نڤێسين: جوان عزه‌ت

ئه‌گه‌ر هزر بكه‌ین هه‌ر ژ قوناغێن ده‌ستپێكا ژیانێ ده‌مێ ژنێ ده‌ست هاڤێتى چاندنا كشتۆكالى هه‌تا دگه‌هیته‌ قوناغێن سه‌رده‌م/نوویخواز ژن بۆ پیشه‌نگا ئاستێ مرۆڤایه‌تیێ و مێر و زارۆك ل سه‌ر پێشه‌نگیا وێ گه‌هشتینه‌ ئاستێ هشیارى و زه‌مینه‌سازیێ، چونكو ده‌مێ ژن ژ دایكبووى وێ پێدڤى ب چه‌ندین ریێك و به‌رنامه‌یێن ئاراسته‌كرى هه‌بوو، هه‌تا شیایى ببیته‌ ژنه‌ك خودان زێهنییه‌ت، ئیراده‌، هێز، باوه‌رى د پیشه‌نگا جڤاكى دا و ل سه‌ر ڤى به‌گراوه‌ندى هێدى هێدى به‌ره‌ڤ سیسته‌مه‌ك و ژیانه‌كا مودێرن ڤه‌ چوو، له‌ورا هه‌ر هینگێ ئه‌و بوو رابه‌را داهێنانه‌كا نوى ژبه‌ركو شییا سه‌مبوولبوونا خۆ ل سه‌ر جڤاكى بده‌ت سه‌لماندن.
به‌لێ ب مخابنى ڤه‌ د به‌رده‌وامییا روژگارێ دا (جڤاكێن گرتى) ل سه‌ر هنده‌ك پیڤه‌رو ئه‌تیكێن نه‌ ئاماده‌كار ڤه‌ برێڤه‌دچوون و هه‌تا نها به‌رمایێ وان باندۆرا خۆ ل سه‌ر زێهنیه‌تا ژنێ هه‌یه‌، براستى ئه‌ڤه‌ ژى وه‌دكه‌ت هه‌ست و هزرا ژنێ وه‌ك هێزه‌كا سه‌ره‌كى دجڤاكى دا نه‌هێته‌ دیتن، ئانكو مرۆڤ شێت بێژیت هه‌ستا ره‌گه‌زى پتر ژ هه‌ستا هزرى ل نیك وێ یا زال بیت، ژ به‌رهندێ ئه‌و باوه‌رى یه‌ بۆ ره‌گه‌زێ به‌رامبه‌ر ژى په‌یدادبیت، كو ئه‌گه‌ر ژن د زێهنیه‌تا خۆ دا بۆ خودان تێروانینه‌كا ته‌مام، هینگێ دێ بیته‌ ژنه‌كا سحرباز یان ژى توندره‌و به‌رامبه‌ر لایه‌نێ دى، له‌ورا ترس ژ هشیاریا وێ هه‌یه‌.
به‌لێ مافێ مه‌ هه‌یه‌ ڤێ پرسیارێ بئازرینین و بێژین، ئه‌گه‌ر ژن په‌نایێ نه‌به‌ته‌ به‌ر هه‌ولا زانین و زێهنیه‌تێ ئه‌رێ دێ چاوان ژ فۆرمێ بێ هه‌لویستى، نه‌ریتى و نه‌زانینێ رزگار بیت؟ یان ژى دێ چاوان زانیت كا هه‌لویستێن وێ به‌رامبه‌ر ئه‌ركێن به‌رپرسیاریێ چنه‌، هه‌روه‌سان هزرا وێ د ریفورمكرنا زێهنیه‌تێ دا چه‌ند گرنگیا خۆ هه‌یه‌؟
لگور دیتنا من ئێكه‌م پێنگاڤ ئه‌وه‌، ژن هه‌ولبده‌ت خۆ ژ فورمێن بێ یاسا، بێ رێكخستن، بێ ئیراده‌ بوونێ ڤه‌رده‌ربكه‌ت، ژبه‌ركو ئه‌و ل سه‌ر بیروباوه‌ره‌كا هۆسا دێ دۆیرى پره‌نسپێن به‌رپرسیارى مافگه‌رایێ ژیت. چونكو ئه‌و جڤاكێ هزرا پله‌داریێ هه‌بیت به‌رده‌وام دخوازیت ژن دناڤ سرۆشتێ كێشه‌یان دا بژیت و نه‌بیته‌ ژنه‌ك بخوه‌ باوه‌ردار و رۆشنگه‌ر و هه‌مان ده‌مى دا چێدبیت ژن بخوه‌ ژى قه‌بیل بكه‌ت و هه‌ولبده‌ت دناڤ وى سرۆشتى دا بمینت، به‌لێ ئه‌گه‌ر كۆیر هزربكه‌ین كه‌لتوورێ بابسالاریێ زه‌حمه‌ت بشێت كه‌لتورێ ژنێ ل سه‌ر بزوتنه‌وه‌یه‌كا نوى و به‌رخودانه‌كا شارستانى ئاڤا بكه‌ت، چونكو زێهنیه‌تا زه‌لامساریى هه‌تا ئه‌ڤرۆ ژى نه‌شیایه‌ كه‌لتوورێ دایكاتى و ژنناسیێ شرۆڤه‌بكه‌ت. براستى ئه‌ڤه‌ ژى دبیته‌ جهێ هزركرنێ، ئانكو هۆسا مرۆڤ شێت بێژیت پتر ده‌وله‌تا كه‌لتورى دهێته‌ درۆست كرن، له‌ورا پێویست ناكه‌ت ژن ل ده‌رڤه‌ى خۆ بنه‌ما و ته‌یۆران بگه‌ریت، به‌لكو پێویسته‌ د ناڤ خۆ دا ل (شارستانیا هه‌بوونێ) بگه‌ریت كا وێ چ دڤێت؟ ئه‌و چیه‌ و كى یه‌؟ هه‌روه‌سان دێ چاوان شێت ئه‌رك و مافێن خۆ دابین كه‌ت؟ ئه‌ڤه‌ هه‌مى دناڤ هزرا وێ دا دشێن ببن جه‌وهه‌رێ به‌رسڤدان و به‌رپابوونێ.
ژلایه‌ك دى، ماده‌م ژن ئه‌نجامێ ماهیه‌ت و سه‌نته‌رێ ژیانێ یه‌، زێهنیه‌ت ژى به‌رهه‌مێ ئافراندنا ماف و ناڤه‌رۆكا ژیانا وێ یه‌، ل ڤێرێ ئه‌ز نابینم كو هێله‌كا سور، ترس و جوداهیێ دناڤبه‌را هزرا ژنێ و میرى دا هه‌بیت، به‌لكو هه‌ردوو مینا مرۆڤ دهێنه‌ ئاراسته‌كرن و مافێ وان هه‌یه‌ ل زانینێ بگه‌رن. هه‌روه‌كو ماكرینا بێژیت: “جه‌وهه‌رێ ده‌رونى، شیانێن هزركرنا ئه‌قلى هه‌یه‌ و چ جیاوازى دناڤبه‌را ژن و مێرى دا نینه‌”. واته‌، دڤێ هێلێ دا هه‌ر كه‌سه‌ك دشێت به‌شدارى ئاڤاكرنا خۆ ببیت، بێ كو ئه‌و ئاڤاكرن ببیته‌ جهێ تێكدانا بێ واته‌كرن و كه‌سایه‌تیا ره‌گه‌زێ به‌رامبه‌ر، چونكو هه‌ر مرۆڤه‌ك خودان سیسته‌م، ئه‌زموون، هه‌بوون و كارێكته‌را خۆ یا تایبه‌ته‌ و دشێت ب وى واقعێ كو هه‌یه‌، وى سیسته‌مى و وێ هه‌بوونێ ب ئه‌زموونا خۆ به‌رنامه‌ دارێژ بكه‌ت.
ئه‌نجام: یا ئه‌ز پێ باوه‌ر ئه‌وه‌، كو ژن ب هێزا خۆ دشێت نوینه‌راتیا هه‌ر پێكهاته‌یه‌كێ د گه‌ردونى دا بكه‌ت، چونكو ئه‌و ئیكه‌م بوونه‌وه‌ر و ئورگانه‌ شیایى ب كردار ئاگه‌هدارى بوویه‌رێن ژیانا جڤاكى، كومه‌لایه‌تى، خێزانى، سیاسى، پیشه‌سازى، ئابورى، گشتوكالى، یاسایى … و ببیت.به‌لێ ب مخابى ڤه‌ دده‌ستپێكا هه‌بوونا خۆ دا ل سه‌ر ناڤێ (ژنه‌ك ب به‌نده‌یا هزرا سرۆشتى) هاتیه‌ لقه‌له‌مدان، دیاره‌ ئه‌ڤێ ژى بارگرانى ئێخستیه‌ سه‌ر ملێن وێ، به‌لێ بدیتنا من ئه‌ڤه‌ نه‌ پێگه‌هه‌كێ ب زه‌حمه‌ته‌، به‌لكو پێگه‌هه‌كه‌ محكومى به‌رپرسیاریه‌كا بهێزه‌. ل ڤێرێ ئه‌ز دبێژم ژیان ب رولێ ژنێ دهێته‌ وێنه‌كرن، جوانكرن و بهاداركرن، له‌ورا ژ پێخمه‌ت وێ چه‌ندێ پێدڤییه‌ ژن ل سه‌ر وێ تایبه‌تمه‌ندیێ هزرا ئاڤاكرن و ناسنامه‌یێ ب فورمه‌ك نوى زێهنیه‌ته‌كا ئافرینه‌رى به‌رپابكه‌ت پاشى هزرا خۆ پێشكیشى سیسته‌مێ جڤاكى بكه‌ت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *