ئامادەکرن: ئومێد سەگڤان

سێ برا هەبوون، ئاغایێن عەشیرا حەسەن و حەیدەران بوون، وان سێ برا خوشکەک هەبوو ناڤێ وێ سەیرێ بوو، سەیرێ زراڤ بوو وەک تاک رحانێ و جوانى ژ دنیایێ خلاس کربوو. ژ گەلەک رەخ و ئالیان دهاتن خازگینێن وێ، ژ ئاغا بگرە حەتا دگەهت میرا. لێ وێ هێژ لاوکێ دلێ خوە نەدیتبوو. ڕۆژەک ژ ڕۆژان هەر سێ برایێن سەیرێ بانگى وێ کرن و ژێرا گۆتن: سەیرێ خوشکا مە یا دەلال، تو کچا ئاغایێ عەشیرا حەسەن و حەیدەرانى چاڤێن مە هەر سێ برا ل بەژن و بالا تەیە، ئەم دێ تە ژ خوە رە بکن پێکگهورک و دێ هەر ئێک ژ مە ب ژن کەڤت. تو ب خوە دزانى گاڤا کو کچ کەت د تەمەنێ پانزدە سالیێ بێ مێر نابت، مێر ژى گاڤا بوو شازدە سال شیان نامین و هشێ وى دچت سەر ژنێ. ئێدى نە ژن بێ مێر دبت نە مێر بێ ژن دبت، بلا گونەها تە نەکەڤت د ستویێ مە دا، کەنگى تە ئێک ب دلێ خوە دیت ئەمر بکە و بێژە مە!

   بێگۆمان سەیرێ وەک کچەک شەرمینۆک قەت یا دلێ خوە ئاشکەرا نەکر و گۆت: شەرمە بۆ کچەکێ د روویین برایێن خوە دا مێرەکێ دەستنیشانبکت، هوون ب خوە دزانن ژن دارێ شکەستیە، یا باب و برا بێژن ئەوە!

هەر سێ برایا پسمامەک هەبوو ب ناڤی عەلیێ مامەد، کار و بارێ وى ئامادەکرنا سیار و دانانا خارن و ڤەخارنا مێران بوو د کوچکێ دا. خۆرتەک جوان و هندى بێژى بەرکەتى بوو. ڕۆژەکێ سەیرێ د پەنجەرێ دا بوو و چاڤێن وێ ب عەلى کەت، ژ بەر جوانیا عەلى مەندەهوش بوو و ب لەز بانگى خوداما خوە کر و ژێ پرسى: ئەو خۆرتێ هانێ کیە؟

  “ئەو عەلیێ مامەد، پسمامێ تەیە.”

  “هەرە بۆ من بینە ڤێ دەرێ!”

    خداما سەیرێ ب لەز دچت و عەلیێ مامەدى دئینت جەم سەیرێ، لێ بەلێ عەلى ژى بەر جوانى و رندیا کچا مامێ خوە سەرمەست دبت و دل دکەفتێ.

   سەیرێ وى ب زوورى قایل دکت و کو وێ بخازت، لێ بەلێ شیانێن عەلى نە ئەوقاس مەزنن کو بشێت کچا ئاغایەک وەها مەزن بخازت، ژ بەر هندێ سەیرێ وى نەچار دکت، کو ب رەڤینت و ببت کەلها جۆمانیێ. عەلى ژى ناکت نەمەردى هەر د وێ شەڤێ دا قوناغا حەفت شەڤ و حەفت ڕۆژان دبرت و سەیرێ دبت کەلها جۆمانیێ ل جەم ئیسکانێ گۆلیخانێ و خوە دهاڤیت بەخت و مرازێ وى. ئیسکانێ گولیخانێ وان ب گەرمى دحەوینت و خودان دکن، لێ بەلێ پشتى سەیرێ وەها جوان و سپەحى دبینت، دلێ وى  ئاگرێ عەشقێ دهێت سۆتن و یەکسەر بریارا کوشتنا عەلى ددت. رادبت شەڤەک ژ وان خەنجەرا خوە ژ کاڤلانى دەرێ دخت و قولنجێن عەلى د خەوێ دا دکت بێژینگ و ل بەر تەنشتا سەیرێ دکۆژت. سەیرێ د خوینێ را دمینت و دکت قێرى و هەوار و ب چول و چیایان دکەڤت. دبت هەڤالێ کیڤیان، گیایى دخوت و دبت هەڤالێ دار و بەریا.

   ڕۆژەکێ فەقیەکێ دبینت و هەوارا خوە دگەهینت وى فەقى و نامەکێ بۆ برایێ خوە قۆلو قاسمى رێدکت، داکو بێت حەیفا پسمامێ وێ ژ ئیسکان ئاغای ڤەکەت.

   ئەو فەقى ب بەز وێ نامێ دگەهین برایێن سەیرێ، لێ ژ بلى قولو قاسمى کەس ل هانا خوشکا خوە ناهێت. ب لەز قۆلو قاسم هزار و پینچ سەد سوارا ئامادە دکت و بەرێ خوە ددت کەلها جۆمانیێ.

    ل رەخ و دۆرێن کەلهێ هەمووێ دگرن و خولامەکێ ڤرێدکت جەم ئیسکان ئاغاى و نامەکێ بۆ دنڤیست: “ئسکان ئاغا ئەم ژ ڤێرێ حەتا ئاسمانان منەتدارێ تەنە، کو تە ئەو مێر کوشت یێ کو خوشکا مە رەڤاندى!”

    دەما ئیسکانێ گولیخاتێ ڤێ نامێ دبینت، ب لەز و بەز خەنجەرا خوە دکت بەر تەنشتا خوە رە و ل هەسپێ خوە سیار دبت و قەستا چادرا قولو قاسمى دکت.  ب ڤى رەنگى قولو قاسم وى ژ کەلهێ دەرێدخت و وى ب چار دەستان دگرت و ب هەسپێ خوە ڤە گرێددت و لەشێ وى ژ دەربێن خەنجەر و شیران دکت موخەل و سەرێ وى ژ ستویێ ڤە دکت و بەرێ خوە ددت چیایێ ماهدیایێ و ل خوشکا خوە یا پەرگەندە و دلسۆتى دگەرت. ل ڤێ نهالێ و ل وێ لاتێ بانى وێ دکن: “سەیرێ هوو سەیرێ…کابێژە مە هرچا توخارى یان گورا تو کوشتى!”

   ب ڕۆژان ل سەیرێ دگەرن، دەمەکێ خولامەک ژ وان سەیرێ ل بەر لاتەکێ دبینن، و مزگینیا کوشتنا ئیسکان ئاغایى دگەهینێ و سەرێ ئیسکانى دهاڤێژت بەر پێن وێ و وێ دیسا دزڤرین وەلاتێ حەسەن و حەیدەران.

تێبینى: ئەڤ داستان ژ ئالیێ مرادێ کنێ ڤە وەک سترانەک درێژ هاتیە گۆتن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *