پاولۆ کوێڵۆ

کۆرتە چیڕۆک وەرگێڕان ژ ئینگلیزی: ژیوار عبدالحکیم

زارۆکەک ل دەف داپیرا خوە ڕوینشتە خوار دەمێ وێ نامەیەک دنڤیسی. پشتی چەندەکێ، زارۆکی پڕسیار ژێکر: – “ئەرێ تو چیڕۆکەکێ لسەر وان تشتێن مە کرین دنڤیسی، داپیر؟ یان ژی تو چیڕۆکەکێ لسەر من دنڤیسی؟” داپیر ژ نڤیسینێ ڕاوەستیا و بەرسڤا نەڤییێ خوە دا: -“ب ڕاستی ژی ئەز یا لسەر تە دنڤیسم. لێ تشتەکێ گرنگتر ژ پەیڤان یێ هەی، ئەو ژی ئەڤ پێنڤیسێ ڕساسی یە یێ ئەز پێ دنڤیسم. ئەز هیڤیخوازم کۆ تو وەکی ڤی پێنڤیسێ ڕساسی لێبهێی دەمێ تو مەزن دبی.” بۆ زارۆکی ئەو پێنڤیس گەلەک بوو مەرەق. باش سەحکرێ و هزرا خوە تێدا کر. پاشی گۆتە داپیرا خوە: -“لێ داپیر، ئەڤ پێنڤیسە وەکی هەمی پیێنڤیسێن دیترە و ئەز چ تشتێ جێواز و تایبەت تێدا نابینم.” داپیرا وی گۆتێ: -“ئەڤ چەندە دمینیت لسەر وێ ڕێکا تو پێ سەحدکەیە تشتا. کۆڕێ من، ئەڤی پێنڤیسی پێنج تایبەتمەندی یێن هەین. ئەگەر تە شییا د وان پێنج تایبەتمەندیان بگەهی، دێ بیە کەسەکێ گەهشتی و بیرمەند. تایبەتمەندیا ئێکێ؛ تو دێ شێی کارێن مەزن کەی، لێ دڤێت ژبیرنەکەی کۆ دەستەکێ مەزن یێ هەی ڕێبەریا پێنگاڤێن تە دکەت. ئەو ژی دەستێن خودێ نە، ڕێکێ نیشا تە ددەن و ڕێبەریا تە دکەن. تایبەتمەندیا دووێ؛ تو دێ جار و باران ڕاوەستی دا کۆ تڕاشکی بکاربینی. دبیت تڕاشک پیچەکێ تە بئێشینیت، لێ تو دێ تویژتر و چالاکتر بی پشتی هینگێ. لەوڕا ژی پێدڤیە تو فێرببی کۆ خوە لبەر ئێش و ئازاران بگری، ژبەرکۆ ئەو تە دکەنە کەسەکێ باشتر و بهێزتر. تایبەتمەندیا سیێ؛ پێنڤیس هەردەم دەرفەتێ ددەتە ژێبری کۆ خەلەتیان ژێ ببەت. لەوڕا ژی ڕاستڤەکرنا ئەو خەلەتیێن مە کرین نە تشتەکێ خڕابە، بەلکۆ هاریکاریا مە دکەت دا کۆ ئەم بمینین لسەر ڕێکا دادپەروەریێ. تایبەتمەندیا چارێ؛ یا گرنگ سەبارەت پێنڤیسێ ڕساسی نە ڕۆخسارێ وی یێ بسەرڤە و دارێ وی یە، بەلکۆ ئەو ڕساسە یێ کۆ دناڤ ویدا. لەوڕا ژی هەردەم گرنگیێ بدە گەوهەری و ئەو تشتێن کۆ دناڤ ناخێ تە دا ڕویددەن. تایبەتمەندیا پێنجێ و دۆماهیێ؛ پێنڤیسێ ڕساسی هەردەم شوینوارەکی ل پشت خوە دهێلیت. لەوڕا ژی بزانە کۆ هەر تشتەکێ تو د ژیانێ دا دکەی، دێ شوینوارەکی ل پشت خوە هێلیت. لەوڕا ئەڤێ چەندێ بزانە و بلا ل بیرا تە بیت ژ بەری ئەنجامدانا هەر کریارەکێ.”

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *