ڕێڤه‌به‌ریا ڕه‌وشه‌نبیرى و هونه‌رى ل قه‌زا سێمێلێ د مه‌ها ڕه‌مه‌زانێدا خشته‌یه‌كێ ڕێكخستى ژ چه‌ندین كار و چالاكییان بۆ شه‌ڤێن ڕه‌مه‌زانێ به‌رهه‌ڤكرییه و بریاره هه‌تا داویا ئه‌ڤێ مه‌هێ و پشتى جه‌ژنێ ژى به‌رده‌وام بیت، لدور ئه‌ڤێ یه‌كێ ڕێزدار (ئیسمائیل سلێمان) ڕێڤه‌به‌رێ ڕه‌وشه‌نبیرى و هۆنه‌رى ل باژێرێ سێمێلێ ب خۆشى و پشكورینى ژبۆ مالپه‌رێ مه یێ تایبه‌ت گۆت: مه وه‌ك ڕێڤه‌به‌ریا ڕه‌وشه‌نبیرى و هونه‌رى ل قه‌زا سێمێلێ بریاردایه سێ شه‌ڤان د هه‌فتیێدا لده‌مژمێر (10:00) شه‌ڤ، چالاكییان ب بابه‌ت و مژارێن جوداجودا بگێریت و ڤه‌ژینه‌كا ڕه‌وشه‌نبیرى ل ده‌ڤه‌رێ په‌یدابكه‌ن. هه‌روه‌سا ڕێڤه‌به‌رى زێده‌تر گۆت: هه‌لبه‌ت چالاكییێن مه بوارێن هونه‌رى یێن جودا بخۆڤه دگریت، وه‌ك ئه‌ده‌بییات ب ژانرێن خۆڤه “شیعر و چیرۆك”، موزیك و ستران، په‌نه‌لێن ڤه‌كرى، هزر و فه‌لسه‌فه، شه‌ڤبێریێن تایبه‌ت، گه‌شت و گه‌ریان، مێهڤاندارى و نیشاندانا فیلمان …هتد. هه‌روه‌سا ئارمانجا مه یا سه‌ره‌كى ل هه‌ڤ كومكرنا كه‌سایه‌تیێن ڕه‌وشه‌نبیرى و نڤیسكاره كو مفایى ژ هزر و دیتنێن هه‌ڤدوو ببینن و دانوستاندنێن سودبه‌خش ئه‌نجام بده‌ن. لدووماهییا گۆتنا خۆ سه‌یدایێ (ئیسمائیل سلێمان) گۆت: ئه‌م سوپاسیه‌ك تایبه‌ت ئاراسته‌یى مالپه‌رێ خه‌ده‌نگ یێ ڕه‌وشه‌بیرى دكه‌ن، ژبه‌ركو دناڤ ته‌ڤایا كار و چالاكیێن مه دا پشكدارن و ب هزر و دیتنێن خۆ د په‌نه‌ل و سمیناراندا مفایى دگه‌هینن ئاماده‌بوویان.
