ئامادەکرن و وەرگێڕان: سەربەست تەها سەلام

سەرکردەیەکێ لەشکەری گەلەک جاران بزاڤکرن کۆ هەڤڕکەکێ خوە ژ ناڤ ببەت، لێ پشتی گەلەک بزاڤان بسەرنەکەڤت. لەوڕا ژی بڕیاردا کۆ بڕێکا هزری و عەقلی وی ژ ناڤببەت. ئەو ڕابوو ب ئامادەکرن و بەرهەڤکرنا خوارنەکا مەزن و بەرفرەھ و داخوازی بۆ سەرکردێ دیتر هنارت کۆ ببیتە مێهڤانێ وی و پێکڤە خوارنەکێ بخۆن.
سەرکردێ دیتر گۆتێ: “ئەز دێ ب مەرجەکی هێم، ئەو ژی کۆ ئەز لەشکەرێن خوە یێن مێرخواز و عەگید هەمییان دگەل خوە بینم.”
ئەوی ژی ڕەزامەندیا خوە لسەر ئەڤی مەرجێ وی دیارکر.
سەرکردەی ژی زەلامێن خوە یێن ژهەمیا دلێرتر و شەڕڤانتر دگەل خوە برن. وی وەسا هزرکر کۆ دبیت ئەڤە پیلانەک بیت و ئەو خیانەتێ ل وی بکەن و بکۆژن. لەوڕا ژی لەشکەرێ خوە هەمی ئاگەهدارکرن، کۆ د ئامادەباشیێدا بن ل وی دەمێ ئەو دبنە مێهڤان ل دەف وان.
پشتی چووینە وێرێ، ڕێزەکا مەزن ل وان گرت و چ تشت دناڤبەرا واندا چێنەبوون و هەمی تشت ب ئاسایی دەربازبوون. پشتی ژ مێهڤانداریێ زڤڕینەڤە، دیت کۆ سەربەزگەها وی یا هاتیە وێرانکرن و هەمی تشتێن وان یێن هاتینە ڕەڤاندن و وێرانکرن. ل دەمێ ئەو مژویل ل مێهڤانداریێ، سەرکردەیێ دیتر هێرش کربوو سەر سەربازگەها وی و ژ بەر کۆ چ زەڵامێن بهێز نەمابوون، ئەو شییان بساناهی دەست بسەر هەمی تشتێن واندا بگرن.

“نابیت مرۆڤ بتنێ سەحکەتە ئالیەکی و هزر د ئێک تشت بتنێ دا بکەت. دا کۆ مرۆڤ تۆشی چ کارەسات و زیانان نەبیت، پێدڤییە پێشبینییا هەمی تشتان بکەت.”

*****

جارەکێ ماموستایەکی ب توڕەیی ڤە گۆتە قوتابیەکی: “بۆچی تو هەمی گاڤا یێ پیسی؟ ما دایک و بابێن تە؛ تە نابینن؟ چەوا ئەو تە هۆسا ڤرێدکەنە قوتابخانێ؟ سوبەهی بێژە وان بهێنە قوتابخانێ.”
قوتابی ب دوو چاڤێن تژی ڕۆندکڤە سەرێ خوە ڕاکر و گۆتێ: “ماموستا ببۆرە ئەو نەشێن بهێن، چونکی ئەو نوکە یێن دبن ئاخێڤە.”

“لەزاتی د بڕیارێن پێش وەخت و ڕەفتارکرنێدا، هەردەم هەلویستێن دڵتەزین و پەشێمانییێ د دویڤ خوە ڕا دئینیت.”

*****

خەونا زارۆکەکی بۆ کۆ ڕۆژەکێ دگەل بابێ خوە یێ ماسیگر بچیتە سەر دەریایێ و دگەل وی بچیتە دگەمیا ماسیگرتنێدا. پشتی گەلەک جاران وی هیڤی ژ بابێ خوە کرین کۆ دگەل خوە ببەت، ڕۆژەکێ بابێ وی بڕیاردا کۆ ئەڤێ داخوازیا وی بۆ بجھ بینیت. پشتی زارۆک و بابێ خوە چووینە نیڤا دەریایێ، ژنیشکانڤە دەریا ڕابوو و هۆڕەبا هات. ئەڤ تشتە ل دەف بابێ یێ ئاسایی بوو، ژ بەر کۆ وی ژیانا خوە هەمی یا دناڤ دەریایێدا بۆراندی. لێ زارۆک گەلەک دتڕسییا و ڤەدلەرزی. ئەوی خوە د بابێ خوە وەرکر و گوتێ:
“بابو، ئەز گەلەک یێ دتڕسم. دێ گەمییا مە بن ئاڤ بیت!”
بابێ بەرسڤا ویدا و گوتێ:
“کوڕێ من، نە تڕسە. ئەگەر ئاڤا دەریایێ هەمی ژی خوە بکەتە ئێک، نەشێت گەمیا مە بن ئاڤبکەت. چونکی چ کۆن ل گەمیا من نینن کۆ ئاڤ بهێتە ژوور و ئەز ناهێلم ئاڤ بهێتە ناڤ گەمیێ دا کۆ بن ئاڤ ببیت.”

“ئەگەر کاودان چەند دژوار ببن ژی ل جیهانا ژ دەرڤە؛ لێ نەگەهنە ناخێ مرۆڤی و کارتێکرنێ لێنەکەن، ئەو دێ یێ باش و ب سڵامەت بیت.”

*****

دیکلەک هەبوو کۆ ل وی جهێ ئەو لێ، دشیا هەمی دیکلان و کەس نەبوو هەڤڕکییا وی بکەت. ئەوی دیکلی گەلەک خوە مەزندکر ب هێز و شیانێن خوە و وەسا هزر دکر کو چ گیانەوەر لسەر ئەردی نینن بشێن وی بشکێنن.
ڕۆژەکێ ئەو دیکل چوو سەر گرەکێ بلند و گازیکر و گۆت:
-“ئەز بهێزترینم.. کەس نینە بشێت هەڤڕکییا من بکەت.”
د وێ ناڤبەینێدا بازەک هاتە هنداڤێ و نکلێن خوە د لەشێ ویدا چکلاندن. ئەوی هند دیت کۆ ئەو یێ ل بەر پەڕێن ئاسمانان و نەشێت ب چ ڕەنگا هاریکاریا خوە بکەت.

“هەلبەت ئەگەر کەسەک چەندێ بهێز و زیرەک بیت ژی، کەسەکێ دیتر یێ هەی کۆ د هندەک تشتاندا ژ وی بهێزتر و زیرەکترە.”

*****

ژنکەکا بڕیتانی ڤییا گۆشتێ ماسی بۆ خوە بکریت. دەمێ چووی بازاری و بهاکرین، دیت کۆ پارە تێرا کڕینا ماسی دگەل نینن. لەوڕا ژی ئەو ژن ئێکسەر بەرەڤ پەرلەمانێ بریتانیا ڤە چوو. دەمێ گەهشتی، دیت کۆ پەڕلەمانتار یێن د کۆمبینێدا.
ژن چوو بەرامبەری سەروکێ پەرلەمانی و گۆتێ:
“شەرمە بو حکومەتەکێ؛ کۆ هەڤوەڵاتیێن وێ هند پارە نەبن بشێن کیلویەکا ماسیا بکڕن.”
پشتی ئەڤ پەیڤە گۆتین، ئێکسەر ژ وێرێ دەرکەڤت. سەروکێ پەرلەمانی ئێکسەر بڕیارەک دەرئێخست کۆ بهایێ ماسییان بهێتە ئەرزانکرن و فەرماندا کۆ بهایێ وان لسەر وی نڕخی یێ جهگر بیت.

“گەلەک یا فەرە کۆ حکومەت ل دویڤ داخازیێن هەڤوەڵاتیێن خوە بچیت؛ دا کۆ ئەو ژی دلسۆز و دەستپاک بمینن بۆ وەڵات و نیشتمانێ خوە.”

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *