ل ڕۆژا سێشه‌مبێ ڕێكه‌ڤتى (16/4/2019) لده‌مژمێر (10:00) سپێدێ ب ئاماده‌بوونا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و نوینه‌رێن سازیێن حكومى و حزبى و كه‌رتێ تایبه‌ت و هاریكارێن سه‌رۆكێ زانكۆیێ و ڕاگرێن كۆلیژ و فه‌كۆلتیان و ماموستا و ڤه‌كۆله‌رێن ناڤخوه‌یى و ده‌رڤه‌یى هه‌رێما كوردستانێ و ئه‌ندامێن په‌رله‌مانێ كوردستان و ئیراقێ و ده‌زگه‌هێن ڕاگه‌هاندنێ و قوتابیێن خۆشتڤى، لژێر دوریشمێ (سیاسه‌تا به‌ریتانیا ل هه‌مبه‌ر كێشه‌یا كوردى) فه‌كۆلتیا زانستێن مرۆڤایه‌تى ب هه‌ڤكارى دگه‌ل سه‌نته‌رێ زاخۆ بۆ ڤه‌كۆلینێن كوردى سێیه‌مین كۆنفرانسێ خۆ یێ نێڤده‌وله‌تى ل هۆلا كۆنفرانسان ل فه‌كۆلتیا زانست گێران.
لده‌ستپێكێ ئاماده‌بوویان وه‌ك رێز و وه‌فادارى بۆ گیانێ پاكێ سه‌رجه‌م جانگۆریێن بزاڤا ڕزگاریخوازا گه‌لێ كورد خوله‌كه‌كێ ب بێده‌نگى دگه‌ل سروودا نیشتیمانى (ئه‌ى ڕه‌قیب) ڕاوه‌ستیا، پاشان په‌یڤا كۆنفرانسى ژلایێ به‌رێز پرۆفیسۆرێ هاریكار دكتۆر (دیار عه‌بدولكه‌ریم سه‌عید) سه‌رۆكێ كۆنفرانسى هاته پێشكێشكرن، ناڤهاتى د په‌یڤا خۆ دا ب ئاوایه‌كێ به‌رفره‌هـ لسه‌ر په‌یوه‌ندیا دیرۆكى یا دناڤبه‌را كورد و به‌ریتانییا ئاخڤت و ئاماژه ب چه‌ندین ئێستگه‌هێن گرنگ یێن په‌یوه‌ندى ب هه‌ر دوو وه‌لاتانڤه هه‌یى دا، هه‌روه‌سا لدووماهییا په‌یڤا خۆ باس ل گرنگییا سازكرنا كۆنفرانسێن نێڤده‌وله‌تى یێن په‌یوه‌ندى ب دیرۆكا گه‌لێ كورد ڤه هه‌یى كر و چه‌ندین خالێن تایبه‌ت ده‌ستنیشانكرن.
