ب شێوه‌یه‌كێ ماسكێ دیاردكه‌ت و ب وى شێوه‌ى خۆ نیشا ژیانێ دده‌ت، به‌رده‌وام وه‌دكه‌ت كو كه‌سه‌كێ ره‌ڤێنه‌ره‌ و نه‌شێت دناڤ باره‌كێ جێگیردا بیت، چونكو روژانه‌ رولێ كارێكته‌ره‌كێ ڤه‌دگێریت ئه‌و كارێكته‌ره‌ یا وى/وێ نینه‌ و هوسان سه‌لمینیت هه‌ست و پێ كه‌ت كو ئه‌ڤه‌ كاره‌كێ باش و سه‌ركه‌فتییه‌ ئه‌نجامدده‌ت. ژ لایه‌كێ دى ڤه‌، هه‌مى به‌خته‌وه‌رى و سه‌ركه‌فتنێن خۆ ب كه‌سێن دى تر ڤه‌ گرێدده‌ت، چونكو هوسا باوه‌ریه‌كا ته‌واو بۆ خۆ دروست كرییه‌ ، كو نه‌شێت چ بكه‌ت، ئانكو هزرا خۆ ب زنجیر و كووله‌بوون و بێ ئیراده‌ بوونێ ڤه‌ دایه‌ په‌رستن و مخابن، ل گه‌ل وێ چه‌ندێ وه‌ك نه‌زانه‌كێ نه‌ ئاگه‌هدار دهێت بانگه‌شا ئازادیێ بۆ ئه‌وێن دى تر دكه‌ت. دوو مرۆڤێ ره‌سه‌ن، كه‌سه‌كه‌ لێگه‌ریانێ بۆ دروستبوونا خۆ دكه‌ت و هه‌لویستى ل سه‌ر چاوانیا ره‌فتاركرنا خۆ بشێوه‌یه‌كێ پراكتیكى دده‌ت و هیچ ده‌مه‌كێ ب وى دوخى رازى نابیت ئه‌وێ تێدا دژیت، به‌لكو یێ زاله‌ ل سه‌ر سه‌ربه‌خۆ ئازادیدا و زالبون ل سه‌ر مه‌عریفه‌، خیره‌ت و زانینێ هه‌یه‌ و چ تشت نه‌ڤێن كو ژ وه‌همێ بترسیت، هه‌روه‌ها باوه‌ریا وى/وێ وه‌سا دهێته‌ پێش كو ئازادى جه‌وهه‌رێ بوونا مرۆڤى پێكدئینیت و كووله‌بوونا مرۆڤى ب هزره‌كا نا ئومێد و ره‌نگڤه‌دانا روحه‌كا ترسنوكى ڤه‌ گرێدده‌ت.
ئه‌نجام: به‌لێ ئه‌وا مرۆڤێ خۆبوونى/ خۆنیاسى ژ زینده‌وه‌رێن دى تر جودا كه‌ت، یاخیبوون و به‌رهنگارییه‌ دژى دیناتى و ژیانا ئاژه‌لناسیى( گیانه‌وه‌رى) و رێكنه‌دانه‌ ب كه‌رامه‌تا مرۆڤبوونى، ئانكو ل جهێ ئه‌و كه‌رامه‌ت بهێته‌ پاراستن مخابن وه‌ك ئامراز دهێته‌ بن پێكرن و دیتن نه‌ك ئارمانج. هه‌تا دوماهیك جار مرۆڤ ژ ترسا تنێ بوون و په‌سه‌ند نه‌كرنێ لایێ كه‌لتوورى وه‌كو كه‌سه‌كێ ئاژه‌لى دژیت، ئه‌ڤه‌ وه‌دكه‌ت كو ئاگرێ كووله‌بوونێ ل خۆ زێده‌تر لێ بكه‌ت، بێ وێ چه‌ندێ بهایه‌كێ بۆ خۆ كه‌سایه‌تیا خۆ بدانیت. لدوماهیێ گرنگه‌ خۆ ژ وێ چه‌ندێ پشت راست بكه‌ین یا كو مه‌ دڤێت بگه‌هینێ و ببینه‌ خۆ، ئه‌و ژى پێدڤییه‌ مرۆڤه‌كێ/ مرۆڤه‌كا ره‌سه‌ن بین.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *