ل ڕۆژا ئێك شه‌مبێ ڕێكه‌ڤتى (5/5/2019) لده‌مژمێر (10:00) سپێدێ، لژێر چاڤدێریا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و ب ئاماده‌بوونا به‌رێزان هاریكارێن سه‌رۆكێ زانكۆیێ و ڕاگرێن كۆلیژ و فه‌كۆلتیان و ماموستا و قوتایێن هێژا و ده‌زگه‌هێن ڕاگه‌هاندنێ، ڕێوره‌سمێن ڤه‌كرنا ئێكه‌مین سه‌نته‌رێ جێنده‌رناسیێ ل ئاڤاهییێ فه‌كۆلتیا زانستێن مرۆڤایه‌تى هاتنه‌ گێران.
لده‌ستپێكێ ئاماده‌بوویى وه‌ك ڕێزگرتن ل گیانێ ته‌ڤایا جانگۆریێن بزاڤا ڕزگاریخوازا گه‌لێ كورد خوله‌كه‌كێ ب بێده‌نگى ڕاوه‌ستیان، پاشان ڕێوره‌سمان ب په‌یڤا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیێ ده‌ستپێكرن، به‌رێزى د په‌یڤا خۆ دا ب ئاوایه‌كێ ئه‌كادیمیانه‌ و به‌رفره‌هـ باس ل مژارا جێنده‌رناسیێ و گرنگییا ڤه‌كرنا سه‌نته‌رى دناڤ زانكۆیێدا كر، هه‌روه‌سا د په‌یڤا خۆ دا ئاماژه‌دا ب یه‌كسانییا دناڤبه‌را ڕه‌گه‌زاندا و ب شێوه‌یه‌كێ تایبه‌ت لدور ڕه‌گه‌زێ ژنێ و ڕۆلێ وێ یێ كارا و چالاك دناڤ جڤاكى و ب تایبه‌ت د سازیێن حكومیدا ئاخڤت.
پاشان خانم (نازدار عارف بریندار) ڕێڤه‌به‌را سه‌نته‌رێ یه‌كسانى و جێنده‌رناسیێ په‌یڤا سه‌نته‌رى پێشكێشكر، د په‌یڤا خۆ دا سوپاسییا سه‌رۆكایه‌تییا زانكۆیا زاخۆ و ڕۆلێ وان یێ گرنگ د ڤه‌كرنا سه‌نته‌ریدا و ب جهئینانا ئارمانجێن كارى كر، هه‌روه‌ها ماموستایا ناڤهاتى ب درێژى لسه‌ر كار و پلان و خه‌باتێن داهاتى یێن سه‌نته‌رێ جێنده‌رناسیێ ئاخڤت.
د بڕگه‌یه‌ك تایبه‌تدا ڕێوره‌سمێن به‌خشینا ڕێز و سوپاسییان ب هونه‌رمه‌ندێن شێوه‌كار یێن ب كه‌ڤالێن خۆ پشكدارى د پێشانگه‌ها شێوه‌كاریدا كرین، ئه‌وا كو ب هه‌مان هه‌لكه‌ڤت ل نهۆمێ ئێكێ ل فه‌كۆلتیا زانستێن مرۆڤایه‌تى هاتیه‌ ڤه‌كرندا، هاتنه‌ گێران. لدووماهیێ ب خوارنا شریناهییه‌كێ و پیرۆزكرنا سه‌نته‌رى ڕێوره‌سم ب دووماهیك هاتن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *