ئامادەکرن و وەرگێڕان: بەیار شەفیق

ل وی دەمێ نیڵسۆن ماندێلا قوتابی ل کۆلیژا یاسایێ، مامۆستایەکێ وی یێ پیست سپی ناڤێ وی پیتەر بوو. ئەوی گەلەک حەز ژ ماندێلای نەدکر.
ڕۆژەکێ ئەڤ مامۆستایە ل سەر مێزەکا کافتریا زانکویێ یێ ڕوینشتی بوو، دا کو خوارنێ بخۆت. نێڵسۆن ماندێلای ژی خوارنا خوە بر و چوو لسەر مێزا وی ڕوینشتە خوار.
مامۆستا پیتەری گۆتێ:‌
 “ما تو نزانی کۆ بەڕاز و فڕندە نەشێن دگەل ئێک بڕویننە خوار و خوارنێ بخۆن؟!”
ماندێلای بەرێ خوە دایێ و گەلەک ب جوانی و ئارامی بەرسڤا ویدا و گۆتێ:
 “دلتەنگ نەبە ماموستا، ئەز دێ بلند فڕم و ژ تە دویرکەڤم.”
پاشی ئەو چوو سەر مێزەکا دیتر ڕوینشتە خوار.

مامۆستا ژ بەر ڤێ بەرسڤا ماندێلای گەلک بێزار بوو و تێکچوو. لەوڕا ژی بڕیاردا کۆ تۆلا خوە ژ وی ڤەکەت.

ڕۆژا پاشتر دەمێ مامۆستا چوویە د پۆلێڤە پڕسیارەک ژ ماندێلای کر و گۆتێ:
 “ئەگەر تو د ڕێکەکێ ڕا چووی و تە سندۆقەک دیت، د ئەڤێ سندۆقێدا دوو تویرک هەبن؛ ئێکی ژ وان پارە تێدابن. و یێ دی زانین تێدابیت. تو دێ کیژ ژ وان هەلبژێری؟”
ماندێلای بێ دودلی بەرسڤا ویدا و گۆت: “چ پێنەڤێت دێ تویرکێ پارا هەلبژێرم.”
مامۆستای پێکرە کەنی و یاری پێکرن و گۆتێ:
 “ئەگەر ئەز ل شوینا تە بام؛ دا تویرکێ زانین تێدا هەلبژێرم.”
ماندێلای ژی بەرسڤا ویدا و گۆتێ:
 “هەر مرۆڤەک دێ وی تشتی هەلبژێریت یێ ژ وی کێم.”

ل وی دەمی مامۆستا پیتەر وەسا تۆڕە بوو؛ کۆ کەرب و کینا وی گەهشتە وی ڕادەی هەتا کۆ لسەر بەرپەڕێ ماندێلای یێ تاقیکرنێ نڤێسی “خشیم” و داڤ وی.
ماندێلای ژی بەرپەڕێ خوە یێ تاقیکرنێ ژێ وەرگرت. پاشی چوو سەر جهێ خوە ڕوینشتە خوار و چەندەکێ خوە ئارام ڕاگرت. پشتی چەند خۆلەکەکا، ماندێلا ڕابوو بەرەڤ مامۆستایڤە چوو و ب زمانەکێ نەرم و نازک گۆتێ:
 “مامۆستا پیتەر، من ناڤێ تە لسەر بەرپەڕی دیت، لێ تە ئیمزایا خوە لسەر چێنەکربوو!!”

پەند: هشیار بە؛ ڕێکێ نەدە چ کەسا وە ل تە بکەن کۆ ئێدی تە باوەری بۆ خوە نەمینیت و ببیتە ئەگەر کۆ تو خوە کێم ببینی و شانازییێ ب هەبوونا خوە نەبەی. خوە ئەگەر ئەو کەسە مامۆستایێ تە ژی بیت، ئەوێ کۆ هەلسەنگاندنا تە د دەستیدا.. یان ژی ڕێڤەبەرێ تە بیت، ئەوێ کۆ دشێت تە ژ کارێ تە بکەتە دەر. ژبەرکۆ دەروونێ تە، ژ هەر تشتەکی گرنگتر و ببهاترە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *