به‌یار شه‌فیق
وەرگێران: بەیار شەفیق
شەمەندەفرەكا تژی ژ نەفەران برێکەڤت؛ دا کو ژ فەرەنسا بچیتە بەریتانیا. ژنەکا فرەنسی دناڤ ئەڤێ شەمەندەفرێدا بوو. زەلامەکێ ئینگلیزی ژی لسەر کۆرسیکا برەخ وێڤە ڕوینشتبوو خوار.
ژ سەر و سیمایێ وێ ژنێ دیاربوو کو گەلەك یا دوودل و شەپڕزە و نەئارام بوو. لەورا ژی ئەوی زەلامێ ئینگلیزی پڕسیار ژێ کر و گۆتێ: “تە خێرە تۆ ژ بەر چ یا شەپرزەی؟”
ئەوێ ژنێ بەرسڤا وی دا و گۆتێ: “دەھ هزار دۆلار یێ د چانتێ من دا. ئەڤ چەندە ژی نە یا ڕێپێدایە کو کۆژمەکێ هندە مەزنێ پارەی دگەل مرۆڤی بیت.”
ئەوی زەلامێ ئینگلیزی گۆتێ: “ئەوی پارەی بکە دوو پشک؛ بلا نیڤەك دگەل تە بیت و نیڤەك دگەل من. ئەگەر هات و ئێك ژ مە بهێتە گرتن ژی، دێ هەر نیڤەکا وی پارەی بۆ تە مینیت. لێ زەحمەت نەبیت؛ ناڤونیشانێن خۆ یێن لەندەن بدە من، ئەگەر ئەم دەربازبووین دا پاشی ئەز بۆ تە بینم.”
دەمێ گەهشتینە زالگەها پشکنینێ، ئەو ژنە شیا بێی ئاریشە ژ پشکنینێ ڕزگار ببیت. بەلێ ئەوی زەلامێ ئینگلیزی دەنگێ خوە بلند کر و گۆتە سەربازێن وێ زالگەهێ: “ئەوێ ژنێ دەھ هزار دولار یێن ڤێ هەین. ئەڤە نیڤەکا وان پارا یێن داینەف من و نیڤەك ژی یێن دگەل وێ بۆ خۆ. من نەڤێت ئەز خیانەتێ ل وەلاتێ خۆ بکەم. ئەز و ئەو لسەر ئەڤێ چەندێ ڕێکەڤت بووین. نوکە من دڤێت ئەز ڤیانا خۆ بۆ وەلاتێ خۆ بەریتانیا مەزن بسەلمینم.”
دووبارە ئەو ژنە هاتە پشکنینکرن و دەست ب سەر پارێن وێ دا گرت. ئەفسەری ژی بۆ وان باسێ هەستا نەتەوەیی کر. هەروەسا ئاماژە ب وان زیانان دا ئەڤێن کو قاچاخچی دگەهیننە وەلاتی و کاریگەرییا وان یا خراب لسەر ئابۆرێ دەولەتێ. لدوماهییێ سوپاسییا ئەوی زەلامێ ئینگلیزی کر و شەمەندەفر بەرەڤ بەریتانیا برێ کەڤت.
پشتی بۆرینا دوو ڕۆژا، ئەو زەلامێ ئینگلیزی لدویڤ وان ناڤونیشانێن وێ ژنا فرەنسی داینێ چوو هەتا گەهشتیە بەر دەرگەهێ ماالا وێ. دەمێ ژنێ ئەو دیتی، گەلەك مەندەهۆش و تۆڕە بوو. پاشی گۆتێ: “تۆ مرۆڤەکێ پیس و بکێر نەهاتییێ. ما تو شەرم ناکەی و دهێی بەر دەرگەهێ مالا من؟ زوی بێژە تو هاتیە ڤیرێ چ؟”
ئەوی زەلامی زەرفەکێ ڕەش کرە د دەستێ ژنێدا. پازدە هزار دۆلار دناڤ ئەوی زەرفیدا بوون. ئانکو زێدەتر ژ پارێ وێ، بدیتنا ئەڤی کۆژمێ پارەی هێشتا ژنا فەرەنسی مەندەهۆشتر بوو.
زەلامی گۆتێ: “خانم، مەندەهۆش نەبە. تو دزانی بۆچی من وێ ڕۆژێ ل وێ زالگەهێ وە کر؟ چونکی سێ ملیۆن دولار د چانتێ مندا بوون. من ئەو چەندە کر؛ دا کو ئەز پۆلیسان د سەردا ببەم و چ هزرا ژ من نەکەن و دەست ب سەر پارێن من دا نەگرن. ئەز یێ نەچاربووم کو پەنایێ بۆ فێلبازیەکا هوسا ببەم و وان بخاپینم.”
 

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *