ئامادەکرن: خەدەنگ

مەلا مەحمودێ بایەزیدى ل سالا (١٧٩٧ – ١٧٩٩) ل بایەزیدێ ژ دایک بوویە, ئێک ژ پێشەنگێن  رینساناسا وێژەیا کوردى یا سەدسالا نوزدانە. پەخشانا کوردى ل سەر دەستێن وى هات ئافراندن, ئەو نە بتنێ هەمشارێ سەیدایێ ئەحمەدێ خانێیە, بەلکو تەمامکەرێ وىیە. چەوا کو خانى ب هوزانێن خوە هەستا نەتەویا کوردى ڤەژاند و هزرەک نەتەوى دامەزراند, مەلا مەحمودێ بایەزیدى ژى ب پەخشنا خوە و نڤیسێن خوە یێن ئەنسکلوپیدیک و بهادار بەرێ وێژەیا کوردى گۆهاست. یا راست و درۆست وى روویەکى نووى دا وێژەیا کوردى و ب پەخشانێ دڤیا پێشداچوونەک  د مەژى و دیرۆک و هزرا کوردى دا چێکت. ژ بلى پەرتوکا رسوماتنامێ ئەکرادان, وى پەرتوکا نرخدار یا شەرفخانێ بەدلیسى (شەرەفنامە) ژى وەرگێرایە سەر زمانێ کوردى.  هەر وەسان ل سەر داخازا کوردولوکێ رۆس (ئەلکێسەندەر ژابا)ى ب خەتێ دەستێ خوە پەرتوکا(تەواریخى قەدیمى کوردستان) نڤیساندیە. ب ڤێ چەندێ ئەو یەکەم وەرگێرێ کورد دهێت هژمارتن. هەر وەسان وى هندەک چبرۆکێن کوردى ب ناڤێ (جەمیعێ ریسالە و حیکایەیان) نڤیساندیە و هندەک ژ وان چیرۆکان سەرپیهاتى نە و نێزیکى دیرۆکێ نە, ئانکو نە چیڕۆکێن خەیالى نە. بەلکو روویدانێن راستەقینە یێن دیرۆکا کوردانن. ل سەر زمانى ژى کارکریە و رێزمانا (عەلى تەرەماخى) ب دەستێن خوە نڤیساندیە و پێشگۆتن ژى ئامادەکریە. ل گۆر لێکۆلینان, کو وى دیرۆکا کوردستانێ یا پشتى شەرفنامێ نڤیساندیە, ب ناڤێ (تاریخێ جەدیدێ کوردستان) کو نێزیکى هزار رووپەلان بوو. لێ بەلێ دەستخەتێ ڤێ پەرتوکێ نەگەهشتیە ڕۆژا ئەڤرۆ و بەرزەبوویە. دیسا ل سەر عێل و عەشیرێن کوردان و ئەو دەڤەرێن ل سەر دژین وى خەباتەک بنرخ هەیە. هەروەها کتێبەک دەربارەى زمانێ کوردى هەیە ب ناڤێ (توحفەتول خللان فى زمانى کوردان). ژ بلى ڤان بەرهەمان وى چیرۆکا (لەیلا و مەجنوونى) نڤیساندیە و پێشگۆتن بۆ هەلبەستڤانێن کلاسیک و شەرفنامێ ئامادەکریە ئەوا کو ئەلکێسەندەر ژاباى بۆ زمانێ فرەنسى وەرگێرایە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *