دیدار: دیار عه‌ڤدى حه‌سه‌ن
به‌رهه‌ڤكرن: دلێر كه‌مال
بۆلۆنیا پرۆسێس ئێك ژ ئه‌وان سیسته‌مێن نوى یێن خواندنێ یه‌، كو دناڤ زانكۆیێن وه‌لاتێن پێشكه‌ڤتیدا دهێته‌ جێبجێكرن و قوتابیێن وان سه‌ركه‌ڤتنێن مه‌زن د بوارێن جوداجودا دا بده‌ستخۆڤه‌ هیناینه‌. هه‌لبه‌ت هه‌ر وه‌كو دیار كو زانكۆیا زاخۆ بۆ ماوه‌یێ دوو سالانه‌ ئه‌ڤى سیسته‌مى (بۆلۆنیا پرۆسێس) بكاردهینت، له‌ورا مه‌ ب فه‌ر زانى ژ نێزیك باس ل ئه‌ڤى سیسته‌مى بكه‌ن و بۆچوونێن مامۆستا و قوتابییان وه‌ربگرین.
ڕێزدار دكتۆر (ڕه‌مه‌زان جه‌عفه‌ر) سه‌رۆكێ پشكا زانستێن كۆمپيۆته‌ر ده‌رباره‌ى پرۆسێسا بۆلۆنیا دبێژیت: بۆلۆنیا پرۆسێس سیسته‌مه‌ك جیهانى یێ سه‌ركه‌ڤتییه‌ و چه‌ندین وه‌لاتێن جیهانێ ئه‌ڤى جۆره‌ سیسته‌مى جێبجێ دكه‌ن، هه‌ر وه‌ك خویایه‌ كو زانكۆیا زاخۆ بۆ ماوه‌یێ دوو سالانه‌ ئه‌ڤى سیسته‌مى بكاردهینت. مه‌ره‌م و ئارمانجێن سه‌ره‌كى ئاڤاكرنا كه‌سایه‌تییا قوتابییه‌ كو خودان شیان و كارا بیت و دناڤ ژینگه‌ها زانكۆیێدا كه‌سه‌ك سه‌ركرده‌ بیت، ئه‌ڤ یه‌كه‌ ژى ب مه‌ره‌ما ئه‌وێ چه‌ندێ یه‌ كو قوتابى ب ئاوایه‌كێ باش دگه‌ل ده‌ورووبه‌رێن خۆ سه‌ره‌ده‌ریێ بكه‌ت و ل گوره‌یى كاودان و بابه‌تان ڕۆلێ خۆ ب جوانى بگێریت.
هونه‌ر سه‌لیم قوتابیێ قوناغا ئێكێ ل پشكا زانستێن كۆمپیۆته‌رى لدور مژارا مه‌ ئازراندى دبێژیت: ئه‌ز بخۆ وه‌ك قوتابییه‌ك ئه‌ڤى سیسته‌مى (بۆلۆنیا پرۆسێس) ب باشى نابینم، ژبه‌ركو هه‌تا ئه‌ڤ سیسته‌مه‌ ب ئاوایه‌كێ باش بهێته‌ پراكتیزه‌كرن پێدڤى ب هه‌بوونا چه‌ندین پێدڤییاتى و كه‌ره‌سته‌یان هه‌یه‌، لێ ژبه‌ركو ئه‌ڤ پێداویسته‌ لبه‌رده‌ستێن مه‌ قوتابییان نینه‌، له‌ورا دێ بارێ مه‌ گران بیت و ئه‌م د ده‌رحه‌قێ وانه‌یێن خۆ دا ده‌رناكه‌ڤین. هه‌روه‌سا ئێك ژ ئاریشه‌یێن سه‌ره‌كى نه‌بوونا جهى یه‌، ژبه‌ركو هۆلێن مه‌ یێن خواندنێ به‌رته‌نگن و ڕێژه‌یه‌كا زۆر یا قوتابیان د هولێدا هه‌نه‌. خاله‌ك دیتر ژى گرنگ هه‌یه‌ بێژم، كو هه‌تا نها بۆ مه‌ قوتابییان ئه‌ڤ سیسته‌م و چاوانییا سه‌ره‌ده‌ریكرنا مه‌ دگه‌ل بابه‌ت و نمره‌یان ڕوون نینه‌، له‌ورا پێدڤییه‌ ب شێوه‌یه‌كێ باشتر بۆ مه‌ بهێته‌ شرۆڤه‌كرن.
سه‌رۆكێ پشكا زانستێن كۆمپیۆته‌رى زێده‌تر گۆت: خاله‌ك گرنگ هه‌یه‌ كو جهێ ئاماژه‌پێدانێه‌، ئه‌و ژى ئه‌ڤ خاله‌یه‌ كو ئه‌نجامێن بكارهینانا ئه‌ڤى سیسته‌مى ل ده‌مه‌ك درێژ دیاردبن، ئانكو پێدڤییه‌ بێهنا مه‌ لسه‌ر هه‌ر تشتى د ئه‌ڤێ پرۆسێسێدا فره‌هـ بیت، بۆ نموونه‌ ل هنده‌ك وه‌لاتا پتر ژ (25) سالان ده‌مى خایاند هه‌تا ب ئه‌نجامێن ئه‌رینى شادبووین. هه‌لبه‌ت ئه‌ز ب باوه‌ر و یێ گه‌شبینم كو قوتابى دێ مفایه‌كێ باش وه‌رگرن و سیسته‌مێ دێ یێ سه‌ركه‌ڤتى بیت.
لدور هه‌مان بابه‌تى قوتابى (هوزان قاسم) دیتنه‌ك جودا هه‌یه‌ : ب دیتنا من پرۆسێسا بۆلۆنیا گه‌له‌ك باشه‌ و مفایێن خۆ زۆر هه‌نه‌، ژبه‌ركو قوتابى ڕۆله‌كێ سه‌ره‌كى دگێریت و ئه‌ڤ یه‌كه‌ ژى هاندان و پشته‌ڤانییه‌ بۆ مه‌ كو زێده‌تر خۆ بوه‌ستینن و گوهێ مه‌ ل وانه‌یێن مه‌ بیت و كار لسه‌ر كه‌سایه‌تییا خۆ بكه‌ن و بزانن ب باشترین شێوه‌ ب په‌یڤن و وانه‌یێن خۆ شرۆڤه‌ بكه‌ن. لێ به‌لێ ئه‌م ژ بیر نه‌كه‌ین كو ئه‌ڤى سیسته‌مى ئاسته‌نگێن خۆ ژى هه‌نه‌، ئه‌و ژى نه‌بوونا كه‌ره‌ستا و پێدڤییاتییان ب ڕه‌نگه‌كێ به‌رفره‌هـ.
پرۆفیسۆرێ هاریكار دكتۆر (ستار جه‌بار حاجى) سه‌رۆكێ پشكا ده‌روونناسييا گشتى ب ئاوایه‌كێ ئه‌كادیمیانه‌ دبێژیت: بۆلۆنیا پرۆسێس سیسته‌مه‌كێ نوى یێ خواندنێ یه‌ و ئه‌ڤه‌ بۆ ماوه‌یێ دوو سالانه‌ ل زانكۆیا زاخۆ دهێته‌ پراكتیزه‌كرن، ئه‌ڤه‌ سیسته‌مى پێدڤى ب ژینگه‌هه‌كا گونجایى بۆ خواندنێ وه‌ك (هۆلێن خواندنێ و ژماره‌یا كێم یا قوتابییان) هه‌یه‌، هه‌روه‌سا پێدڤییه‌ مامۆستایێن پسپۆر و خودان شان وانه‌یان بۆ قوتابییان ببێژن.
جه‌نابێ دكتۆرى زێده‌تر گۆت: ب دیتنا من سیسته‌مێ نوى كو قوتابیى سوتینا سه‌ره‌كى و فاكته‌رێ كارا و ئه‌كتیڤه‌ دێ پتر خزمه‌تا په‌یاما زانستى كه‌ت و ئه‌ڤ یه‌كه‌ پێچه‌وانه‌یى سیسته‌مێ كه‌ڤناره‌ كو هه‌ر تشت بده‌ستێ مامۆستایى بوو. لدووماهیێ دبێژم كو سیسته‌مه‌ك نوى و ب كوالێتییه‌كا هه‌ره‌باشه‌، له‌ورا پێدڤییه‌ ب ئاوایه‌كێ ژ دلكارانه‌ كار لسه‌ر ئه‌ڤى جۆره‌ سیسته‌مى (بۆلۆنیا پرۆسێس) بهێته‌كرن.

2 thoughts on “بۆلۆنيا پرۆسێس سيسته‌مه‌كێ جيهانى يێ سه‌ركه‌ڤتييه‌

وەڵامێک بنووسە بۆ karwanjacksi هەڵوەشاندنەوەی وەڵام

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *