سەربەست تەها سەلام

هەلبەت هەمی مروڤان دڤێت کەسێن بەرامبەر ب چاڤەکێ مەزن بەرێ خوە بدەنێ. ئەوان دڤێت د ڕێزدار و خۆشتڤی بن د چاڤێن کەسێن بەرامبەر دا و حەژێکرنا دەوروبەرێن خوە بۆ خوە ڕابکێشن. لێ بارا پتر جاران مرۆڤ نەشیانە ڤی تشتی ب دەسخوەڤە بینن، چونکی هەر تشتەکێ ئەگەرێ خوە هەیە. چ تشت ژ ڤاڵاهییێ ناهێنە بەرجەستەکرن، لەوڕا ژی من دڤێت وان ئەگەران دیاربکەم؛ یێن کو دبنە ئەگەر کەسێن دەوروبەرێن تە ب تە داخبار ببن و تو ببیە جهێ باوەریا وان.

• بێ بەرامبەر یێ هاریکار بە دگەل دەوروبەرێن خوە، چونکی گەردوون دێ پاداشتەکێ مەزنتر دەتە تە بەرامبەر وێ باشییا تە کری د گەل بۆرینا دەمی. ئەو کەسێن باشیێ دکەن پێخەمەت کۆ تشتەکی د بەرامبەر دا ب دەستخوەڤە بینن، هەردەم دلتەنگ و بێزار دبن.

• هەمی دەما پێکۆڵا بکە کو ڕێزگرتن ژ دەڤ تە دەستپێبکەت بۆ کەسێ بەرامبەری تە؛ چ ئەو کەسە مەزنتر بیت ژ تە یان ژی بچویکتر بیت،چ کەسەکێ باشبیت یان ژی یێ خراب بیت.

• بلا تە گەلەک پێزانین هەبن، لێ دیار نەکە هەتا دەمێ گۆنجای دهێت و دەلیڤێ بۆ تە دئینیت. هەر تشتەک د دەمێ خوە دا کاریگەر و مفادارە. تو دشێی فێقییێ نەگەهشتی بکەی، لێ هەلبەت خوارنا وی فێقییێ نەگەهشتی ڕەفتارەکە ژ ڕەفتارێن مرۆڤێن خشیم.

• مرۆڤەکێ خوەپەرست نەبە و بلا بەڕژەوەندیا گشتی ئاڕمانجا تە یا سەرەکی بیت د هەر کارەکێ تو دکەی دا. بلا کریارێن تە وەسا بسەلمینن کۆ تە باشی و بەختەوەری و قازانجا کەسێن دیتر دڤێت.

• گەلەک کاربکە بۆ وی تشتێ تە دڤێت و گەلەک کاربکە بۆ وی تشتێ دەوروبەرێن تە دڤێت. هەلبەت ل وی دەمێ تو هاریکاریا کەسەکی دکەی د گەهشتنا وی تشتێ وان دڤێت دا، خوەشیا تە ژی چ ژ یا وان کێمتر نابیت. ئەڤە ژی ژ بەر کۆ کریارێن تژی مرۆڤایەتی، هەردەم ئارامیەکا دەروونی یا کویر د دویڤ خوە ڕا دئینن.

• چ جارا هزر نەکە کۆ دێ تۆلڤەکرن تە بلند کەت، بەلکۆ بەروڤاژی.

• مرۆڤێن جیهانێ هەمی کارێن نە دروست و خەلەت بکەن ژی، تو هەر کارێن ڕاست و دروست هەلبژێرە و ئەنجامبدە.

• مرۆڤان ب کریار و باشیێن وان بهەلسەنگینە، نە ب ئاخڤتن و ڕەنگێ وان.

• دەسخۆشییێ ژبیرنەکە بۆ وی کەسی یێ کارەکێ باش و گرنگ ئەنجام دای؛ چ ئەو کار بۆ تە ئەنجامدا بیت چ ژی نە. هەروەسا بزاڤا بکە ب دلخۆشی و سینگەکێ بەرفرەھ پیرۆزباهییێ ل کەسێن دیتر بکە دەمێ دگەهنە تشتەکی.

• نیازێن تە بلا د پاقژ بن. هندی تو بشێی کەسەکێ باشبە، لێ چ جارا بزاڤان نەکە وێ باشییا خوە بسەلمینی. دبیت دروست پڕاکتیک کرنا ئەڤ دەھ خالێن لسەری ببنە هاریکار و پشتەڤان و ڕێخۆشکەر د هەمی بیاڤێن ژیانا تە دا.

2 thoughts on “ئەو چ خالێن بهێزن کو دبنە ئەگەر خەلک حەز ژ تە بکەن؟

  1. کارێن تە رێکا ژیانە تە ئاڤادکەت .
    پرانیا مرۆڤێن ڤی سەردەمی دلگران و دل نە ئارام دژیانێدا بێکو پرانیا وان هزربکەن ئەڤ نەئارامی دلگرانی بو چ تشتی د ڤەگەریت؟
    تەدڤێت ئارامی ؟ تەدڤێت ب خوشی بژی؟
    ١.هەرکارەکێ توبکەیی پێکولا مروڤایەتیێ تێدابکە کو مروڤایەتی د وی کاری داهە بیت
    ٢. گولادرێکا خەلکی دا بچینە داکوژیانا دناڤ گولاندا دەربازبیت هیڤیدارم ئەم تێبگەهین؟
    ٣.هەرکارەکێ تە ئەنجام دابیت باش یان خراب دەما لدەڤ تە بهێت ئازراندن ب باشیا خو بلند نەفرە و ب خرابیا خو پەشێمانیێ ل سەر دەرونێ خو دیاربکە و بلا یێ بەرامبەر هــەست پێ بکەت کو ئەوکارێن خرابێن تەئەنجام داین تویێ پەشیمان کری .
    ٤. کەسەکێ خوشکەستی بە لهەمبەر کەسێن دژیانێ دگەهن و یێ خوپەرست نەبە بەرامبەر چ کەسا .
    ٥. بلانهێنیێن ژیاناتە دبن ئەزمانێ تەدابن چونکی تو بتنێ باشترین کەسی بو پاراستنا نهێنییێن خو
    ٦. گەلەك یێ سوپاسداربە بو وێ ژیانا خودایێ مە زن بتە بەخشی و گازندا ژیانێ ژ خوبکە نەك ژ رزقێ خو
    ٧. پێکولابکە ب شە ڤ دادگەهەکێ دگەل کار وکریارێن خو ئەنجام بدە و نەفساخو فێری سەربەردانێ نەکە .

    دگەل جوانترین رێز و ڤیانامن
    مێهڤان زبیر چەلکی
    ٣٠ ئادارا ٢٠١٩

    1. گەلەک سپاس بۆ کومێنتا جەنابێ تە, کو ب راستى ژى تێر مەعرفى و ئاگاهى بوون, هەر ساخ و سلامەت بى و دگەل ڕیز و سلاڤێن گەرم بۆ تە.

وەڵامێک بنووسە بۆ Omed Segvan هەڵوەشاندنەوەی وەڵام

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *