جبڕان خەلیل جبڕان وەرگێڕان: بەیار شەفیق

دگەل نیڤ ئەڤیندارا نە ڕوینە خوار.. تێکەلییا نیڤ هەڤالان نەکە.. بەرهەمێن نیڤ بەهرەمەندا نەخوینە. ب نیڤی نەژی و نە ژی ب نیڤی بمرە. نیڤ چارەسەریێ نە هلبژێرە.. نە ڕاوەستە ل نیڤا ڕاستیێ.. خەونا ب نیڤی نەبینە..ب نیڤ هیڤییێ ڤە نەهێیە گرێدان. ئەگەر تو بێدەنگ بووی، بێدەنگ ببە هەتا دوماهییێ.. ئەگەر تو ئاخڤتی ژی، باخڤە هەتا دوماهیێ.. بێدەنگ نەبە دا کۆ تو باخڤی. و نە ژی باخڤە دا بێدەنگ ببی. ئەگەر تو ڕازی بووی، دەربڕینێ ژ ڕازیبوونا خوە بکە.. خوە ب نیڤ ڕازیبوونێ نەئینە دەر. ئەگەر تە تشتەک ڕەتکر، دەربڕینێ ژ ڕەتکرنا خوە بکە. ژبەرکۆ نیڤ ڕەتکرن، قەبویلکرنە. نیڤ ئەو ژیانە یا کۆ تو تێدا نەژیای.. ئەو پەیڤە یا کۆ تە نە گۆتی.. ئەو گڕنژینە یا کۆ تە پاش ئێخستی.. ئەو ڤیانە یا کۆ تو نە گەهشتییێ.. ئەو هەڤالە یێ تە نە نیاسی. نیڤ دێ تە کەتە بیانی ل دەڤ نێزیکترین کەسێ تە. و نێزیکترین کەسێ تە، دێ کەتە بیانی. نیڤ ئەوە تو بگەهی، هەر وەکی تو نەگەهشتی.. تو کار بکەی، هەر وەکی تە کار نەکری.. تو نەدیار بی، هەر وەکی تو یێ ئامادە. نیڤ تو بۆ خوەی؛ ل وی دەمێ تو نە تو. ژبەرکۆ تو نزانی کا تو کی. نیڤ ئەوە کۆ تۆ خوە نەنیاسی. ئەوێ تو حەژێ دکەی، نە نیڤا تە یا دیترە. بەلکۆ ئەو توی ل جهەکێ دیتر د هەمان دەمدا. نیڤ ڤەخوارن تێهنکا تە ناشکێنیت.. نیڤ دانێ خوارنێ برسا تە تێر ناکەت.. نیڤ ڕێک تە ناگەهینیتە چ جها.. نیڤ هزر چ ئەنجامان نادەتە تە. نیڤ ئەو دەمە یێ کۆ تو تێدا بێچارە و تو نە یێ بێچارە. ژبەرکۆ تو نە نیڤ مرۆڤی، تو مرۆڤی. تو یێ هاتی دا کۆ ب تمامی بژی، نە کۆ دا ب نیڤی بژی. ڕاستییا مرۆڤان نە ئەوە یا کۆ بۆ تە دیار دکەن، بەلکۆ ئەوە یا کۆ نەشێن دیار بکەن. ژبەر هندێ ژی؛ ئەگەر تە بڤێت وان ب نیاسی، گۆهێ خوە نەدە وان تشتێن ئەو دبێژن، بەلکۆ گۆهێ خوە بدە وان تشتان یێن ئەو نەبێژن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *