وێنه‌يه‌ك ژ كۆمبوونا فه‌رمى ئه‌وا دناڤبه‌را شاندێ زانكۆيا زاخۆ و سه‌رۆكێ زانكۆيا ساكاريا و جڤاتا زانكۆيێدا هاتييه‌ ئه‌نجامدان.

ل ڕۆژا سێشه‌مبێ ڕێكه‌ڤتى (7/5/2019) شانده‌كێ فه‌رمى ژ زانكۆیا زاخۆ كو ژ به‌رێزان پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ، پرۆفیسۆرێ هاریكار دكتۆر (یاسین تاها مسته‌فا) هاریكارێ سه‌رۆكێ زانكۆیێ بۆ كاروبارێن زانستى و خواندنا بلند، به‌رێز دكتۆر (كاروان فه‌همى سامى) هاریكارێ سه‌رۆكێ زانكۆیێ بۆ كاروبارێن قوتابییان و به‌رێز دكتۆر (ئیسمائیل عه‌لى عه‌لى) ڕێڤه‌به‌رێ خواندنا بلند پێكدهاتن سه‌ره‌دانه‌ك فه‌رمى بۆ زانكۆیا (ساكاریا) ل باژێرێ (ساكاريا) ل وه‌لاتێ توركیا ئه‌نجامدان.

د سه‌ره‌دانا خۆ دا شاندێ زانكۆیا زاخۆ ب گه‌رمى ژلایێ ڕێزدار دكتۆر (فاتح شاڤاشان) سه‌رۆكێ زانكۆیێ و جڤاتێ ڤه‌ هاته‌ پێشه‌وازیكرن، پاشان كۆمبوونه‌ك فه‌رمى ل سه‌رۆكایه‌تییا زانكۆیێ ڕێكخستن و هه‌ر دوو ئالیان ب شێوه‌یه‌كێ ئه‌كادیمییانه‌ باسێ پرۆسێسا خواندنێ و پێشڤه‌چوونا ئاستێ زانكۆیان كر، هه‌روه‌سا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ باس ل دیرۆكا دامه‌زراندن و كار و چالاكیێن زانكۆیا زاخۆ و ده‌ستكه‌ڤت و ڕێكه‌ڤتنامه‌یێن دگه‌ل زانكۆیێن كوردستانێ و یێن ژ ده‌رڤه‌یى كوردستانێ مۆركرین، كر. هه‌روه‌ها ئاماژه‌دا ب بزاڤ و هه‌ولێن به‌رده‌وام یێن ماموستایێن زانكۆیێ و پشكداریا وان د سمینار و كۆنفرانسێن نێڤده‌وله‌تیدا، ژلایێ خۆ ڤه‌ سه‌رۆكێ زانكۆیا ساكاریا و جڤاتا ئه‌وێ زانكۆیێ ده‌ستخۆشیێن بێ هه‌مپا ل كار و خه‌باتێن زانكۆیا زاخۆ كرن و خوازتن لسه‌ر كاروانێ خه‌بات و زانینێ به‌رده‌وام ببن.

لدووماهییا كۆمبوونێ ڕێكه‌ڤتنامه‌یه‌كا ل هه‌ڤگه‌هشتنێ دناڤبه‌را هه‌ردوو زانكۆیاندا ب مه‌به‌ستا ل هه‌ڤگوهارتنا ستافێ ئه‌كادیمى و به‌ستنا كور و كونفرانسان و ئالوگوركرنا قوتابى و ماموستایان هاته‌ ئیمزاكرن و هه‌ر دوو ئالیان هێڤى خوازتن كو د ئاینده‌یه‌كێ نێزیكدا خالێن د ڕێكه‌ڤتنامه‌یێدا جهێ خۆ كرین ب ئاوایه‌كێ فه‌رمى بهێنه‌ جێبجێكرن و قوتابى و ماموستایێن هه‌ردوو وه‌لاتان مفایێ ژێ وه‌ربگرن و خزمه‌تا زانین و زانستێ بكه‌ن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *