ڤەگۆهاستن پیتێن لاتینی: ئومێد سەگڤان

(تا کو مرۆڤ ل ژیانێ بە، وێ کول و خەم، ئەڤین و ھەزکرن پێ رە بەردەوام بن. زانا بە ئان نەزان بە، ھەر وێ ئەو بارھلگرێ کول و خەمان و ئەڤین و ھەزکرنێ بە.. من د فلمێن خوە دە ھەول دایە کو، ئەز کول و دەردان، ئەڤین و ھەزکرنێ بگھینم ھەڤ.. گەلەک کەس ڤان تشتان ژ ھەڤ دەرناخینن..)
یەلماز گونەی
یەلماز گونەی کی بوو، چ بوو و چ ژ گەلێ خوە رە پێشکێش کریە تا کو ئەم وی ببیر بینن؟ یەلماز گونەی کوردەکی رەسەن بوو.. دەرھێنەرەکی جیھانی بوو.. وی، د رۆژێن تەنگ و دژوار دە، پەریشانی، زولم و زۆرا گەلێ خوە د رێکا فیلمێن خوە دە ژ خەلکێن جیھانێ رە دا خویا کرن و ئەشکەرە کر.. د فلمێن خوە دە ب سەربلندی کوردیتیا خوە دیار دکر..
ئەو بەری ٨٢ سالان، د ١عێ نیسانا ١٩٣٧عان دە ل گوندێ (یەنیجە)، ھەرێما ئادەنێ ھاتیە دنیایێ. ناڤێ باڤێ وی ھەمید و دیا وی گولێ بوو، ژ خەلکێن زازا بوو. د مالەک فەقیر و پەریشان دە مەزن ببوو.. د بچووکانیا خوە دە گەلەک کار و بارێن تێڤەل کربوون؛ ژ ئاڤدانا بەخچەیان تا ب سەوتەریبوونا کۆلانێن باژارا.. پێرە ژی ھەز خوەندن و نڤیساندنێ کریە.. پشتی کو لیسە قەداندیە ب چەند ھەڤالێن خوە رە دو کۆڤار (دۆرۆک و بۆران)، ب زمانێ ترکی وەشاندنە. ئەو دەرھێنەرێ گەلەک فلمێن بەدەوە و ١٧ خەلات ل دۆر فلمێن خوە وەرگتنە. بەلێ د سالا ١٩٨٢عان دە ب بەشداربوونا وی د فەستیڤالا (کان)ێ دە ل فرانسایێ ب فلمێ (یۆل)، خەلاتا زێرین ستاند و ب وێ خەلاتێ ناڤێ وی و پەریشانیا گەلێ کورد د دنیایێ دە بەلاڤ بوو.
ژ فلمێن وی: کەری، سەیدخان، بەلەنگاز، کەسێن رەڤیایی، باڤ، کۆڤی، تالی.. و گەلەک فلمێن دن ھەنە.. د سالا ١٩٨٣عان دە فلمێ خوەیێ داوی ب ناڤێ (دیوار)، ب ئالیکاریا ھکومەتا فرانسی ل باکوری فرانسایێ کشاندیە.
ھێژایە گۆتنێ کو، ئەو ژی یەکە ژ وان کەسێن کو د سباتا ١٩٨٣عان دە (ئەنستیتویا کوردی) ل پاریسێ دامەزراندنە، وەک؛ جەگەرخوین، قەناتێ کوردۆ، ئۆسمان سەبری، تەوفیق وەھبی، رەمزی، در. نوورەدین زازا، ھاجیێ جندی و ئسمەت شەریف وانلی. ئەو د ٩عێ ئێلوونا ١٩٨٤عان دە ل نەخوەشخانەیەکە پاریسێ کۆچا داوی کر. ب رێوورەسمەکی بەدەو ژ رەخ ھن وەزیرێن فەراسنی، جەماوەرەکی مەزن ژ کورد و فرانسیزان ئەو ل پاریسێ د گۆرستانا (لاشاز) دە، ل کێلەکا ڤان ھەردو ھەلبەستڤانێن فرانسییێن ناڤدار؛ چارلەس باودەلارە و ئالفەرد دە موسسەت ھات ڤەشارتن.
ما نەھێژایە کو ئەم وی ببیر بینن و ناڤێ وی ل جھەکی بلند دەینن؟

کونێ رەش

ژ رووپەلا چاندنامە هاتیە وەرگرتن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *