ل ڕۆژا سێشه‌مبێ ڕێكه‌ڤتى (2/4/2019) لده‌مژمێر (10:00) سپیدێ، ب ئاماده‌بوونا به‌رێز پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ و به‌رێز دكتۆر (عه‌دنان مه‌حسن عه‌بدولعه‌زیز) سه‌رۆكێ زانكۆیا پۆلیته‌كنیك یا دهۆكێ و به‌رێز دكتۆر (داود ئه‌ترۆشى) نوینه‌رێ وه‌زاره‌تا خواندنا بلند و ڤه‌كۆلینێن زانستى، ئه‌ندامێن په‌رله‌مانێ كوردستانێ و ئیراقێ، هاریكارێن سه‌رۆكێ زانكۆیێ و ڕاگرێن كۆلیژ و فه‌كۆلتیان، نوینه‌رێن داموده‌زگه‌هێن حزبى و حكومى، ماموستا و قوتابییان زانكۆیێ و سازیێن ڕاگه‌هاندنێ دوویه‌مین كۆنفرانسێ نێڤده‌وله‌تى یێ ئه‌ندازیارى و زانستێن پێشكه‌ڤتى لژێر چاڤدێریا ڕاسته‌وخۆ یا ڕێكخراوا (IEEE) یا ئه‌مریكى تایێ ئيراقێ ل هۆلا كۆنفرانسان ل فه‌كۆلتیا زانست ل زانكۆیا زاخۆ هاته‌ گێران.
لده‌ستپێكێ ئاماده‌بوویان وه‌ك ڕێزگرتن خۆله‌كه‌كێ ب بێده‌نگى دگه‌ل سروودێن نیشتیمانى یێن كوردستان و ئیراقێ لسه‌ر گیانێ جانگۆریێن بزاڤا ڕزگاریخوازا گه‌لێ كورد ڕاوه‌ستیان، پاشان ب په‌یڤا ڕێزدار پرۆفیسۆرێ هاریكار دكتۆر (له‌زگین عه‌بدى جه‌میل) سه‌رۆكێ زانكۆیا زاخۆ ڕێوره‌سمێن دوویه‌مین كۆنفرانسێ نێڤده‌وله‌تى ده‌ستپێكرن، د په‌یڤا خۆ دا ڕێزدارى بخێرهاتنا گشت مێهڤانێن هێژا ژ ناڤخۆ و ده‌رڤه‌یى هه‌رێما كوردستانێ كر و ب ئاوایه‌كێ گشتى لسه‌ر گرنگییا به‌ستنا كۆنفرانسێن زانستى ب مه‌به‌ستا پێشڤه‌برنا زانست و زانینێ په‌یڤى. هه‌روه‌سا باس ل چه‌ندین ته‌وه‌رێن كر و لدووماهیێ داخوازا ده‌مه‌ك خۆش بۆ مێهڤانێن هێژا خوازات.
لدویڤدا ڕێزدار پرۆفیسۆر دكتۆر (عه‌دنان مه‌حسن عه‌بدولعه‌زیز) سه‌رۆكێ زانكۆیا پۆلیته‌كنیك یا دهۆكێ، په‌یڤا خۆ پێشكێشكر و ب هه‌مان ئاوایى بخێرهاتنا مێهڤانێن هێژا كر و ب ئاوایه‌كێ ئه‌كادیمیانه‌ و ب تێر و ته‌سه‌لى ئاماژه‌ ب قوناغێن كاركرنێ و چاوانییا ڕێكخستنا كۆنفرانسى بۆ جارا دوویێ دا. هه‌روه‌سا ده‌ستخۆشى ل ڕێڤه‌به‌ر و ستافێ كارى و ڤه‌كۆله‌رێن هێژا كر و خوازت ب به‌رده‌وامى گرنگیێ ب بابه‌تێن زانستى و گێرانا كۆنفرانسێن نێڤده‌وله‌تى بده‌ن.
پاشان به‌رێز دكتۆر (داود ئه‌ترۆشى) نوینه‌رێ وه‌زیرێ خواندنا بلند و ڤه‌كۆلینێن زانستى په‌یڤا وه‌زاره‌تێ پێشكێشكر و هه‌ر لده‌ستپێكێ سلاڤێن وه‌زیرى گه‌هاندن، پاشان ده‌ستخۆشى ل ستافێ ڕێكخه‌ر و ئه‌ندامێن دوویه‌مین كۆنفرانسێ نێڤده‌وله‌تى كرن و پشته‌ڤانییا وه‌زاره‌تێ بۆ كار و چالاكیێن وه‌ها زانستى و ئه‌كادیمیانه‌ ده‌ربرى.
پشتى په‌یڤێن لسه‌رى دیاركرى ب دووماهیك هاتین، ڕێڤه‌به‌رێن كۆنفرانسى ژ هه‌ر دوو زانكۆیان چه‌ندین ته‌وه‌رێن گرنگ ئازراندن و باس ل كار و چالاكیێن كۆنفرانسى كرن. لدوماهییێ گرنگه‌ بێژین، كو كۆنفرانسێ ناڤهاتى ب هه‌ڤكارى و هه‌ماهه‌نگى دناڤبه‌را زانكۆیا زاخۆ و زانكۆیا پۆلیته‌كنیك یا دهۆكێ ب پشكدارییا (63) ڤه‌كۆلینان ژ (16) وه‌لاتێن جوداجودا دێ بۆ ماوه‌یێ (3) ڕۆژان ب پێشكێشكرنا ڤه‌كۆلینان ل هه‌ر دوو زانكۆیان به‌رده‌وام بیت. جهێ ئاماژه‌پێدانێیه‌، كو (194) ڤه‌كۆلینا بۆ لیژنه‌یا هه‌لسه‌نگاندن و بریاردانێ هاتبوون فرێكرن، به‌لێ بتنێ (63) ڤه‌كۆلین هاتنه‌ قه‌بویلكرن و دێ د ڕۆژانێن كۆنفرانسیدا هێنه‌ پێشكێشكرن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *