ل زانكۆیا زاخۆ ب چه‌ندین كار و چالاكییان ڕۆژا جیهانییا په‌رتووكان هاته‌ ل بیرهینان

ل ڕۆژا سێشه‌مبێ ڕێكه‌ڤتى (23/4/2019) لده‌مژمێر (10:30) سپێدێ، ب ئاماده‌بوونا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ، به‌رێز پرۆفیسۆرێ هاریكار دكتۆر (دیار عه‌بدولكه‌ریم سه‌عید) هاریكارێ سه‌رۆكێ زانكۆیێ بۆ كاروبارێن كارگێرى و دارایى، به‌رێز دكتۆر (ماهر خالد عه‌لى) ڕاگرێ فه‌كۆلتیا زانست، به‌رێز پرۆفیسۆر دكتۆر (هۆگر تاهر ته‌وفیق) ڕاگرێ فه‌كۆلتیا زانستێن مرۆڤایه‌تى و به‌رێزان ماموستا و قوتابیێن زانكۆیێ و نڤیسكارێن هێژا یێن باژێرێ زاخۆ، گرۆپێ (خه‌تیر) یێ قوتابیێن زانكۆیێ ب سه‌رپه‌رشتیا ماموستا (عومه‌ر محه‌مه‌د مسته‌فا) ڕێڤه‌به‌رێ په‌رتووكخانه‌یێن ئه‌لكترۆنى یێن زانكۆیا زاخۆ ڕۆژا جیهانییا په‌رتووكان ل هۆلا فه‌كۆلتیا زانست ب چه‌ندین چالاكیێن جۆر ب جۆر ل بیرهینان.
د چوارچووڤه‌یێ چالاكیێدا به‌رێز دكتۆر (له‌زگین عه‌بدى جه‌میل) په‌یڤه‌ك پێشكێشكر و د په‌یڤا خۆ دا ب گرنگى چالاكییا قوتابییان هه‌لسه‌نگاند و ب تێر و ته‌سه‌لى باسێ خواندنێ و گرنگییا وێ بۆ ژیانا مرۆڤان كر. لدویڤدا ڕێزدار پرۆفیسۆرێ هاریكار دكتۆر (دیار عه‌بدولكه‌ریم سه‌عید) په‌یڤه‌ك لدور ڕۆژا جیهانییا خواندنا په‌رتووكان پێشكێشكر و ب ئاوایه‌كێ ئه‌كادیمییانه‌ باس ل پرۆسێسا خواندنا په‌رتووكان و ڕۆلێ په‌رتووكخانه‌یێ د ئاڤاكرنا كه‌سایه‌تییا مرۆڤاندا كر. پاشان په‌یڤا دووماهییێ ژلایێ ماموستا (عومه‌ر محه‌مه‌د) هاته‌ خواندن و ب ئاوایه‌كێ ل هه‌ڤهاتى باسێ دامه‌زراندنا گرۆپى و قوناغێن كاركرنێ دگه‌ل ئارمانجێن خۆ یێن ده‌ستپێكى و ئیستراتیژى كر.
هه‌روه‌سا ب هه‌مان هه‌لكه‌ڤت ب پشته‌ڤانییا ڕێزدار دكتۆر (ماهر خالد عه‌لى) پێشانگه‌هه‌كا په‌رتووكان ل ئاڤاهیێ فه‌كۆلتیا زانست هاته‌ ڤه‌كرن و تێدا چه‌ندین ده‌زگه‌هێن چاپ و به‌لاڤه‌كرنێ دگه‌ل چه‌ندین په‌رتووكخانه‌یێن پارێزگه‌ها دهۆكێ پشكدارى تێدا كرن و ناڤونیشانێن نوى یێن چه‌ندین په‌رتووكان هاتنه‌ نمایشكرن.
لدووماهیێ گرنگه‌ بێژین، كو بڕگه‌یه‌ك تایبه‌ت ژ بۆ دانا په‌رتووكان ب قونابییان هاتبوو ته‌رخانكرن، ئه‌و په‌رتووك ژلایێ نڤیسكار و خوانده‌ڤانێن په‌رتووكان بۆ قوتابیێن زانكۆیا زاخۆ هاتبوونه‌ ته‌رخانكرن.