سەربەست تەها سەلام
گەردوون و ئەڤ جیهانا کۆ ئەم تێدا دژین د گوهۆڕینەکا بەردەوام دایە. هەمی تشت دهێنە گوهۆڕین. فیلۆسۆفێ گریکی هیراکلیتوس دبێژیت: “مرۆڤ نەشێت دهەمان ڕویبار دا دوو جاران مەلەڤانییا بکەت، ژ بەر کۆ ئاڤا وی ڕویباری بەردەوام د گوهۆڕینێ دایە.” مرۆڤان هینگێ سەرکەڤتن ب دەست خوەڤە ئینایە، دەمێ هزر د گوهۆڕینا خوە ڕەفتارێن خوە یێن ڕوژانەدا کری ژ شێوەکی بو شێوەکێ باشتر. لێ تشتێ نەخوەش ئەوە کۆ دەست پێکا پڕۆسەیێ خوە گوهورینێ یێ گرانە ل سەر مروڤی، چونکی مروڤ ئارامییا خوە تا رادەیەکێ مەزن ژ دەست ددەت. ئەڤ چەندە ژی دبیتە ئەگەر کۆ مرۆڤ ژ وێ بەرپرسیاریێ بڕەڤیت. هۆسا ب ئەڤی ڕەنگی؛ پتریا مروڤان دەست ژ خوە گوهۆڕینێ بەرددەن و دەستا ژ هیڤی و ئاڕمانجێن خوە بەرددەن. لەوڕا ژی دڤێت مرۆڤ خودان ئیرادەکا پیلایی بیت دا بشێت خوەڕاگر بیت ل بەر وان خەیالێن نێگەتیڤ یێن کۆ ل دەمێ هزرکرن د گوهۆڕینێدا دهێن. هەلبەت ل وی دەمی مرۆڤ دێ هەست ب گوهۆڕینێ کەت، دەمێ کۆ ئەو تشتێن وی بۆ دکرە گری، نوکە پێ بکەتە کەنی. و تشتێ کۆ تڕانە پێ دکرن، نوکە تێبگەهیت و ژێ فێر ببیت. گەلەک جاران خالا خوە گوهۆڕینێ ژ نیشکانڤە چێدبیت؛ چ ئەڤ چەندە ب گوهلێبونا پەیڤەکێ یان دیتنا ڕەفتارەکێ یان ڕویدانەکێ یان ژی سەربورەک چاڤەڕێ نەکری بیت. راستە کاودان ئەگەرێ سەرەکینە بۆ خوە گوهۆڕینێ، لێ هندی مرۆڤ خوە ژ بەری دروستبوونا کاودانێ بگوهۆڕیت، رێژا سەرکەڤتنا وی دێ پتر بیت و ئارامتر بیت. وەک هاریکاری بۆ مرۆڤی؛ مرۆڤ ل دەستپێکێ ژ گوهۆڕینا ڕەفتارەکا ب ساناهی دەست پێ بکەت و پاشی بەرەڤ تشتەکێ مەزنتر تا مروڤ هێدی هێدی خوە فێری گوهۆڕینێ دکەت. ئێکەم پێنگاڤ بۆ خوە گوهۆڕینێ دڤێت ژ ناخ و هزر و هەستێ مرۆڤی یێ ڤەشارتی بیت دا ببیتە بۆڕکان و دەست بسەر هەمی هزرێن نێگەتیڤدا بگریت، چونکی هزرێن نێگەتیڤن مرۆڤا مال وێران دکەن و هیڤی و حەزا د دلێ واندا دمرینن. “فێرببە.. خوە فێربکە.. دا فێرببی.” بزانە گەلەک مرۆڤ ژ بەر خوە گوهۆرینێ یان کاودانێن بسەردا هاتین، لەرزینە ژ ترساندا. لێ ل دوماهیێ بووینە خودان دەستکەڤتەکێ باش، ژ بەر کۆ خوە ڕاگرتییە تا دوماهیک هەناسە. ژبیرنەکە کۆ کەسایەتیێن گەلەک ب ناڤودەنگ ل دەستپێکێ کەسێن سادە بوون، لێ پشتی هزرا د خوە گوهۆڕینێدا کری، بووینه سەرکردە و ناڤدار. بۆ نموونە وەکی سەروکێ هندێ گاندی کۆ ل دەستپێکێ جوتیار بوو.. بیل گێتسێ ئەمریکی خودانێ کۆمپانییا مایکروسفت چەندین جارا کومپانی لێ هاتییە دائێخستن.. ئیبراهیم فەقیێ مسری ئامانشۆ بوو.. عومەرێ کورێ خەتابی ئێک ژ مەزنێن بێ دینابوو . لێ ڤان هەمیان خوە گوهاڕت و هۆسا ژیانا وان هاتە گوهۆڕین.