ئامادەکر: ئومێد سەگڤان

خەلیل بەگ برازایێ حازم بەگێ میرێ بایەزیدێ بوو، پەریشان ژى کچا شیخ حسێنى بوو، یەک ژ ئاخا و مەزنێن کوردا بوو. ڕۆژەک ژ ڕۆژان حازم بەگ ل مالا شێخ حسێنى دبت مێهڤان و ل وێ دەرێ دمینت. دەما پەریشان خەلیل بەگى دبینت، هش و سەودا دسەرێ وێ دا نامینن و لێ ئەڤیندار دبت.

سپێدەیەکێ خاترا خوە ژ شێخ حسێنى دخازت و دکەڤت رێ. لێ بەلێ ب رێکێ ڤە پەریشان رادوەست و ئەڤینا خوە ب ستران ژوى را رادگەهینت.

خەلیل بەگ بانگى خولامێ خوە خەلوى دکت و دبێژتێ: خەلو ئەڤە دەنگێ کیێە رابە هەر ژێ بپرسە کیە و چ دڤێت؟

خەلو دچت جەم پەریشانێ و ژێ دپرست: تە چ دڤێت؟

پەریشان بەرسڤێ ددت و دبێژت خەلیل بەگ بلا بزڤرت و من ب حەلالى ژ بابێ من بخازت!

-بۆچى تو شوى ب من ناکى؟ خەلو ژێ دپرست.

-نانا! پەریشانێ داخازا وى رەتدکر.

خەلو ڤەدگەرت نک خەلیل بەگى و ژێرا دبێژت: ئەڤ ژنە دینە و ژ خوە را سترانا دبێژت؟

_دێ باژوون رێیا مە دوورە!

دەما کو پەریشانێ زانى نازڤرت، رادبت بەندەک دى دهاڤێت بەر:

خەلیل بەگۆ چیایێ سبحانێ یێ ب گیایێ شینە

بەژنا من زراڤە گول ل حەودا نەسرینە

ئەز عەڤدالا خودێ کەتیمە بەختێ تە

بزڤرە مالا بابێ من شێخ حسێن ب حەلالیا خودێ من ژ خوە رە بینە.

خەلیل بەگ ب وگۆتن و هەڤوکێن وێ داخبار دبت و ئەو ژى لێ ئەڤیندار دبت و دزڤرت نک بابێ وێ و پەریشانێ ژێ دخازت. بابێ وێ نە ب دلەکێ ب سەد دلان کچا خوە ددت خەلیل بەگى و خەلیل بەگ ژى ژ خەلوى دخازە مامێ وى حازم بەگى ب ڤی بابەتى هایدار بکت و بهێن بۆ وى بخازن.

خەلو ژى ب بەز و لەز دچت جەم حازم بەگى و ژێرا دبێژت: بەگێ من برازایێ تە ژ تە رە کچەک بەدەو و جوان دیتە و ناڤێ وێ پەریشانە، و ژ من خوەستیە ڤێ مزگینێ بگەهینم تە، داکو هوون کارێ خوە و ڤەگوهاستنا وێ بکن.

حازم بەگ پر ب کەیف و پەرۆش دبت و داوەتیان ئامادە دکن و ددن رێ و دهێن پەریشانێ ڤەدگوهێزن. خەلیل بەگ ژى ب کەیڤ قەستا داوەتێ دکت و بۆکێ دبت مالا خوە. لێ حاز بەگ  ڤێ رەفتارا وى هێرس دبت و دپرست: چما بۆکێ دبن مالا برازایێ من؟

خەلیل بەگ بەرسڤى ددت: مام نابت ئەم بۆکێ ببن مالاتە، ژبەر کو خەلک دهێن و دچن.

-ما شێخ حەسەنى پەریشان ژ من رە نەکریە دیارى؟

-نەخێر ئاپو، پەریشان خاستیا منە!

دبێژن ژ بەر رندى و جوانیا پەریشانێ دلێ مامێ خەلیلى  تژى کین دبت و برازایێ خوە دکوژت و ددت بەر خەنجەرا و پەریشانێ ژ خوە را دبت. لێ پەریشان وى قەت قەبول ناکت و پشتى دلدارێ خوە خەلیل بەگى چ مێرا د دلێ خوە دا ناحەوینت.

بەرى مەلا پەریشانێ ل حازم بەگى مەهر بکت، پەریشان ژ وان داخاز دکت، مالا خەلیل بەگى ببینت و لێ بگەرت. رادبت د چت سەربانێ قەسرێ و ڤێ بەندێ دبێژت:

خەلیل بەگۆ ئەز ب قەسرا تە کەتم، ب ریحان و دارکنێرە

ل گوهێ من خوەش تێ دەنگێ شالیل و بلبلا، دەنگێ کەوێ نێرە

هەمى خەلک دزانن پشتى خەلیل بەگێ من ل من حەرامە مەهرا مال و مێرا.

پشتى ڤان گۆتنان خوە ژ سەربانێ قەسرێ دهاڤێژت و خوەدکوژت.

پشتى مرنا پەریشانێ حازم بەگ ژنوو ب کارێ خوە حەسیا کو وى خەلەت کریە، رادبت خەلویێ خولام دئینت و وى ل پێش چاڤێن خەلکێ ئیشکەنجە دکت و دکوژت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *